El mondo xe bel perchè el xe vario...proprio come le tradisioni

Son un tipo de persona che ghe xe sempre piasude le tradisioni. El fato de mantignirle, de coltivarle e de trasmeterghele a le generasioni più giovani me xe sempre stado a cuor. Credo che el motivo principale xe che son nata in un paese, dove che secondo mi le tradisioni ti le senti de più che nele realtà più grandi. Ma, forse xe anche una question de caratere, imagino. Sta de fato che, secondo mi tuti dovesimo nel nostro picio portarle avanti. Infati, la parola tradision la deriva dal latin "tradere", che vol dir consegnar, trasmeter.

Le tradisioni xe una richesa enorme. Le te conta de dove che ti rivi, chi che ti son e, a volte, dove che ti va. Anche se speso no ti le pol definir, le xe reali, le rapresenta le nostre radici, la nostra identità. Dele tradisioni se podaria scriver tanto perchè ghe ne xe un’inifinità. Xe quele ligade a la religion, a la cultura, al folclore o al dialeto de un singolo posto, per far dei esempi, ma xe anche tradisioni che ga ogni singola persona.

Ricordar xe importante, te porta indrio a momenti del pasato e sopratuto a persone che xe stade presenti nela tua vita. Xe anche le tradisioni che te iuta a ricordarle, a riviver quele sensasioni che ti ga provado e de conseguensa a mantignirle vive, per sempre.

Ogni volta che magno un zavaion, per esempio, me vien in mente de tute quele domeniche matina che me lo faseva mia sia co iero fioi, e sbatudo a man, miga come ogi che se usa el girmi. Una tradision, questa, che me porta indrio a quela età spensierada e inocente, che me fa ricordar de persone che no xe più. Una tradision, questa, semplice e genuina, ma cusì forte. Talmente forte che me fa felice, ma che me fa anche provar dolor.

Cedo la parola a Velan...

La tradision xe solo che ricordi, ma forsi qualcosa de più, dipendi da i punti de vista. Co se rompeva la lavatrice Candy mia nona la ciamava el Bonassin che el rivava de Pola; solo lui, in esclusiva, nisun altro podeva meterghe sora le man. Mi iero picio e co Bonassin rivava in casa el iera come un dotor, el saludava e drito in bagno, iera un omo de poche parole, ma la Candy iera el suo mestier, da Pola fin a Salvore e forsi anche oltre. Per mi dir Candy o Bonassin voleva dir la stesa roba. Un mestier, un nome, una persona!

Per dir, a Rovigno no ti andavi in drogheria che la iera in Carera, ti andavi de Andrea. La drogheria iera Andrea e viceversa. No el iera paron perchè ierimo in regime socialista, Andrea iera l'anima de la botega. Co el ga ciolto un giovane aprendista i Rovignesi ghe ga subito trovà el soranome, iera Miro, "Miro varichina". Mia nona la andava comprar el pan da la Lina e tuti a Rovigno i la conoseva come: "La Lina del Pan". El casalin de la Lina el gaveva un altro gusto, per eser esati quel iera el gusto del pan. In Carera iera la botega de alimentari de Matiusso. Iera lui che dirigeva, lui che taiava i salami, i formagi, che el pesava i tochi de marmelata spalmada su la carta oleata. L'amico Erto el me ga contà de la vecia che la se gaveva deciso de camprar un toco de emental. Matiusso el gaveva sul banco una grosa forma de sto formagio. La vecia ghe fa: "Matiusso, el me tai dieci deca". Matiusso el taia, el meti el toco su la bilansa e ela tuta preocupada: "Lo steso me par che qua xe tropi busi!"

Un po più avanti de la via iera la botega de Ucio, che el iera un po sordo, me ricordo de la matita per i conti su la recia, e poi in cima a la Carera iera el negozio de Mimi. Iera un giovane pescador un po semplicioto che no ghe andava la matematica. El ghe domanda al gerente: "Sior Mimi, quanto costa cento dinari de mortadela?". El sior Mimi iera un omo alto e groso ma con l'espresion gentile, sempre calmo e disponibile anche con i fioi de la scola che a le dieci e mesa i vegniva comprarse el panin per marenda. Co iera qualche soldo in più mi me risciavo de comprar due tre fete de gavrilović distese sul cul del casalin, iera giusto per darghe l'odor.

El sior Tromba el vendeva le scarpe, no ti andavi in Astra ma de Tromba che oltretuto iera el baso uficiale del coro de la Marco Garbin. Tuti conoseva e rispetava Tromba, per le scarpe e per la musica, el iera una istitusion. No ti andavi in cartoleria, ti andavi de la Cisa che la te preparava i libri per la scola, i quaderni, le matite colorade, le etichete, le copertine de plastica, i quaderni blu per i compiti in clase... Insoma, niente supermercati, niente computer, i conti i li faseva a man: soma, sotrasion e qualche moltiplicasion, tuto qua, ma xe solo che ricordi...