FORSI SARIA ORA DE CAMBIAR El stato sociale el sta andando a remengo

Iero sdraià sul leto in chirurgia de l’ospedal de Pola per una picia operasion, el chirurgo me stava tirando via un neo sula gamba, lo vedevo con sto bisturi in man ma, grasie al’anestesia locale, no sentivo niente, gnanche un fil de dolor. In quel momento, ridendo dentro de mi, go posà la testa contento e beato e me xe vegnù in mente el filosofo Jean Jacques Rosseau e la sua teoria del contrato sociale.

Devo eser sincero, se ve interessa cos’che sto preiluminista francese intendeva per vero con el suo contrato sociale, legè qualcosa altro, magari un riasunto su Wikipedia: mi ve dirò invese perché el me xe vegnù in mente proprio co stavo soto i feri del chirurgo.

In testa mia, xe proprio grasie a sto contrato sociale se soto operasion no go sentì dolor. Per farla semplice, sto contrato el sta ala base del stato moderno, e con sto contatro non firmado ma batesà nel certficato de citadinansa, i citadini i se meti insieme, i paga le tase e i contributi per la salute e la pension, i se impegna a rispetar le legi che i le fa tuti insieme e lo stato ghe da indrio i servizi: scole, strade, ospedai, impiegati che i ne da le carte che ne servi e, nel mio caso, quela benedeta de anestesia che devo ringrasiar per no gaver patì.

El stato el ghe ga consentì al’umanità de pasar dale legi dela natura – quele del più forte –  a quele dele legi della civilità, dela cultura che difendi anche i più deboli. E per meterlo in pie ghe vol fiducia e solidiarietà.

La fiducia la xe fondamentale, se un omo monta in corriera a Umago per andar a visitar le Brioni, el se fida del safer, el conta de rivar a Fasana e no de svolar da l’alto xo nel canal de Leme. Se una dona la va a trapanarse un dente, la credi che el lavor ghe lo farà un dentista che sa far el suo mestier, no un becher. Co i fioi va scola, i genitori i xe sicuri che a educarli sarà bravi maestri, no qualche depravà. E se un dita la speta una carta dal comun o dal uficio dele tase per cominciar un lavor, la meti in conto de becar sto documento in tempi umani, no in ere bibliche.

Fidarse vol dir anche che el stato el farà, a nome de tuti, el suo lavor con chi che no rispeta le legi e con quei che i ga in man qualche tipo de potere grande o picio e che no i ghe ga da ai citadini i servizi che ghe speta de dirito.

E la solidarietà? Eser solidali vol dir eser pronti a darghe una man, come comunità de gente unida nel stato, ai maladi, ai veci, ai invalidi, a chi che, per una ragion o un'altra, xe povero, solo e disgrasià.

Dito questo, mi me par che i stati, no solo el nostro, i  se ga dimenticà del ruolo sociale. Le pensioni xe picie, i sindacati no i esisti, se vivi per lavorar invese de lavorar per viver, quei veci restadi o soli o sensa la comprension dei giovani de la sua famiglia ghe toca spetar ani prima de poder andar in ricovero.

Do che ti te volti, ti vedi che no se sburta la colaborasion, ma la concorensa, chi che lavora xe soto presion, i sui capi i xe soto presion, i capi dei capi i xe soto presion. Tuto in nome de quela famosa “crescita” che col stato sociale no la c'entra niente, ma la ga de far solo col profito. E poi creser e solo creser per l’omo no xe né normale, né naturale, se cresi fino a 20 o 25 ani e poi basta, creser tuto el tempo volesi dir diventar alti quatro metri a quarant ani, volesi dir diventar mostri.

El stato sociale el sta andando a remenego. Tanto per restar nela nostra Istria, i fioi i devi far liste chilometriche prima de poder farse l’aparato per i denti, in tuti i nostri loghi quasi niente xe conformà ai bisogni dei invalidi, i dotori e le infermiere i scampa via de l’ospedal de Pola, i genitori dei fioi andicapai i se senti soli e abandonai da le istituzioni. Chi che ga soldi, i va dai privati, con el stato che abdica colpevolmente.

De l’atra parte, da Salvore fin la costa de Fianona, el cemento la ga vinta o el fa de tuto per gaverla vinta sula natura, da Barbariga a Medolin i tira su case de vilegiatura sensa i permesi, a Pola i taia i alberi del Lungomare fasendo leva sui imbroi fati con la privatisasion de la fabrica cementi nei ani Novanta. Sempre più soldi ghe va in man de pochi, sempre de meno xe quei destinai per i interesi de tuti. E i tribunai e le ispezioni, ma anche la gran parte de la gente, de solito i se ciama fora.

No me piasi dir che una volta se stava meo, perché no xe né vero né giusto, una volta se moriva più giovani, i fioi de 10 ani i lavorava in miniera e no se gaveva el gabineto né la docia in casa, tanto per far qualche esempio. Ma xe sicuro che in sti ultimi tempi qualcossa xe andà storto, non rispetemo più, da tute e due le parti, el contrato sociale, se gavemo dimenticà che al centro del nostro interesse devi restar l’omo, ma no el singolo, ma l’omo in società, perché se mi stago ben e ti ti sta mal no xe benesere, ma ingiustizia. El stato esisti proprio per rimediar ale ingiustizie.

Saria ora de cambiar, no volessi trovarme un giorno nela situasion de dover operar un neo sensa anestesia.