LA SITUASION A POLA E ROVIGNO Piene de estate e svode de inverno

Un giorno de sta setimana son andada a far un giro a Pola. Me son dita: "Dai, metite bel a posto e va far un giro in cità a vedi cosa che sucedi e cosa che combina i citadini". Me son bel incincinada, me go meso i tacheti, me go sentà in auto e via per Pola.

Iera meio che no andavo. Che ve spiego la situasion. Per mi el più bel toco de Pola xe là de l’Arco dei Sergi. Me piasi meterme sentada su quele scalete che porta al "socialno" e oservar chi che pasa e cosa che sucedi. Prima, co iera verto el "Mecdonalz" in centro cità, me savevo cior el sceic de vaniglia e star là su quele scalete fin che lo bevevo. No so perchè ma me rilasa star là e vardar torno.

Insoma, per rivar al punto de quel che voio dir, in giro per Pola xe poca gente. E quela poca che xe la me par triste, solitaria e con poca voia. Si, son dacordo, el momento no xe de quei più bei e la rivo capir. Tempi duri, se podesi dir.

Un’altra roba che me ga meso tristesa xe i Giardini. Tuti quei alberi tajadi me ga fato impresion e me ga butà in pensier, me ga ricordà certe robe. Si, so che se ga scrito e parlado tanto de sti alberi, ma un conto xe co ti vedi la situasion de persona. Si, so anche che se podesi dir: "Ma che ricordi ti vol gaver ti dei Giardini che ti son giovane". Sarò anche giovane (son del ’77) rispeto a quei che xe nati nei ani '40, '50 o '60 e che dei Giardini ga el ricordo del primo amor nato soto a uno de quei alberi. Ma go dei ricordi. E i xe mii, e i val tanto quanto quei de chi che xe più vecio de mi.

Per dirne uno, ani fa co lavoravo in centro cità, l’unico posto de Pola dove che de estate trovavo un pò de aria fresca iera proprio ai Giardini. Co andavo a marenda, andavo a bevi el cafè solo che ai Giardini. Iera bel fresco con tuti quei alberi che me faseva ombra. Iera l’unico posto dove che se "respirava". E deso me domando: "Dove troverà la gente un pò de aria fresca de estate in centro cità?"

Ah si, me go dimenticado de dirve, a Pola son andada dopo le cinque de dopopranso. Per no pagar el parchegio...

Cedo la parola a Velan...

Fin a dicioto ani, fin che no son andà fora de casa, definitivamente, per tornar a Rovigno dopo 40 ani, con dimora fisa, go visù la situasion de svodo e pien. Rovigno svoda de inverno e piena de estate.

No me ricordo de gaver patì, più de tanto, de inverno ti trovavi sempre qualcosa de far, tuti faseva qualche sport: mi go fato canotagio e palanuoto. Fasevimo alenamento ne la piscina coverta de l'albergo a Monte. Se ti gavevi qualche ragazina iera ancora meio, no ti vedevi l'ora de andar in cine e spetar che se seri la luce e che vegni el scuro. La mejo posision iera la galeria del teatro Gandusio, quasi tuti i se trincerava in galeria con la ragasa. La cità iera svoda e le rive se impiniva co el cine serava, intorno a le dieci de sera. Se faseva due pasi e dopo a casa, magari due colpi de fliper o fin ale oto o nove de sera in Valdibora a giogar calcio balila.

Gavevo  un compagno, de soranome i lo ciamava Sova, giogavimo sempre in copia: lui in difesa mi in ataco, el iera un bon portier. Una partida la costava cinquanta para, iera quela moneda larga e grosa, la pesava e la serviva de geton: chi perdeva pagava la partida.

Te tocava andar a scuola, sveia a le sete, colasion e dopo su per via Carducci fin a la scola in alto. Mi no me ga mai piasù la scola, iero pigro e bastansa timidoto. Devo dir che no iero mona, studiavo con facilità e scrivevo anche meio ma sveiarme la matina no me andava. Co son rivà a Zagabria per studiar, i primi mesi dormivo fin oltra mesogiorno, go recuperà abondantemente, no gavevo l'obligo de sveiarme la matina, una vera festa. E pò iera neve e fredo e in leto se stava meio.

Gavevo la mia compagnia e de inverno se andava per i boschi in serca del logo per tirar su la "caseta". La grande pineta sora l'albergo Park la iera favolosa, la gaveva tuto. In primavera e autuno se andava a smanfarar per i orti e Rovigno la iera piena de orti con tuti i fruti del mondo. No se rubava, se smanfarava. Me ricordo che in prima elementare semo andadi a magnar le ciliegie su l'albero de la suocera de la nostra maestra. Ne ga tocà scampar e un de noi, per no farse ciapar, el gaveva lasà la borsa de scola soto l'albero. Per un mese no el se vegnù in clase per paura de la maestra che la gaveva sequestrà la borsa.

Co scominciava l'estate rivava i turisti e la riva la se impiniva. Ne piaseva oservar le machine parchegiade in Sotolatina: le Fiat, le Alfa Romeo, le Mercedes... Guardavimo sto ben de dio e fra de noi disevimo: "Co saremo grandi noi viageremo in elicotero". Iera socialismo e tuti viveva con l'idea sicura del progreso, el mondo andava avanti: la prima television, el primo frigorifero, la prima machina de lavar, la prima auto rivada in famia... el conceto de crisi non lo conosevimo, no savevimo cosa che vol dir.