OTTO MARZO E PENSIERI AMARI: La galassia dele done la gira ancora intorno a un sol mas’cio

Quela de l’oto marzo xe una data  interessante, la me ricorda quei striscioni dei traguardi che nele gare de ciclismo i sta a metà dela tapa: che quel passa soto per primo el ga vinto meʃa corsa, ma el ga ancora de pedalar per vinser la gara. Dito in parole che le ga più de far con la Giornata internazionale dela dona, se se acorgi che nel momento in cui se vol celebrar la conquista dela parità tra l’omo e la dona se se rendi anche conto che per stabilir raporti sociali de pari oportunità tra i sessi diferenti xe ancora sai strada de far.

Propio in tel’intervista che questo portal ga publicà ieri, la poetessa Roberta Razzi, notando che in tel mondo comanda ancora el patriarcato, rispondendo a una domanda sul feminismo fata dala nostra giornalista Martina Pereša, la ga risposto con parole de meter in cornise: „se la definission del feminismo xe la lota per i diriti dele done, e se consideremo che la dona xe un essere umano, alora vol dir che parlemo de diriti umani. Se le robe le sta cussì, alora si che son feminista. In tela nostra società le done le xe ancora pagade el 16 percento de meno dei omini per far el stesso lavor, ogni 10 minuti una dona la vien copada, el feminicidio el cressi ala enesima potenza in tuto el mondo...xe altro de dir?

Anche se la dona in tei ultimi 100 anni la ga rivà emanciparse ‘bastansa, anche se el feminismo el ga portà qualche risultato importante e anche se esisti casi de done al comando (anche dei governi), la vita de ogni giorno, i dati sule paghe, sule possibilità de far cariera, sula posizion de sotomission al’omo voluda da certe religioni, se devi concluder che la galassia dele done la gira ancora intorno a un sol mas’cio. E tropo spesso se ga ancora comprension per quei omini che i violenta le done, se li giustifica diʃendo – con tremenda ipocrisia – che la sola colpa che i ga avudò xe sta quela de esser cascai in tela tentassion de un diavolo (s)vestì de dona.

La prova lampante che el mondo el xe ancora in man al mas’cio se la sta in tel incrdibile numero de guere e violenze varie che le genera macerie, disgrassie e luti in mile loghi de sto nostro pianeta: ale donne no ghe ga mai piasso la spada, le ga sempre preferì la parola e la casa e se le comandassi lore – cussì scirveva la famosa giornalista italiana originaria de Pola Anna Maria Mori nel suo libro “Ciao maschi” – la Tera saria un logo de pase e la discussion l’arma per risolver i scontri. Ma saria un altro mondo.

L’oto marzo ne fa ricordar che la storia dele done la xe stada la storia de una lota per conquistarse una parte de protagonista sul palcoscenico dela vita. E xe una storia che la xe cominciada mal, soto la bandiera dela misoginia, con Pitagora che credeva che l’omo, come le regole e la luce, el iera nato da un “principio” bon; la dona, invesse, la saria stada creada da un “principio cativo”, quel del caos e dele tenebre scure.

Ma la reassion dele done la xe rivada. Nefertiti e Cleopatra prima, Maria Teresa e la regina Vittoria più tardi, le riva farse largo sfrutando certe regole (la nomina per voler dei dei o Dio) inventade dai mas’ci.  Poi, tanto per restar ai esempi de più peso, riva Olympia de Gouges che nel 1792 la scrivi la “Dichiarazione dei diritti della donna e della cittadina”, Simone de Beauvoir finalmente la presenta el “secondo sesso”, Anna Kuliscioff  la contrasta el “monopolio dell’uomo”. Proprio dopo queste batistrada, riva l’emancipazion con le femministe francesi Luce Irigaray e Antoniette Fouque. E poi xe le done che le se ga fato valer in tela scienza come Marie Curie e Rita Levi Montalcini, poi quele che le se ga fato rispetar in politica come Rosa Luxemburg, la Pasionaria, Golda Meir, Indira Ghandi e Margareth Thatcher. Ma bisogna essere onesti: a ‘ste done no ghe xe sta mai riconossù el carisma che el mondo ocidentale che dà ancora a Giulio Cesare, a Gesù Cristo, al papa o a Napoleon.

Che sta lota dele done la xe stada lunga e dificile xe dimostrado anche dal fato che fino al 1981 (40, no 400 anni fa) in Italia esisteva ancora la legge che permeteva el “matrimonio riparatore”: sta roba vol dir che l’omo che ‘l gaveva violentado una dona poi, per far sì che no la resti sola perché nissun gavessi volù ciorse e magari sposar una dona no più vergine, poi el doveva sposarla anche se ela no la voleva. Xe stada una dona siciliana, Viola Alcamo, che nel 1965 la se ga rifiutà de sposar l’omo che la gaveva violentada, che poi el iera fio de un mafioso. E fin el 1981 iera permesso anche el “delitto d’onore”: se un marì el scopriva che sua moglie lo tradissi, el gaveva dirito de coparla ela e ‘l suo amante per far salva la sua reputassion e onor.

Se nela percezion social l’omo el xe importante semplicemente perché el xe omo, per farse capir le done ghe ga sempre tocà spiegar e spiegarse. Eve Ensler la ga adiritura scrito un libro intitolato “I monologhi della vagina”, nato sula base de duecento interviste a done de tute le età, razze, professioni e classi sociali.

Anche nel mondo dela fantasia, dela mitologia antica e moderna le done dela leteratura, pur inventade e valorizade da artisti mas’ci, le xe qualche passo indrio dei mas’ci:  Elettra e Andromaca, Laura  de Petrarca, Angelica de Orlando, Madame Bovary e Anna Karenjina, ma ganche Lolita e Thelma e Luoise, in tel immaginario coletivo no le xe diventade come Ulisse, Amleto, Charlot. Gnanche come Indiana Jones o James Bond. Insoma, prima de Eva vien ancora sempre Adamo.

In definitiva, ghe volerà crear ancora sai opportunità per le donne per meter in pie un mondo de vere pari opportunità per la dona e l’omo.