Trieste la xe e la xe sempre stada bela, ma casa xe casa

Due setimane fa son andada a Trieste. Ma no in centro comerciale, quel che xe pena che ti rivi in Italia. Son andada proprio in centro cità. Me ga ciapà un momento de nostalgia e go voludo andar tai loghi che andavo una volta. In Corso Italia, vial XX setembre, piasa de la Borsa, Mercato coperto, Ponte rosso, bever el cafè in Cremcaffè in piasa Goldoni (in pie e svelto) e cusì via... Insoma, là che andavimo un pò tuti per comprarse de vistir e far la spesa.

Una volta andar a Trieste per mi iera un vero evento. Iera come andar in gita. No dormivo tuta la note per l'emosion. Pensavo a tute le robe bele che iera là e che qua de noi ti vedevi solo in television taliana. Quante robe bone de magnar che iera! Giravo per i scafai dei supermercati e no savevo cosa cior prima. Tuta una fila de merendine che prima de tornar a casa ti ne gavevi sa magnà un pacheto.

Per render la giornata ancora più nostalgica no son andada per la Ipsilon, ma go fato la strada vecia. Me go alsa su per Dignan, go afiancado Vale, go fato su e so pel Canal de Leme, son pasada per Medachi, poi San Lorenzo, Mompaderno, Civitani...Poi ga cominciado le serpentine de Visinada, Terre Bianche, Crassiza per rivar fin Buie, e poi l’ex confin. E si, deso ti pasi drito, no xe nisun che te domanda i documenti.

Ne xe servì un bel pò per rivar anche se per strada no iera trafico. Trenta-quaranta ani fa co se andava coi Fici, le Peglice o le Zastave 101 te serviva ancora de più. Ti te fermavi anche per strada a far el merendin coi panini che ti te portavi de casa involtisadi ne le salviete perchè la carta de aluminio costava de più.

Xe sta un vero salto nel pasato. E anche se iero sempre contenta de andar a Trieste, deso come una volta, co son tornada a casa iero ancora più contenta. Casa xe casa.

Cedo la parola a Velan...

A Trieste go lavorà per oltre venti ani, sempre come giornalista. Iera ani interesanti. La questura iera piena de stranieri che tentava de becar la residenza, code interminabili fin oltra el porton e in strada. I spetava ore. Mi gavevo el status de corispondente estero e qualche privilegio. I gaveva apena verto el Consolato de la Croazia, no quel de ogi in piasa Goldoni ma el primo che i lo gaveva meso in una via laterale de vial XX settembre, no so se iera via Paduina o via Brunner.

Xe sta a Trieste che go conosù el prof. Miroslav Bertoša che i lo gaveva nominà console generale. Penso che xe sta proprio Bertoša a trovar el palaso in piasa Goldoni, una bela casa quasi tacada al negozio de Primo Rovis Cremcaffè. El profesor el credeva ne la cultura e quindi el gaveva avià tuta una serie de serate culturali al terso pian del palaso: vegniva storici, scritori, pitori, musicisti, iera sai bel.

No iera facile far pasar roba croata a Trieste, ma Bertoša el gaveva ingranà la marcia giusta, le robe funsionava e la sala iera sempre cariga. Quel terso pian doveva diventar la sede del Centro culturale croato, ma la politica e la diplomazia non le xe mai rivade a tanto, tuto se ga fermà. I doveva firmar un acordo italo-croato de colaborasion culturale, ma no xe andà in porto.

In quei ani se parlava tanto de beni abandonadi (dei esuli), de la rinegoziazion de Osimo. L'Europa iera ancora lontana, el confin serviva per contrabando de armi, droga e soldi sporchi de la mafia. Ogni tanto rivava qualchedun de l'Istria per parlar de euroregione. I parlava, dopo se magnava, e sul tardi i tornava a casa.

La region Friuli Venezia Giulia e la Contea istriana le gaveva anche firmà un acordo de colaborasion, iera tuto un ciacolar e co ste ciacole mi me guadagnavo el pan. I fioi creseva e lavoro iera in abondansa: al giornal, a la RAI de Trieste, a Radio e TV Capodistria... mah, tuto pasa.

Ogi che gavemo l'euro e che semo entradi in zona Schengen Trieste xe tornada in auge per i presi de consumo, costa meno che in Istria. Tute ste ciacole e sto casin per tornar indrio de 60 ani quando che mia sia la me portava da Trieste le tiramole e i giornalini de Tex, Zagor, Topolino e l'Uomo mascherato...