Se ogi Smareglia fussi vivo, el ghe diria grazie a Bruno Flego

Stasera se inaugura la rinovada sala grande del teatro de Pola (i ga anche cambià le poltroncine e le sedie) e per l’ocaʃion el publico gaverà modo de veder l’opera “Nozze istriane” de Antonio Smareglia. Insoma, una roba fata con una certa logica: el teatro xe a Pola, domani xe el giorno dela Cità de Pola, Smareglia xe nato a Pola. Meno mal.

Epur, per tanto tempo, le robe le stava in modo diferente. Smareglia ga avù una vita ‘bastansa inverigolada e impegolada. Anche se el iera riconossù come el più bravo seguace de Wagner, però sensa copiar, ma con un’originalità tuta sua, Smareglia, Talian de cultura ma citadin austriaco, el xe sta ritegnù sempre tropo Talian dai Tedeschi e tropo Austriaco dai Taliani. E poi, el gaveva anche influenze slave da parte de sua mama. In sto modo, anche se le sue opere le xe stade eseguide al Teatro la Fenice de Venezia, a La Scala de Milano, a Vienna, a Praga, a Dresda e a New York, Smareglia de vivo no ‘l ga mai otegnù quel sucesso e quela stabilità finaziaria che ‘l se gavessi merità.

E poi, se sa, “nemo propheta in patria”. Anche se la sua opera “Nozze istriane” Smareglia la ga composta a Dignan nel 1894/95 (e a Dignan la xe anche ambientada) per vederla alestida a Pola, in tela cità in do’ che el iera nato, ghe ga tocà spetar ben 13 anni, fin al 1908. A Pola el ga avù modo de rivederla solo nel 1920, co' da Milano xe vegnù suo fio Mario per dirigerla. El dato curioso xe che prima de andar in teatro, quela volta le prove per l’opera le xe stade fate in tela sala grande in do’ che ogi xe el Circolo de Pola.

Co’ nel 1933 l’opera “Nozze istriane” la xe stada presentada in Arena, Smareglia iera morto xa da quatro ani. Dopo de quela volta, sarà solo el teatro Verdi de Trieste a meter in cartelon le “Nozze” nel 1946,  nel 1954 e nel 1973.

E a Pola? La cità nel 1947 la iera pasada ala Jugoslavia e Smareglia xe sta vitima dela politica culturale dela Jugoslavia socialista che la tendeva a far dimenticar tuto quel che iera capità sul teritorio prima del avento del “sol de l’avenir”. Le ecezioni iera poche: a Pola una strada la portava el nome de Smareglia e, solo nel 1960, le “Nozze istriane” le vegnerà presentade per la prima volta in tel teritorio ex jugoslavo, ma a Maribor e Fiume.  Per vederle a Pola, in Arena, bisognerà spetar fin al 1979.

Ma quel iera solo un episodio isolado, pochi a Pola saveva chi che iera Smareglia. E alora bisogna dir meno mal che Pola ga avù Bruno Flego. Mulo de via Medolin, giornalista de “La Voce del Popolo” dopo la guera, da grande combatente per i diriti dei lavoratori per sua scelta el xe andà a far l’operaio in tel cantier de Scoio. Ma l’intersse per la storia e la cultura dela sua sua cità no ghe dava paʃe. El xe sta tra i promotori del Centro de Ricerche Storiche de Rovigno e, con Ottavio Paoletić, fondator dela sezion storica del Circolo de Pola. Ghe bruʃava sai le ingiustizie che tante volte el denunciava publicamente in tela Voce del popolo. Me lo ricordo, tra la metà dei ani Otanta e la metà dei ani Novanta, che el vegniva in redassion portar quel che el gaveva scrito, el parlava col capo, a volte, in modo simpatico e degno de rispeto, el improvisava meʃe conferense stando in pie in meʃo dela redassion, el se smagnava e a mi el me dixeva “picio, no va ben, bisogna scriver de ste robe”.

Insoma, de fronte a quel che lui, riguardo al fato che Smareglia el iera sta sai trascurado a Pola, el definiva “assenteismo inqualificabile delle autorità”,  nel 1989 el se ga da de far. Prima el ga messo in pie quel che una volta se ciamava “gruppo di lavoro” al Circolo de Pola per rivalorizar Smareglia. De sto grupo fasseva parte anche Claudio Radin, Mirella Fonio, Mario Stocco, Mario Quaranta e Arnaldo Milovan. Poi, Flego ga coinvolto – trovando una porta spalancada –  anche el diretor dela Biblioteca scientifica de Pola Boro Sipanović, cussì che xa el 14 aprile 1989 xe stada alestida in Circolo a Pola una mostra sulla vita e l’arte de Smareglia con materali fornidi dalla Biblioteca scientifica, dal CRS e dal Circolo de Dignan. Bruno el iera anche andà del diretor del Centro de Ricerche storiche de Rovigno Giovanni Radossi e xa nel 1990 xe stada publicada la testi de laurea de Edoardo Perpich “Il teatro musicale di Antonio Smareglia”, primo libro dedicato a Smareglia publicado in Istria.

In queel prime iniziative Bruno Flego el gaveva coinvolto, trovando una grande disponibità, anche la Gorka Ostojić Cvajer che in quel momento la iera la diretrice de teatro de Pola, Attilio Krizmanić, l’architeto e urbanista del Comun che ‘l ga el merito de gaver avù l’idea – e la poʃission per farlo –  de trasformar el pianteren de la casa in do’ che Smareglia iera nato (ex via Nettuno, oggi parte de Foro) in “stanza memoriale”. Quela sala la xe stada verta uficialmente nel 2004 e dentro, tra le tante robe, oltre ale donazioni de robe apartegnude al maestro da parte dei sui nipoti Adua Rigotti Smareglia e Silvano Smareglia, xe anche un quadro (ritratto) de Smareglia fato da Gualtiero Mocenni (Polesan vissudo tanti a Milano) e un busto de Smareglia, opera de l’artista Alfredo Sficco, nato a Pola e morto a Torino. La maschera in bronzo sula lapide vicin la porta de ingresso la ga modelada l'artista polesan Bojan Šumonja.

Insoma, se ogi Smareglia fussi vivo, de sicuro a Bruno Flego, morto nel 2003, el ghe diria grazie.