El Patinagio de Pola el xe tornà a nova vita

El vecio Patinagio xe tornà a nova vita. Venerdì, dopo un per de anni de lavori, xe sta inaugurà el complesso sportivo (la parte che riguarda la palestra) che uficialmente el se ciama Mirna, finalmente restaurà. Questa xe una bela nova per i sportivi de oggi, ma anche per le tante generazioni de polesani che in quel posto i ga passado una parte de la propria gioventù. E magari i ga trovà anche el primo amor.

La storia del patinagio a Pola la xe sai più vecia de quel che se poderia pensar. I primi patini a rodele i gaveva comincià a conquistar la cità xa nei ultimi ani del'Otocento, co a Pola comandava ancora l'Austria. E ai primi del Novecento de piste ghe ne iera ‘diritura tre: l'Excelsior, el Campo Malusà e la Minerva.

El Campo Malusà el stava drio la Rena, sul teren che oggi xe un parcheggio (prima un magasin de legame, se non me ricordo mal), tra le via Drio l’Arena e Faveria. Nel dicembre del 1913 el signor Malusà el gaveva fato far una pista de 840 metri quadrati, con spogliatoi, buffet, guardaroba per signore e signori. No podeva mancar la cassa indò vender biglieti. De la Minerva, invesse, savemo che la vegniva usada ancora in tel magio del 1920, co sul giornal L'Azione vigniva reclamisai concerti sia ala Minerva (che no dirve indò che la iera) che al Patinagio Excelsior che el iera sta verto el 25 luglio del 1914.

Patinar iera una vera mania dei polesani. Se trova tante testimonianse, specie in tei giornai dei esuli. I più bravi i fasseva piroete e acrobazie, tra i aplausi del publico, i principianti i finiva sai volte con... le braghe e le cotole per tera. E quei che no gaveva i soldi per pagar le patinade sule piste i se rangiava patinando sui passagi ‘sfaltai del Mercato Coperto e quei rente le scole.

Anche i botegheri i gaveva capì che coi patini se podeva far afari. La che ogi xe quela specie de bazar dei casoti de bar, boteghe de strasse, ćevabdžinice e magantica varia i vendeva patini de fero, baliniere, spighete e fasse per protegerse i xinoci. La passion per le acrobassie la gaveva fata vegnir anche el Circo Kudsky e ‘l Tobogàn de via Sissano.

Ma al Patinagio no se andava soltanto per patinar. Se andava anche per incontrar i amici, vardar le mule, farse vardar e farse le bele. No per gnente una vecia canson polesana la disi: «Al Patinagio ghe piasi andar, mule e putele per farse basar...». Una canson che no la xe stada dimenticada, i la canta ancora quei dela Lino Mariani, el coro Carillon del Circolo e anche Lidija Percan, che i polesani pronuncia Persan.

Una de le più bele mule che le andava al Patinagio in un certo momento iera Ginetta Brandaglia. Alta, mora, elegante, coi vestitini curti e volant, la fasseva de quele piroete che la incantava tuti. Sua cugina Brunetta la iera un poco invidiosa, ma anche ela la saveva provar l’emossion del volo, solo no sui patini: la se butava xo de la Grota dei Colombi con una vecia ombrela verta, sperando de cascar in mar più pian che le grote le xe alte e sbater svelti su l’acqua se se pol far anche bastansa mal.

Xe sta momenti co el Patinagio el iera un centro sportivo conossudo a livel nazionale. In tel 1922 l'Hockey Club Polese el gaveva conquistà el titolo de campion d'Italia. E tra le società de quei tempi ghe iera anche la Gennaro Angelomé, dedicada a hockey e al patinagio a rodele, con sede in via Carlo Defranceschi 14. Anche in tei Anni Settanta e Ottanta, prima dela costruzion del Palazzetto dello Sport a Veruda, el Patinagio el iera conossù anche sai fora de Pola perché dentro bateva i bocseri de Pola, compreso l’ex campion del mondo dei pesi mediomassimi Mate Parlov, che i iera tra i più bravi in tuta la Jugoslavia.

E chi no se ricorda de Michael e Nadia Weidlich, ogi sepolti in tela piramide che la sta ‘pena che se riva dentro a Monte Giro, che per tanti anni i ghe ga insegnà ai putei e a le putele de Pola a star sui patini, a far piroete e a no aver paura de cascar?

Dopo xe vignudi altri sport: la palacanestro con l’Istragrađevno prima e Gradine poi, la palavolo, i campionati de basket dele scole, le esibizioni de patinagio artistico e le indimenticabili gitarijade, co i giovani polesani i ghe presentava ai sui coetanei quel che i saveva far con chitare eletriche, basso, tamburo e un microfono in man.

Al Patinagio se fasseva ogni tanto anche concerti rock, me ricordo de uno, me par in tel 1982, co gaveva sonà insieme i Film de Zagabria e i Idoli de Belgrado. Tuti do’ sti grupi poi i xe diventai tra i più grandi del rock Jugoslavo, mi me gavevo procurà anche l’audiocasseta e co studiavo a Padova i miei amici italiani, che mai prima i gaveva conossù gruppi rock jugoslavi, i xe diventai mati per i Film e Idoli. La musica de sti grupi jugoslavi iera l’unica che la podeva interomper la nenia del reggae che la fasseva de colonna sonora a tute le feste in odor de centro sociale.

Nel 2015 el Museo storico e navale de l'Istria el ghe ga dedicado al Patinagio perfin una mostra e un catalogo de 132 pagine, curado da Katarina Marić. Segno che no se trata soltanto de una vecia pista sportiva, ma de un toco importante de la memoria de la nostra cità.

Con sto ultimo restauro i ga refà el teto che ‘l spandeva, i parcheti dela palestra, i spogliatoi e le luci. E i ga messo anche segiolini novi per i spetatori. Desso al Patinagio tuto quel che non ga de far con el… patinagio el slusi, ma speremo che se troverà i schei anche per una seconda fase de restauro, per meter a posto i esterni, indò che, sula pista per patinar, iera comincià tuto più de 112 anni fa…