DALE SPUDACERE IN MERCATO AI MONTI SE SCOVASSE A CASTION: La nostra coscienza ecologica la xe stada sempre "far poco e far mal"

La storia de l'omo xe anche la storia de le sue scovasse. E sti gioni le scovasse xe uno dei temi politici più caldi, sia in Istria, sia in tuta la Croazia.

Da quando che esistemo, gavemo sempre magnà, consumà, sporcà e butà via qualcossa. Quel che xe cambià nei secoli xe el modo de liberarse de quel che no ne servi più. Ma prima de parlar de le scovasse, ve voio ricordar do curiosità che ne fa capir quanto che xe cambiade le nostre abitudini "ecologiche". Nel 1903, co a Pola i ga verto el novo mercato coperto, tra le lamentele de certi citadini iera anche quela che mancava le spudacere. Sì, gavè leto ben: le spudacere! A quei tempi spudar in publico iera una roba normale, ma xa spudar per tera davanti a i altri no iera bel. Insoma, in un mondo ancora salvadigo anche una scifosa spudacera la rapresentava una “presa di coscienza ecologica”.

La xe andada per le longhe, basti pensar che fin ai primi ani Setanta, in tele coriere se trovava ancora avisi che diseva “Vietato sputare sul pavimento”. Ogi una scrita del genere la ne faria rider, ma quela volta evidentemente ghe iera ancora bisogno de ricordarghe ai passegeri una roba che adesso ne par normale.

Con le scovasse xe capità una roba simile. Basta dir che una volta iera normale veder gente butar per tera carte de bonboni, ciche, fiasche svode…

Ma xe de dir anche un’altra roba. Una volta se consumava sai meno. Le robe se le riparava, se le adoerava de novo, se le passava de una generassion a l'altra. Le scovasse de cusina ghe se le dava ale bestie, la carta se brusava, le fiasche se le salvava, el nailon de late de lo taiava e se lo meteva in cassetin perché un giorno el gavessi podù servir. No iera un paradiso ecologico, ma la quantità de scovasse la iera incomparabilmente più picia de quela de ogi.

Po' xe rivà el benesser, i supermercati, la plastica, i imbalagi, le robe usa e getta. E insieme a tute ste comodità xe rivade montagne de scovasse. E, per farla curta, dai vasi delle scovasse grigi e generici, con el cresser dei movimenti ecologisti, semo rivai ala racolta diferenziada. Gavemo imparà a separar la carta, el vetro, la plastica, el metal e el resto. Ne se ga spiegà che le scovasse non le xe tute precise, che una parte se pol recuperar e che quel che resta bisogna tratarlo in maniera da far meno dano possibile a l'ambiente.

Ma anca dopo gaver separà carta, vetro, plastica e tuto quel che se pol recuperar, resta sempre una quantità de scovasse che bisogna smaltir in qualche maniera. E qua vien fora un altro problema: dove meterle e come tratarle senza rovinar l'ambiente e la vita dela gente? Proprio par risolver questo problema, in Istria i ga deciso de costruir el centro de Castion. 

Castion doveva esser la solussion moderna al problema de le scovasse de l'Istria. No una semplice discarica dove butar tuto in un buso, ma un centro tecnologico bon de ricever i rifiuti urbani, separar mecanicamente quel che se podeva recuperar e tratar biologicamente la parte organica.

Ma ghe xe un'altra roba importante che no bisogna dimenticar. Castion no doveva soltanto ricever e tratar le scovasse de l'Istria. El progetto prevedeva anche de ricavar energia dale scovasse. El gas prodotto dalla decomposission de la parte organica doveva esser ingrumà e utilizzà par produr eletricità. E una parte de le scovasse doveva vegnir trasformada in combustibile da utilizar in altri impianti. Insoma, quel che prima iera solo un problema ecologico  doveva diventar, almeno in parte, una risorsa.

Invesse le robe le xe andade storte. A Castion da tuta l’Istria riva sai più scovasse de quel che el riva smaltir e de produssion de energia gnanche l’ombra. Ma i sbagli i xe stai fati ancora prima.

El primo sbaglio xe stà la scelta del logo. Invesse de meterlo in una zona poco abitada de l'Istria interna, indò che xe più logo e magari indò che se gavaria podù abinar al centro anca una centrale solare, i ga scelto proprio uno dei tochi de tera più streti dela penisola, a sud, indò che l’Istria la se strensi sempre de più verso Punta Promontore, vicin a Pola, Valsabbion, Vincural, Pomer, Bagnole, Promontore e Medolin. Una zona indò che i venti i pol portar in do e do quatro la spussa verso i centri abitadi e dove che el turismo, che mal el se concilia con l’aria spussolente, el xe diventà una dele principali fonti de guadagno. Insoma, i ga messo un centro de scovasse proprio dove la gente vien in vacanza par respirar aria bona.

El secondo sbaglio xe stà la scelta dela tecnologia. A Castion i ga messo su un impianto che, lavorando le scovasse, el produci anche un combustibile che podaria servir per becar eletricità o calor. Ma el centro no xe in grado de utilisarlo ma el devi mandar quel combustibile in altri impianti, per esempio nei cementifici. E se nissun lo ritira, el resta là e ‘l continua a ingrumarse. Xe proprio quel che xe successo a Castion, dove che col tempo se ga ingrumà decine de migliaia de tonelade de combustibile che no se sa dove mandar.

Epur nel mondo ghe xe esempi de come che le robe se le pol far diversamente e come che Dio comanda. Bastava copiar dei altri. A Copenaghen prima i fa la racolta diferenziada, separando carta, vetro, plastica e altri materiali che se pol recuperar. Quel che resta vien portà in un termovalorizator, dove che i lo brusa par produr eletricità e calor par riscaldar le case. E sora el teto de sto impianto i ga fato perfina una pista de sci!

A Viena un impianto simile riscalda decine de migliaia de case tanto che el xe diventà anca una curiosità turistica. A Singapore i ga un sistema che combina el tratamento de le scovasse con quel de le aque sporche par recuperar materiali e energia.

No ocori andar fin in Danimarca o Singapore par trovar altri esempi de come che se dovessi far le robe. A Lubiana, i ga fato un centro che adopera una tecnologia simile a quela de Castion. Anca là i separa le scovasse, i recupera materiai e produci combustibile. Ma i sfruta anche el biogas par far eletricità e calor, come che se doveva far anche a Castion. Solo che qua, dopo oto ani de atività, la produssion de eletricità dal biogas no risulta ancora in funsion. A fine setembre xe stada la stessa diretrice de Castion a dichiarar che el gas ingrumà el vegnirà utilizzà par produr eletricità in una fase sucessiva. Insoma, quel che i gaveva previsto fin dal principio, dopo oto ani i lo devi ancora meter in pratica.

In Italia, a Bolzano, dal 2013 i ga un termovalorizator che ‘l servi 116 comuni. Prima i fa la racolta diferenziada e quel che resta el vien portà al impianto, dove che i lo brusa par produr eletricità e calor. Ogni ano i ricava circa 90 milioni de chilowattora de eletricità e 129 milioni de chilowattora de calor, che vien utilizzà par riscaldar le case de Bolzano. Insoma, le scovasse che no se pol recuperar le diventa almeno una fonte de energia, invessee de trasformarse in montagne inquinanti come a Castion.

Ma l'esempio più interessante lo gavemo proprio davanti casa, a Trieste. Là, xa dal 2000, i ga un termovalorizator che brusa le scovasse restade dopo la racolta diferenziada e i produci eletricità. Vien spontaneo domandarse: co i ga progettà Castion, i xe andadi almeno a Trieste a veder come che i fa?

Sta setimana el sindaco de Pola, Peđa Grbin, el ghe ga domandà scusa ai citadini e ‘l ga dito che no el xe contrario a serar Castion, purché se trovi dove mandar le scovasse e che le spese no le caschi solo su Pola. Anche el presidente dela Region, Boris Miletić, el ga dito che, se Pola decidi de serarlo, lui el sarà d'acordo. Intanto i ga deciso de cercar, entro sei mesi, possibili posti per un novo centro. Ma trovar el posto xe una roba, tiralo su xe un'altra, e ghe volerà ani. Speremo che sta volta i fassi le robe con più giudissio, perché de scuse no se respira aria bona. E Castion, come che el xe adesso, el Castion del “femo qualcossa ma femolo mal”, el ne riporta ai tempi dele spudacere.