DE L'INVERNO SEMO FORA, RIVA EL BEL TEMPO E a voi, ve piasi andar per sparisi?

Xe un proverbio popolare che disi: La Candelora se la vien con sol e bora de l'inverno semo fora, se la vien con piova e vento de l'inverno semo drento.

La Candelora, che la casca el 2 de febraio, xe una festa religiosa cristiana che equival a la presentasion al Tempio de Gesù. Per scurtar la storia, 40 giorni dopo che iera nato Gesù, Maria e Giuseppe i lo ga portado al Tempio de Gerusaleme per “ofrirghelo” a Dio. Sta roba se faseva per tutti i fioi masci primogeniti e in questa data vigniva benedide le candele. Per questo sto giorno se ciama Candelora.

Ma, el giorno de la Candelora ga anche un significato popolare. El mostra la fine de l’inverno. I contadini, per esempio, i stava sai tenti del tempo che iera el 2 de febraio, pria dei campi. Se el 2 de febraio xe bel tempo alora semo vicini a la fine de l’inverno e se avicinemo a la primavera. Se, invese, xe bruto tempo alora ghe vol ancora per la fine de l’inverno.

Saria come per i americani e i canadesi che i speta el giorno de la marmota (anche per lori el 2 de febraio) per vedi quanto che ghe resta ancora de l’inverno. Solo che lori ga l’incontrario; se la marmota vien fora del suo rifugio e no la riva vedi la sua ombra perchè xe bruto tempo alora l’inverno finirà presto, se, invese, la riva vedi la sua ombra perchè xe una bela giornata de sol alora l’inverno ghe durerà ancora sei setimane.

Mi stago tenta ogni 2 febraio che tempo che xe perchè pena speto che vegni la primavera. Speto de cavarme i giuboti grosi, stivai, sciarpe, guanti e barete... e andà per campagne a grumar sparisi...

Alora, che ve digo, sto 2 febraio iera bel tempo. Iera un bel giorno de sol. Vol dir che semo praticamente fora de l’inverno. E se vedi che xe cusì. Iera xa un pò de giorni de bele giornate col sol de mesogiorno che te scalda i osi.

Me sa che me vedarè presto che giro per le campagne de Galisan che grumo sparisi. Pena speto de farme una bona fritada...

Cedo la parola a Velan...

Co son a Rovigno me piasi girar le campagne in bicicleta. Giorni fa iero fin in Valalta: lungo la strada xe tera coltivada e tera urbanisada, le casete de una volta tirade su per tegnir vanghe, saponi e rastrei le xe diventate pizerie e ristoranti.

In primavera podaria anche ingrumar sparisi, ma sinceramente no me interesa. Xe tuto tera privatisada, ogni cinquanta metri un porton, fil de fero dapertuto, tabele con su scrito "PROPRIETÀ PRIVATA". Valalta xe tropo bela per restar quel che la iera, tera de contadini. Go fato un salto anche in val Saline: anche là xe tuto privatisà, i ga costrui un vilagio turistico.

Per gustar i sparisi ghe vol un pò de libertà e alora, co riva la stagion, vado in auto fin ai vilagi de oltre la Draga, là son tranquilo, xe la tera de mio nono e de mia nona, no in senso de proprietà privata, nel senso, che lori i xe de là e mi per questo me sento a casa mia. Certo, anche Rovigno xe casa mia ma qua se trata che stemo perdendo spasio e anche tempo, no ghe apartenemo con l'anima, non so come spiegarme, la cità sta diventando straniera, almeno per mi.

Comunque per chi che ghe piasi andar in bicicleta, la cità te ofri chilometri e chilometri de strade e stradine. Qualche volta pedalo lungo i binari de la vecia ferovia Rovigno-Canfanaro, la farata la xe diventada pista ciclabile, ti pol arivar fin a Canfanaro. Me stago preparando, son xa rivà a Vila de Rovigno. Apena che farà un pò più de caldo pedalerò fin a Canfanaro, bel toco de strada. Volendo, ti pol anche ingrumar sparisi in completa libertà, la ferovia xe posto publico, garantido de la lege.