DISEME VOI: xe giusto perder el lavor per no gaver volù meter un per de spighi de ananas sula pizza?

Cara gente e tuti voi che ogni sabato legè sta nostra rubricheta in dialeto: ogi me serviria el vostro aiuto per risolver una question de grande importansa internazional. Una question che la podaria divider fameie, rovinar amicissie e provocar incidenti diplomatici tra Italia e Australia. Diseme voi: xe giusto licensiar un pizzaiolo italian perché el se rifiuta de meter l'ananas sora la pizza?

Xe capità per vero, a Brisbane, in Australia. Davide Tamburella, un cogo italian, el se ga rifiutà de preparar una pizza con prosciuto e ananas, disendo che quel abinamento el iera un'ofesa ala sua cultura. E no ier la prima volta: al paron el ghe gaveva xa dito de no altre due volte. Insoma, no se meti ananas sula pizza! Saria come meter suchero in tela salata o Nutella sul tonno in scatola.

Ala fin i lo ga licensià. Precisemo, per coretessa, che el ristorante ghe contestava anche altri comportamenti professionai e che la commission australiana del lavor la ga respinto el suo ricorso perché presentà in ritardo, sensa dir el licensiamento el iera merità per lege o no.

Ma lassemo star le complicassioni de tribunal e vedemo de risolver la question fondamental: chi gaveva ragion?

Prima possibilità: ga ragion el paron.

El ristorante el xe suo, i clienti paga e ‘l pizzaiolo el beca la paga per preparar quel che ghe vien ordinà e che xe legale. In alre parole, el gavessi tuto el dirito de dir “mi no cusino i bisi ala morfina e i gnochi al marijuana”.  Ma, se un australian el vol l'ananas sora la pizza, ghe se meti l'ananas. Se doman el pretendi fragole, banane e una sprussada de marmelada, eventualmente se discuterà del presso. El dipendente no pol trasformar ogni ordinassion in un referendum sulla civiltà e sula cusina occidental.

Se no, imaginemo un barista che el se rifiuta de preparar el capuccino dopo mesogiorno, opur un cogo che no ‘l servi la pasta col ketchup perché ghe provoca soferense spirituai. A quel punto, più che un ristorante, gavessimo un tribunal dell'Inquisission gastronomica.

Seconda possibilità: ga ragion el pizzaiolo.

Xe principi che no se pol vender per un posto de lavor e una paga. La pizza no xe un semplice disco de pasta sora del qual svodar tuto quel che se ga in tel frigo.  La pizza xe cultura, storia, identità.

‘Diritura, dal 2017 l'UNESCO riconossi l'arte del pizzaiuolo napoletan come patrimonio cultural immaterial dell'umanità. Atension: xe tutelada l'arte, no ogni singola riceta. Ma questo no ne vieta de considerar l'ananas una provocassion ai limiti de l'oltragio.

Secondo sta interpretassion, el paron, invesse del licensiarlo, el gaveria dovù ringrassiar Tamburella per gaverghе risparmià la bruta figura de cometer un crimine contro el bon gusto. Magari darghe una medaia, aumentarghe la paga e tacar sul porta un cartel: «Qua l'ananas el va solo in tela macedonia. Grassie, Tamburella».

E pensè ala vergogna scampada per un pel: cossa gavaria dito i napoletani, i antenati, le generassioni de pizzaioli che ga passà la vita davanti al forno sensa mai brostolar una sola pizza con un solo spigo de ananas?

Tersa possibilità: ga ragion i australiani.

E qua la facenda la se complica, perché la storia dela cusina la xe specialmene una storia de incontri, contaminassioni e ingredienti che qualchedun, de prinicipio, el gavaria de sicuro vardà con sospeto.

Cioghemo el pomodoro. El xe rivà in Europa dale Americhe in tel Cinquecento. Prima de quela volta, la pizza col pomodoro no la podeva esister. Imaginè un pizzaiolo de qualche secolo fa che protesta: «Sora la mia pasta quel fruto stranier no lo meterè mai!».

Sì, qualchedun podaria obietar: ma quala pizza in tel Cinquecento, se la tradission la ne conta che la pizza Margherita la xe nata solo nel 1889, co el pizzaiolo Raffaele Esposito el la ga preparada in onor dela regina Margherita de Savoia?

In realtà, bisogna precisar che le pizze le esisteva xa da secoli. La parola «pizza» la compari in documenti medievali e a Napoli, ben prima del 1889, se preparava pizze condide con oio, aio, formaio, sardoni (che saria acciughe) e, più avanti, anche pomodoro. Xa in tel Otocento iera conosciude preparassioni con mozzarella e basilico. La famosa storia dela regina la riguarda la consacrassion de una particolar pizza, la Margherita, no la nascita dela pizza stessa.

Insoma, se qualchedun gavessi proibì per principio de meter el pomodoro sora de qui antichi dischi de pasta, ogi forsi no gavessimo gnanche la Margherita. E magari qualche scalmanà el saria ancora là a protestar davanti ale pizzerie contro l'invasion dei pomodori americani.

Ma pensemo anche ale patate, anche lore rivade dale Americhe. Ogi saria dificile imaginar la cusina istriana sensa patate, epur per secoli i nostri antenati i cusina de magnar tranquillamente sensa usarle

E cossa dir dela pasta ala carbonara? Ogi basta nominar la panna per risciar la scomunica, e pur le anche le sue ricete le xe cambiade in tel tempo.

Insoma, se tuti i coghi dela storia i gavessi rifiutà qualsiasi ingrediente novo, quasi de sicuro ogi magnassimo ancora le stesse quatro robe dei nostri trisavoli.

Ghe xe poi un particolar divertente: el Queensland, indò xe s’cioapda sta baraonda, xe una dele grandi regioni australiane produtrici de ananas. Insoma, Tamburella el xe andà praticamente in tela patria dell'ananas a dichiararghe guera all'ananas. Un poco come vegnir in Istria e proibir l'oio de oliva.

E alora, cari letori, a voi l’ardua sentensa. El paron pol pretender una pizza con l'ananas perché xe lui che paga? El pizzaiolo ga el dirito de difender la propria cultura, anche a costo de perder el lavor? Opur bisogna acetar che i gusti cambia e che la cusina no xe un museo?

Mi no me pronuncio. Una roba però la xe sicura: per una feta de ananas xe svolà via un posto de lavor. E pensar che de solito le barufe per una pizza se le fa solo co xe del pagar el conto.