I STRUMENTI MUSICAI IN TEI AFRESCHI ISTRIANI: Dala sua valigeta Dario Marušić el ga tirà fora tuta la magia dela musica

Poco tempo fa go scrito el testo de una canzon in dialeto e ogni tanto la sento perfìn in radio. Co capita robe del genere, uno comincia magari a montarse la testa, a pensare de saver e de capir qualcossa de musica. Anche se, come nel mio caso, pur gavendoghe scoltada tanta, no la ga mai studiada.

Ma co se incontra o se ga de far con el geniale etnomusicologo (e tanto altro) Dario Marušić, se in do e do quatro se torna a far un bagno de realtà e tute le ilusioni de capir qualcossa de musica, di fronte ala granda statura del musicista, sonador, compositor, ricercator e (ri)costrutor de strumenti musicai (anche no più esistenti, specialmente in legno) Dario Marušić le se squaia come neve al sol.

Digo sta roba perché quel che Marušić ga dimostrà ala presentazion del suo libro Musica Affrescata, nella Galleria Vincent da Castua del teatro de Pola, no xe solo una conoscenza impressionante della musica. Xe un universo de sapere, passion, entusiasmo e anni e anni de ricerca, che va dalla teoria musical alla storia degli strumenti, dale scale e dai intervai a l'intonassion, dai sistemi temperadi a quei non temperadi, dale regole dell'armonia ale particolarità dele tradizioni musicali popolari. L’altra sera Dario el ga parlà, el ga cantà in varie lingua, el ga sonà strumenti etnopopolari ch'el tirava fora da una sua valigeta che la pareva quela de un mago. E la magia iera quela del sentir… tuto un’altra musica.

Co Dario parla no 'l dà mai l'impression de voler far maravea dela sua granda erudizion. Anzi, el ga la capacità, rara, de trasformar una spiegazion tecnica in una storia che la incuriosissi anche chi, come mi, de musica sa poco o niente.

Anche con sto libro Marušić el ga continuà quela su battaglia cultural che ‘l porta avanti da anni: quella contro i miti delle presunte origini esclusivamente autoctone delle nostre tradizioni, dale casite (kažuni) a Colmo paese più picio del mondo per ‘rivar, in campo antropologico, social, ma anche politico, ai nazionalismi esclusivisti che in Istria i xe del tuto sfasai: ”mi son al 100% sloven, al 100% croato e al 100% italian” el ga dito una volta in un’intervista.

Dario Marušić l'altra sera el ga spiegà ben che la gran parte degli strumenti che ogi consideremo tipicamente istriani i ga origini lontanissime. Quasi tuti i riva da l'area persiana, passando per la Turchia e i Balcani, opur per l'Africa e poi su in un tel Mediterraneo rivando a noi dala Spagna, la Germania (parte de l’Istria la ga fato parte per quasi mile ani del Sacro Romano Impero, che 'l ga cessà de esister nel 1806) e l'Italia (parte de l’Istria la xe stada soto Venezia), sensa mai finir de trasformarse co i passava da un logo a l’altro. Ogni popolo li ga adotai, modificai, adatai ale sue esigense e sensibilità. E proprio da questi incontri e variazioni xe nate quelle particolarità che ogi riconossemo come nostre.

Le roženice (o sopele, supiele), che le xe diventade uno dei simboli della tradizion musical istriana, le xe un esempio significativo. Marušić le ga definite un «fossile vivente», questo perché le xe restade quasi come che le iera co, 500 anni fa, le xe rivade come strumento tedesco: quel strumento in tel nord Europa col tempo el se ga trasformà in oboe e corno, qua el xe restà quasi preciso, che quel che ‘l iera co el xe rivà.

Saria de dir anche altre robe, come quela che in Istria dopo el 1946, per dimostrar la croaticità dela penisola, se ga fato diventar strumenti autoctoni “istrocroati” anche strumenti che i gaveva un’altra origine ma che i vegniva usai per lo più dai croati de l’Istria. Ma ormai xe acqua passada, me interessa sai de più nominar robe preziose.

Eh sì, perché el libro Musica Affrescata el ne ga fato scoprir due gioiei: uno xe Dario, con el suo grando sapere e la sua voia de condividerlo tanto che el se ga emossionà fin le lagrime co ‘l se ga ricordà de un suo maestro ch’el gaveva dito che la richessa più grande xe co se convidi el sapere.

El secondo gioiel xe la riscoperta de un patrimonio che gavemo sotto i oci, ma che spesso no savemo guardar: i strumenti musicai raffigurai in tei afreschi delle nostre cese. El libro Musica Affrescata el ne ‘compagna in un viagio ‘traverso le piture murali medievali, fate specialmente nel Trecento e in tel Quattrocento, co l'arte gotica e tardogotica la ga lassà in tele cese istriane testimonianze straordinarie dela vita musicale del tempo: organi portatili, liuti, arpe, tamburei, trombe, vielle, salteri e tanti altri strumenti che ogi magari conossemo solo per nome i ne torna a parlar da quei muri piturai. E no se trata de pochi esempi isoladi. In tel libro xe stada stampada una carta dell'Istria con informazioni su oltre sessanta cese che le conserva piture murali con scene de musica.

Per questa ragion me sento de finir sto articolo dandove un consiglio: andè al castel Pola, al Museo storico e navale dell'Istria, domandeghe de darve una copia del libro (el xe gratis e scrito in croato, sloven e italian) e feve qualche bela gita fin Vale, Gimin, o Visinada o indò che volè voi, in una dele 15 località istriane con afreschi che rapresenta i strumenti de una volta, a scoprir sto nostro patrimonio. E felo ricordando la lession che ne ga dà Dario Marušić: la nostra identità cultural no la diventa più povera anche savendo che le sue radise no le xe qua, ma sai più lontan. Al contrario, la diventa più rica.