Legendo se impara sempre qualcosa e l’altro giorno go leto che el condutor radiofonico american Bob Edwards el gavessi dito che co el famoso re Salomone (vissù tremila anni fa), simbolo de virtù e saggezza, el gaveva sentenzià che ghe xe un tempo e ghe xe un logo per ogni roba, no ‘l gaveva tegnù in mente el problema del trovar parchegio per l’auto.
Qua de noi, in tela nostra picia Istria, per tanto tempo el parchegio no iera sta un problema. Casaomai, iera caligo trovar posto co se andava a l’estero. Me ricordo de un tipo mato per la guida ma che no ‘l voleva mai andar a Trieste con l’auto proprio perché el gaveva paura de no trovar dove lassar l’auto.
Desso anche de noi la xe grave, specie d’estate co vien i turisti. E ala smagna de no trovar un posto vien ‘giungerse la paura de no esser sicuri de gaver lassà l’auto in tel posto giusto e de magari ritrovarse con una multa.
Insoma, prima che dele guere, de la morte dele ideologie, del problema te gaver mile amici u Feisbuc ma de no poder vederghene gnanche uno dal vivo per setimane, riva el problema del parchegio. Basta veder i comenti in tei social network ogni volta che se nomina i parchegi. A mi, co li legio, me par de veder i comentatori con una manera in man fin che ghe sbuffa spiferi de aria fora del naso, come in tei cartoni animati.
Questa xe una dele mile prove che la gente la xe in primo logo interessada a se stessa, a quel che ghe capita in scarsela, in corte e nel giro più streto possibile intorno a casa sua o torno el logo indo’ che se lavora.
Me ricordo che con el giornalismo el xe passado su internet, ormai più de un quarto de secolo fa, xe sta possibile contar per la prima volta in tela storia quanta gente che legeva ogni singolo articolo. E xe sta el “crepuscolo degli Dei”. Xe vegnudo fora che tui quei che iera consideradi grandi firme (e ben pagade) e che i scriveva de geopolitica, dela fame in tel mondo, de “destra”, de “sinistra” o de cultura, i iera sai meno leti de quei (considerai de serie B) che i scriveva dei pressi al mercato, de boteghe che se verzi o de boteghe che se sera, del costo dela luce, del gas e dela coriera. E, naturalmente, de parchegi.
I Israeliani i pol copar 10 Palestinesi al giorno, i teroristi de Hamas i pol copar 10 Israeliani al giorno, i giornai i ne pol contar per anni la bala che Putin vol atacar l’Europa e per questo farghe spender ai nostri governi soldi che invesse de vegnir usai per le scole e i ospedai i vegnerà usai per comprar canoni. Le sanzoni a Mosca le pol tranquilamente mandar remengo l’economia tedesca che la xe restada senza el gas russo, ma guai sbagliar coi parchegi, perché el popolo se incazza.
E invesse a Pola coi parchegi la capela i la ga combinada grossa. Prima i ga speso quasi un milion de euro per un parchegio a piani che el par più un’atrazion da luna park e ghe no lo usa quasi nissun anche se el vecio diretor dela Pula parking Bojanić lo gaveva presentà come una meraviglia più granda dela tore Eifel de Parigi. Dichiarazion da maravea xe dir poco, ma lui credeva per vero de far qualcossa che resterà in tela storia, tanto che su sto parchegio el ga meso un tabela con sora l'Arena, l'Arco dei Sergi, el Tempio de Augusto e le grue de Scoio, tuti simboli de Pola. Robe sena senso, che ofendi l'inteligensa dela gente, fate senza criterio e senza vergogna.
Poi xe vegnù fora che ai tempi de sto stesso Bojanić, sta azienda che la ga in man i parchegi de Pola la ghe ga permesso, fora de ogni regola, a più de mile persone de parchegiar gratis in giro per Pola. E in 'sta lista iera la ministra della sanità Hrstić, e poi avocati, diretori, vigilantes e 'diritura polissioti.
E qua la gente la ga altroché ragion de rabiarse perché la parità de tratamento per tuti, stessi diriti e stessi doveri, xe la base de ogni società e de ogni aministrazion o governo che se posa in primo sula fiducia che ghe ga delegà la gente, i citadini. Per questo el problema dei parchegi de Pola el xe, a livel de prinicipio, grave e importante come i raporti tra l’America e la Cina.
