LA "GLAGOLJICA" NO CANCELA VENESSIA, VENESSIA NO CANCELA LA "GLAGOLJICA": Istroveneto e glagolitico, due modi del contar storie dela stessa tera

Me capita sai volte su Facebook de imbaterme in diversi grupi che i rivendica tranquilamente un’Istria italiana (magari slargandola fin Tirana) scrivendo monade sor monde e provocando la risposta da parte dei croati che i scrivi fior de monade anche lori. De esempi ghe ne saria de contar fin doman, certi ti ve faria anche impirar i cavei, ma ve conto solo uno o dò.

Da parte italiana, pestandose el dito col martel sensa acorgerse, i scrivi che l’Istria la dovessi esser italiana perche la xe stada (dipendi dai vari loghi istriani) per 5 secoli venessiana. Bon, per prima roba, mai tuta l’Istria (se xe per qusto gnanche l’italo-slovena ma per sai tempo de iure austriaca Trieste, né la italo-croata ma de iure ungherese Fiume) la xe stada soto Venessia. E soto Venessia no xe stade specialmente quel parti de tera istraiana dela Contea de Pisii dove che se ga sempre parla solo (o quasi) croato.

Ben, qua no xe solo de oservar che el caso de Trieste (ma anche de Fiume nel Ventenio) el dimostra che una cità del Alto Adriatico la pol esser ogi italiana anche sensa mai esser stada Venessiana, ma xe de dir specialmente che l’Istria la sua italianità (o, disemo, el caratere neolatin, romanzo, protoitalian), in tei loghi la che la iera e la xe ancra un fià superstite, la la gaveva da sempre, da l’antichità. No ‘coreva finir soto Venessia per esser, parte dei istriani, proitaliani. Xe vero che a Venessia gran parte de l’Istria la ghe devi architeture, diverse abilità  (pesca, artiginato), gastronomia, canti e bali, nomi dei venti e dele bestie, ma no la ghe devi el legame con l’Italia e la sua lingua romanza, presenti in Istria xa dai tempi dei Romani e dei Greci di Bisanzio.

E poi xe interessante sto uso che i fa de Venessia. Se da una parte i la usa per voler dimostrar l’italianità de l’Istria, da l’altra (i automisti veneti) i disi che Venessia no xe Italia e che de conseguensa gnanche noi, italiani de l’Istria, no sariimo italiani. Ciapela e portevela a casa, cari conazionali dei Circoli. mi compreso.

Specializai in sto argomento  “Venessia come che te comoda” xe quei croati che i comenta e che disi Venessia la iera un ocupator (dimenicandose che tanti dei croati ogi presenti in Istria li ga ciamai proprio Venessia nel XV e XVI secolo per ripopolar la penisola devastada ala peste), che Venessia no iera Italia,  che i ge ricorda al mondo l’Italia ga comandà in Istria solo dal 1918 e che, ragion per cui - i sproloquia -  l’italianità in Istria saria una roba superficial e mal importada. In altre parole i blatera che con l’Italia l’Istria no gavessi cossa far, strumentalizando el fato che l’Italia la se ga unificà solo in tel 1861. Drio de questa logica demente, gnanche a Firenze, Milano o Bologna prima del 1861 no ghe saria sta italiani. Ma ve par normale? E ancora peso in Germania, unficada solo in tel 1871: fin quel anno, in base ai predicatori dela logica (fora dal mondo) “nazion solo se xe stato”, a Monaco, Francoforte, Heidelberg, Berlino o Amburgo prima del 1870 no viveva i Tedeschi. E come la metemo con i croati fin al 1991? Come che go dito, monade scarigade su altri muci de monade, tanto da una quanto da l’altra parte.

Go scrito tuta sta roba, che a dir el vero me seca scriver, solo per dir che saria ora dei capir che in Istria da secoli vivi sia taliani, sia croati, e magari anche anche altri come i Cici e i Sloveni lassù sule montagne istriane. Con tuto el rispeto per chi che ga soferto le malefate del fascismo, l’esodo e le foibe, no xe dolor che possi cambiar quel che xe sta sempre el quadro etnico e linguistico dela penisola.

Quel che tanti italiani no i sa, o i no i vol saver, xe che i croati i xe presenti in Istria dal VII secolo: ben presto i ga comincià testimoniar la propria presensa usando una sua scritura, un suo alfabeto, el glagolitico  (glagoljica) che el xe el più antico alfabeto slavo, creado nel IX secolo, intorno al 863, e ligado ala mission de Cirillo e Metodio tra i Slavi. In Istria el xe documentà tra i Croati almeno dal XII secolo, ma la tradission glagolitica istriana ga radise ancora più vece. Per secoli i preti glagoliti i lo ga doperà per scriver testi religiosi, documenti e iscrissioni in lingua croata, fasendo dela glagoljica un dei segni più importanti dela presenza e cultura croata in Istria.

A Colmo, nela ceseta de San Gerolamo, ghe xe grafiti glagolitici che riva fin al XII secolo. A Rozzo xe stà trovà el famoso abecedario glagolitico. A Vermo, nela ceseta de Santa Maria dele Lastre, in mezzo ai meravigliosi afreschi, ghe xe circa 130 grafiti glagolitici. E dopo Draguccio, Sanvincenti, Gallignana, Pisin, Barbana e tante altre località.

Le testimonianze glagolitiche se trova perfin a Valle, ogi una dele località simbolo dela presenza italiana in Istria.  In tela ceseta de Sant'Antonio Abate  ghe xe grafiti glagolitici del Quatrocento e del Cinquecento. Questo no vol dir che Valle iera “croata e no italiana”, come che la presenza del veneto no vol dir che un paese iera “italian e no croato”. Vol dir semplicemente che le nostre lenti de ogi le funziona mal co’ provemo a usarle per capir l'Istria de cinquecento ani fa.

Un altro esempio straordinario xe l'Istarski razvod, el documento medieval che regolava confini, tere, boschi, pascoli e diriti tra signori e comunità istriane, a l’epoca tuti soto el Sacro Romano Impero dela nazion Germanica. Per stabilir un confin i andava sul posto: signori, preti, notai, rappresentanti dei paesi e gente che conosseva el territorio. E per documentar quel che iera stà stabilì ghe iera una version latina, una tedesca e una croata. La redazion croata, che xe quela che ne xe rivada attraverso copie successive, la iera scrita in glagolitico.

Insoma, una roba bisogna dirla ciara. La glagoljica la xe un elemento fondamentale dela cultura croata e una dele testimonianze più forti dela longa e presenza croata in Istria. No xe una roba inventada ieri per meter una bandierina sora un toco de storia. Le testimonianze xe là da secoli, scrite sule piere, sui muri dele ciese, sora i afreschi, nei libri e nei documenti.

E stemo 'tenti: riconosser nela glagoljica una testimonianza dela presenza croata in Istria no ghe cava niente ala storia italiana, veneta e romanza dela penisola. E riconosser secoli de cultura veneta e italiana no cancela una sola letera glagolitica incisa su quei muri. El problema comincia solo co per contar una storia ne vien voia de far sparir quel'altra.

E poi, le lingue qua no le ga mai savù star ferme. Le ga caminà coi preti, coi mercanti, coi marinai, coi contadini, coi soldai e coi notai. Le xe passade de una vila a un'altra, le se ga incontrà, le se ga rubà parole, le se ga trasformà.

Ciaro, la storia istriana no xe stada sempre una bela festa de popoli che se abrazava. Saria una stupidada contarla cussì. Ghe xe stadi imposizioni, sfrutamenti, nazionalismi, persecuzioni, guere e esodi. Ma proprio per questo xe ancora più importante no cancellar nisuna dele storie che le xe passade de qua. Perché la storia istriana no xe fata de una lingua sola. La xe fata de gente che per secoli ga pregà, scrito, comprà, vendù, se ga inamorà e ga sbarufà in lingue diferenti. I politici ste lingue i le ga volù divider,  ma la gente xe andada ‘vanti a  parlarle, anche misciandole.

Ieri tra Rozzo e Colmo se ga festegià la fine dei lavori de restauro dela Aleja glagoljaša, la Strada dei glagoliti. Sete chilometri de strada e undise monumenti che ricorda una dele robe più importanti dela storia culturale istriana: la glagoljica, i preti glagoliti, i libri e i documenti che per secoli i ga lassà el segno su questa tera.

‘Desso qualchedun de voi poderia domandarme: ma cossa centra questo con Scrivemo in istroveneto? Centra, e bastansa. Guardando la Aleja restaurada tra Rozzo e Colmo, forse val la pena farse vegnir in amente che la glagoljica e l'istroveneto forsi le conta storie diferenti, in lingue diferenti, ma le conta dela stessa tera.