LA SIRENA DE POLA CHE NO LA XE UNA SIRENA: Una sprussadina de miti greci ligai ala fondazion de la cità

Piassa Foro a Pola la ofri, con la sua architetura, una specie de sintesi dela storia dela cità disegnada dai palassi che i dà tuti sula piassa. De l’epoca romana xe el Tempio de Augusto, del periodo medieval, che ‘l ex sta un misto tra la libertà comunali e ‘l governo dei Signori Castropola per conto del patriarca de Aquileia (che ’l ghe rispondeva al’imperator tedesco) ne xe restà el Palazzo del Comun (o Palazzina comunale) fato nel 1296. Della lunga età venessiana xe la casa gotica sul versante sud-est, poco prima de l’imboco de via Sergia, l’Austria ne ga lassà i grandi palassi indò che una volta iera la banca e ogi el cafe/ galeria Cvajner e quel palasso in basso, indo’ che stava el café Forum. Al periodo italian risali la bianca ex Cassa di Risparmio di Pola dove che ogi xe se trova l’ente de promossion turistica; la ga progetada Vincenzo Munari, l’architeto che firma anche la Banca d’Italia de Bologna.

A parte el Tempio de Augusto, che el xe un vero gioielin, una dele aree più interessanti xe la parte più a est (quela de destra, co se la guarda dala piassa) dela palazzina comunal. Xa co’ se la guarda de fianco e de drio, se vedi che la ga incorporadi i resti del Tempio de Diana. Eh, si, in età romana al Foro iera tre templi: due gemei, con quatro colone, che saria quel del Augusto e quel de Diana, e uno de oto colone, più grande, che 'l stava i meso ai altri due, dedicato ala triade capitolina Giove, Giunone e Minerva.

Poi, in alto, un fià sora e de fianco de l’ultimo dei quatro archi (porteghi) dela palazzina, se vedi el rilievo de un cavalier che dovessi esser Bartolemeo de’ Vitrei, un Padovan che nel 1296 el iera podestà de Pola. Pareria che l’autor de questo rilievo saria l’architeto francescan Jacopo da Pola: de lui se che nel 1302 el iera uno dei capi (forsi ‘diritura el capo) del cantier dei lavori dela celebre basilica de Sant’Antonio a Padova, ma anche che, diese anni più tardi, el gavessi progetà la ciesa e ‘l convento de San Francesco a Pola.

Soto la figura de Bartolomeo de’ Vitrei, xa verso tera, sta la famosa piastra indò che, verso el 1590, i Venessiani i ga fato incider in tela piera che “nelli boschi di pubblica ragione Magran sotto Sissan, Caval sotto Carnizza e Quanque sotto Momoran, siano prohibiti il taglio et il pascolo”. Insoma, pareria che prima de esser predatori de alberi, i Venessiani i se ciogheva cura de ‘ste piante, o almeno i meteva regole contro la devastassion. Insoma, coi interessi economici se sposava anche una coscienza ecologica ante tempore.

Ma vegnimo ale curiosità. In tela parte est, quela del fianco destro, xe incastonade le sculture de due figure de più dificile interpretasion: quela del Telamone e la Sirena con do' code.

In architetura el telamon xe una figura de masc’io che, come le cariatidi femine, la servi de sostegno vero per altri elemenenti architetonici, ma altre volte, come nel caso de Pola, la ga solo scopi decorativi. Se li trova, xa 500 anni prima de Cristo, in tei templi greci. Telamone xe anche sinonimo de Atlante che in tela mitologia greca el guantava i pilastri del ciel.

El Telamone mitologico el iera un Argonauta che insieme con el fradel Peleo el ghe xe sta’ vicin de Ercole in tele spedissioni contro le Amazzoni e contro Troia. E xa sti pochi dati - Argonauti e Ercole - i rendi la storia interessante per Pola, specialmente riguardo al mito dela sua fondassion.

Come che risulta dal poema epico “Le Argonautiche” de Apollonio Rodio, i Argonauti, con Giasone in testa, i ghe gaveva rubà el vello d’oro del capron volante al re dela Colchide (ogi in Turchia) Eete. Ai Argonauti, sula barca “Argo”, ghe ga tocà scampar per mar e per tera, con i Colchi che i ghe coreva drio. In tel Quarnero, Assirto, uno de sti Colchi, el xe sta smembrado da Giasone e i tochi del suo corpo i xe stai butadi in mar per formar le isole che dal suo nome le se ciamava Assirtidi (Absyrtides), ogi Cherso e Lussin. E xe de dir che Assirto iera fio del re Eete e fradel dela maga Medea, che la gaveva tradì e la iera scampada con Giasone; xe curioso che ogi un logo sula costa liburnica de l’Istria, de fronte a Cherso, el se ciama Medea.

El fato che l’argonuta Telamone el se trovi scolpì in tela palazzina comunal de Pola no devi confonder: Pola no la ga fondada i Argonauti, ma quei Colchi che, stufi de corerghe drio ai Argonauti sensa mai becarli, e impauridi de tornar a casa a mani svode per magari esser castigai a morte dal re Eete, i se ga fermà in tel golfo de Pola perché qua i gaveva trovado una sorgente de aqua, probabilmente quela dela Carolina. Sta roba la risulta dai versi de Callimaco de Cirene, bibliotecario dela famosa biblioteca de Alessandria,  e dai quei del poeta dramaturgo greco Licofrone.

Insoma, anche se no ‘l iera uno dei quei Colchi fondatori de Pola, ma un Argonauta, Telamone iera forsi quel che meo de tuti, tra i vari personagi trasformabili in elementi architetonici, rispondeva al bisogno de far comparir el mito dela fondassion de Pola in tele decorassioni dela palazzina comunale.

Più su go scrito che Telamone el iera compagno de bataglie de Ercole: ben, se Telamone, tramite la storia dei Argonauti e dei Colchi, el xe in qualche modo ligado ala fondasion de Pola, la stessa roba la val per Ercole, e no solo perché el culto de Ercole el xe ligado ale acque – quele che, tra l'altro, le ga fato fermar a Pola i Colchi – ma specialmente perché el monumento più vecio de Pola xe porta Ercole, con el viso e la clava de l’eroe mitologico scolpidi su l’arco.

Per quel che riguarda la sirena con do code, tanto che anche un famoso bar de piassa Foro el se ciama Sirena, pareria che no sia una sirena. Questa xe l’opinion de l’archeologo de Visinada (ex parlamentare europeo) Marino Baldini. Secondo lui sta dona con due code de pesse saria Endeide, ninfa e regina de l’isola de Egina e mama de Telamone. Insoma, robe de famiglia incastonade nela storia e nel mito de Pola.