LE PAROLE DEI NONI PER QUEI CHE VEGNARÀ: Al festival de Sissan xe sta presentada la ristampa del vocabolario de Galesan, e bon che l'istrioto ghe ne ga anche altri

La ristampa del Vocabolario del dialetto di Gallesano d'Istria, presentada giovedì a Sissan al Festival dell'Istrioto, la ne dà una bona ocasion per butar l’ocio sul panorama editorial che, nei ultimi deceni, el xe sta la vetrina del lavor de valorisassion, documentassion e conservassion dele parlade istriote.

Un lavor che no xe per gnente secondario. L'istrioto el rapresentava e ‘l rapresenta ancora una componente minoritaria de un patrimonio linguistico e cultural, quel italian dell'Istria, lui stesso minoritario e soto minacia de estinsion. Col calar del numero dei parlanti e con l’inciampar sempre più dela trasmision natural de una generasion a l'altra, parole e modi de dir dei dialeti istrioti, esposti al declino sai più de quei istroveneti, i ris'ciava cussì de sparir ancora più presto. Meterli su carta xe stà, prima de tuto, un modo per salvarli.

Xe ‘lora sicuro un ben che a compagnar come che Dio comanda sta nova ristampa sia stada Isabella Matticchio, linguista che proprio a l'istrioto de Gallesan la ghe ga dedicà bona parte dela sua atività de ricerca, studiando anche el raporto del gallesanese con l'italian e l'istroveneto.

E alora, cosa xe stà messo su carta fin deso?

Sei xe le località storicamente ligade all'istrioto: Rovigno, Vale, Dignan, Fasana, Galesan e Sissan. Ogi, però, ghe ne resta cinque: a Fasana sta antica parlada purtropo la se ga distudà. E tra sti sei loghi, quatro ga lassà le sue parole anche su carta, dandose nel tempo un dizionario o un vocabolario.

El primo a rivar su carta xe stà el dignanese, ma con una storia assai più vecia. Giovanni Andrea Dalla Zonca ga comincià a ingrumar sistematicamente le parole bumbare xa nel 1841, a metà Otocento. El suo Vocabolario dignanese-italiano, restà manoscrito per oltre un secolo, el xe stà publicà soltanto nel 1978, a cura de Miho Debeljuh. Oto ani dopo, nel 1986, riva el Dizionario del dialetto di Valle d'Istria de Domenico Cernecca. Nel 1992 xe la volta de Rovigno, col Vocabolario del dialetto di Rovigno d'Istria de Antonio e Giovanni Pellizzer.

In tel 2003 xe l’ora de Maria Balbi e Maria Moscarda Budić che le ga scrito el Vocabolario del dialetto di Gallesano d'Istria, l'opera che gavemo nominà più su. Un volume che, cussì come la sua ristampa, el xe nato dala volontà de ingrumar e consegnar al futuro la “parola viva” gallesanese, come che ga dito ben a Sissan la presidente dela Comunità degli Italiani de Gallesano Diriana Delcaro. Nel suo intervento la ga ricordà tanto el lavor dele autrici quanto quel de chi ga seguì e arichì la nova edission.

Valle, la xe tornada sul patrimonio dele sue parole in tel 2015, co Sandro Cergna ga publicà el Vocabolario del dialetto di Valle d'Istria.

Resta fora, almeno per quel che riguarda un vocabolario autonomo de sto tipo, Fasana e Sissan. Ma con una diferenza importante: se a Fasana la parlada la xe ormai defunta, a Sissan l'istrioto el xe ancora vivo. Insoma, ghe ne gavemo quatro su sei, dunque. No xe mal per una lingua parlada solo in un per de loghi. Ma gnanca bastanza per poder star completamente tranquili. Eh, si, perché se i loghi xe pochi, ‘lora podemo farli tuti. E poi ga sai più senso far un Dizionario del sissanese distinto dal rovignese, che uno del polesan distinto da l’umaghese, se parlemo de istroveneto.

A sto punto vien quasi spontanea una domanda: perché certi de sti libri se i se ciama vocabolari e altri dizionari? Che diferenza ghe xe?

Assai meno de quel che poderia parer. Nel uso moderno i do termini i finissi sai volte per esser sinonimi. El vocabolario el dà de più l'idea del patrimonio de parole de una lingua o de una parlada: ingrumarle, conservarle e spiegar coss’ che le vol dir. El dizionario, invesse, el meti più l'acento sul'opera de consultasion, cioè sul'organizacion sistematica dele parole e dele informasion che li compagna.

Ma el confin tra vocabolario e dizionario el resta verto. Lo dimostra proprio Valle: nel 1986 Cernecca el ga publicà un Dizionario del dialetto di Valle d'Istria; nel 2015 Cergna el ga publicà invesse un Vocabolario del dialetto di Valle d'Istria. Stessa parlada, due parole diverse in copertina e, in fondo, el stesso grande obietivo: no lassar che un toco de lingua el sparissi insieme ale generasion che la parla.

Ghe xe po' un'altra curiosità, forsi ancora più interessante. Ste opere le xe stade fate partindo dala parlada locale per rivar all'italian. Trovemo cioè la parola dignanese, vallese, rovignese o gallesanese e po’ vegnimo a saver come che se la disi in italian. Gnanche de ste opere la meti insieme, in un unico volume, i do percorsi completi: dialeto → italian e italian → dialeto. E qua torna fora Dalla Zonca: xa a metà Otocento, oltre al dignanese-italian, el gaveva lavorà anche a un vocabolario italian-dignanese. Un'intuission che, vista con i oci de ogi, la iera decisamente avanti coi tempi.

Ghe xe però un posto dove che el viagio se pol far in tute due le direzioni: Rovigno. No nel stesso libro, ma metendoghene due uno vizin all'altro. Al Vocabolario del dialetto di Rovigno d'Istria dei Pellizzer se ga infatti zontà più tardi el Vocabolario Italiano–Rovignese de Libero Benussi. Coi due volumi sul tavolo se pol partir dal rovignese e rivar all'italian, o magari far el viagio contrario.

E xe una picia diferenza che la disi sai. Perché conservar una lingua vol dir sicuramente permeterghe a chi che xa la conossi de ritrovar una parola, capir coss’ che la vol dir e tramandarla. Ma vol dir anche permeterghe a chi che quela lingua la conossi poco – magari un mulo che la ga sentida parlar dai noni, o un turista italian un fià più curioso de capir indò che 'l xe vegnù in ferie – de partir dal'italian e andar a zercar come che quela roba se disi nela lingua de casa.

E alora, cosa resta ancora de far? Sai roba.

A cominciar da una grafia standard, o almeno bastansa condivisa, per le diverse varietà del'istrioto. Ma questo xe un discorso cussì complicà (el val anche per l’istroveneto) che probabilmente no bastaria un articolo: ghe ne voleria venti.

Restando ai vocabolari, un passo importante saria invesse quel de lavorar sul percorso inverso. No solo gallesanese, dignanese o vallese verso l'italian, ma anche italian → gallesanese, italian → dignanese, italian → vallese, e cussì via. Strumenti de sto tipo i saria sai preziosi proprio per chi con l'istrioto, anche co el gioga in casa, in realtà, perché smagnà da l’istroveneto, xe come che el giogassi fora casa: se poderia partir dala parola italiana che se conossi per ritrovar quela dela parlada de casa.

E po' ghe xe Sissan. Qua el svodo xe ancora più evidente: manca un vocabolario organico dela parlada sissanese. E forse, se un giorno el nascerà, gavaria senso pensarlo fin dal principio nele due direzioni, sissanese → italian e italian → sissanese in tel stesso volume. E no saria gnanca un progetto estraneo ala strada che se sta xa fassendo. Una parte importante dele atività del Festival dell'Istrioto gravita proprio su Sissan e un vocabolario sissanese poderia quindi diventar, perché no, uno dei suoi progetti futuri.

Sta considerassion la val tanto più dopo el riconoscimento ottenudo nel 2023, quando le parlade istriote xe stade riconossude come ben cultural imaterial dela Republica de Croazia. Un riconoscimento importante, ma che porta inevitabilmente con sé anche una responsabilità: un patrimonio imaterial no se tutela semplicemente metendolo in un registro. Bisogna documentarlo, conservarlo, tramandarlo e, sora de tuto co se trata de una lingua, continuar a ‘doperarlo.

A chi se domandassi perché ne servi tuti sti vocabolari, la risposta la xe anche un fià condida de incazadura. Perché i conserva le parole con cui una comunità che, nei loghi del proprio insediamento storico, prima del 1945 no la iera mai stada minoritaria, la ga descrito per secoli el mondo che gaveva intorno: i ordegni e el cambiar del tempo, i venti e ‘l magnar, i pesi e le misure, el lavor, i mestieri, sentimenti e bestemie. In quele parole xe restà un intiero modo de viver e de interpretar un territorio, ala cui fisionomia sta comunità la ga dà un contributo fondamentale.

E se anche un giorno tuto questo dovessi andar perso, con sti libri almeno restarà una testimoniansa. Una traccia per i antropologi e i linguisti del futuro, per quei che i volerà conosser o ricostruir la storia de ste tere e, perché no, magari anche per qualche turista che fra venti, cinquanta, cento o duecento ani el rivarà in Istria con la volontà de capir no solo quel che el vedi, ma come che se xe rivai a quel ch'el vedi.

Però bisogna far i conti con sto dato: semo restadi in pochi. E diventa sempre più dificile imaginar che opere impegnative come queste le possi nasser solo dala passion, dala competenza e da anni de lavor dei singoli. Qua xe che torna utili le parole de Diriana Delcaro: per salvaguardar la lingua ghe vol la colaborasion tra le Comunità e tra le istituzioni e, contemporaneamente, tra le persone che continui a parlarla. Solo metendo insieme ste due robe se pol consegnarghe per vero sto patrimonio ale generasion future.

Perché ala fine podemo stampar tuti i vocabolari che volemo. Podemo ingrumar le parole, ordinarle, coregerle e meterle al sicuro tra due copertine. Ma el logo per conservarle resta sempre el stesso: la boca de chi le parla.