PENSÈ DE CONOSSER POLA? Prima de risponder guardè el fantastico Calendario del 2026 del Circolo de Pola!

Pena che lo go avù in man, xa dopo la prima ociada, me go dito tra mi e mi: “Uau, anche stavolta el xe bel e prezioso”! Parlo del calendario per el 2026 stampado dal Circolo de Pola.

Penso che in tanti de voi (o almeno spero, visto che “in tanti” proprio no semo restai) ve gavarè acorto che in sti ultimi anni el Circolo de Pola ne sta regalando calendari coi fiochi, gran bele testimonianze de quela storia che la fa un fià da grande utero per tuti i soci del Circolo. E no parlo solo dela storia italiana, ma de tuta la storia, quela che, a volte con scotadure o pestandone come el bacalà, altre volte a bagnomaria, la ga mescolà i vari ingredienti plasmando un’identità polesana verta a tuti e multicultural.

Dopo gaverne oferto un calendario fato da meravigliose fotografie da “album di famiglia” nel 2024 e un altro con i quadri, i disegni e le grafiche dei viagiatori che i gaveva visitado e disegnado Pola dal Seicento a l’Otocento nel 2025, stavolta el calendario recupera foto del periodo dela “defunta”.

Sicome Pola de “defunte” la ghe ne ga tante, precisemo subito che se parla de l’Austria-Ungheria. E se lo capissi subito dala copertina dedicada ala bela statua che la stava davanti ala Rena dela imperatrice Elisabetta Amalia Eugenia di Wittelsbach (Elisabeth Amalie Eugenie von Wittelsbach), moglie de Francesco Giuseppe e famosa come Sissi (Sisi, per dir la verità). Chi che no ga visto el film con Romy Schneider in tel ruolo de Sissi  el ga de considerarse bocià in cultura general.  Sisi, nota anche come Elisabetta di Baveria, la iera stada a Pola un per de volte e la ga perso la vita a Ginevra el 10 setembre del 1898: la ga copada con una cortelada l’anarchico italian Luigi Lucheni per odio ideologico contro la monarchia asburgica.

Ma tornemo al calendario. Inutile dir con altre parole quel che ga spiegado sai ben i curatori (i ga oferto lavoro volontario) Fabrizio Radin e Alessandro Lakoseljac Ukmar xe lori che i ga scelto le foto) in tela prefazion del calendario:” I criteri di selezione adottati hanno privilegiato lo scorcio inusuale, la visuale inconsueta, l’angolatura insolita che ritrae in cartolina una città – la nostra città nei primi anni del secolo breve – in rapida trasformazione, tanto da renderne incerto il profilo, l’ubicazione dei luoghi, l’identificazione di rioni e quartieri, di edifici e strade, in sto canton del mondo che pensavamo, che credevamo di conoscere perfettamente.”

Le foto (e qualche cartolina, una stampada adiritura a Klagenfurt) messe a disposizion da Tomislav Paić, le provien dala colezion de suo papà, el dotor Vidoslav Paić, bravo neuropsichiatra a l’Ospedal de Pola e amante dela storia dela medicina e dele memorie asburgiche.  E xe vero quel che disi i curator del calendario: dele 15 fotografie publicade, per quel che me riguarda, ben nove no le gavevo mai viste prima! E i ga ragion co i fa notar che in certe xe dificile riconosser i loghi: anche se a prima vista par una veduta conossuda, sfido chiunque a riconosser tuto quel che se vedi in tela foto de gennaio.

In sto calendario, de autentiche geme ghe ne xe un bel ciapo: le tante ciminiere dele fabriche de una volta, i alberi ‘pena piantai ai Giardini, i segni dele carosse dei cavai in tela neve, el mercato co el stava vicin dela riva e vicin del tempio de Augusto, prima del curvon che ‘l porta verso el porton de Scoio e la vecia Lesnina e la redazio de La Voce del Popolo.

Xe belissime e mai viste la foto del ponte de fero che, passando per una porta moumenal, el portava a Scoio, ma anche quela dela riva là del molo Bellona che ogi el se ciama molo Fiume. Xa vista, ma la resta rara, la fotografia dela fontana in Piazza Dante, ma no de quela de ogi, fata da l’architetto polesan Enrico Trolis in tel 1937, ma de quela con i cima la baba alegorica, finanziada “de sua pecunia” verso el 1870 da Angelo Demartini che ‘l iera sta diretor de l’Ospedal de Pola e podestà dal 1869-1876, el paron de quela casa neogotica in via Kandler.

Se le foto de via Carara e de via Sergia le xe bastansa conossude, personalmente no gavevo mai visto la fotografia de via Rizzi indò che, oltre ai graffiti che i inegia a Rizzi e a l’Italia, se vedi una tabela che la ne fa scoprir che una volta esisteva via Verudella.

La foto de dicembre la xe deicata ala botega de magnatica Dazara a Veruda che quela volta, sensa ‘sfalto, più che un rion la pareva un paesotto. E sta roba xe in sintonia con la bela scelta fata da chi che ga curà el calendario, scegliendo de mostarne una “città diversa, minuta e popolare, lontana dalle cartoline che ne celebrano l’estetica eterna dell’antichità monumentale”.

Belissima, a fine calendario, l'ilustrazion caricatural de l'inaugurazion del tram eletrico el 24 marzo del 1904.

Co sfogliarè el calendario, o lo guardarè dopo gaverlo impicado, bute l’ocio su come che una volta se vestiva la gente: ghe se ne vedi tanta e anche per questo sto calendario el val oro.

La presidente del Circolo Tamara Brussich la me ga sai racomandà de trasmeter publicamente i ringraziamenti sui e quei del Circolo a Tomislav Paić che 'l ga condiviso sto suo tesoro sensa domandar niente in cambio. Gesto raro in un'epoca in cui de norma se ga de pagar tuto.

Da parte mia, in sto ultimo „Scrivemo in istroveneto“ del 2025 ve auguro un bon Anno Novo e de goderve sto fantastico calendario per tuto l'anno, che 'l ve 'copagni in date che un giorno podere meter in tel vostro magazin virtual dei bei ricordi. Bon 2026 e ogni bene!