MedulinArt poziva na prijavu za besplatnu kreativnu radionicu: djeca će izrađivati sapune
Prednost pri prijavi imaju djeca s područja Općine Medulin te djeca koja nisu sudjelovala na prethodnim radionicama
El progetto per l'ospizio a Valsaline e per el novo Mornar, dove che una volta iera el macelo, xe una bona notizia. Resta el rimpianto per la storica villa austroungarica, ceduda nel 2017 a la Diocesi, che la gavessi podù esser sede de un museo dedicado a quela parte de storia che ga fato diventar Pola una cità moderna. Un museo che ogi ancora manca
El progetto per l'ospizio a Valsaline e per el novo Mornar, dove che una volta iera el macelo, xe una bona notizia. Resta el rimpianto per la storica villa austroungarica, ceduda nel 2017 a la Diocesi, che la gavessi podù esser sede de un museo dedicado a quela parte de storia che ga fato diventar Pola una cità moderna. Un museo che ogi ancora manca
Pola ga tanti bei posti che chi che xe de fora, anche tanta gente che sta in altri loghi de l’Istria, i conossi poco e per niente. De solito i vien in cità, i va in ospedal o far sciopping in qualche centro comercial e de mar i vedi solo el porto. E, sinceramente, el panorama dele acque del golfo el xe 'bastansa imbrutì dal cantier de Scoio e de la fabrica de cementi. Ma basta andar, anche ai pìe, due chilometri più a sud e se trova un altro mondo, con un lungomare da maraveia (e, perché no?, anche da maravea), bele spiage, tanto verde e bei golfeti e baiete.
Uno de questi posti più bei xe el pendio che da la strada a quatro corsie che la colega Veruda e Verudela el se cala verso la baia de Valsaline. Un panorama che poche altre zone de Pola pol offrir, tra el verde, el mar e quel senso de verto che, per fortuna, no xe ancora sparido del tuto. De matoni ghe xe solo quei de Villa Idola, de la dita Lumenart. Zo, rente el mar, el complesso vacanziere del Ferijalni savez. In meso, campi de salata e de patate e albereti de amoli, che tanti in Istria li ciama armolini.
Pochi giorni fa, el sindaco Peđa Grbin el ga presentà per quel toco de Valsaline una proposta che no la me par per niente mal. El municipio el vol preparar un novo piano urbanistico per la zona de Valsaline e del Mornar, con l'idea de costruir un ospizio (casa del vecio) che podaria ospitar più de 400 persone.
E qua bisogna dir subito una roba: l'idea la xe bona. La xe bona perché i nostri veci, quei che ga lavorà una vita, i ga dà una man a far crescer Pola e una volta in tela tersa età i ga tuto el diritto de passar quela parte de vita in un ambiente dignitoso, confortevole e, perché no, anche bel. No xe scritto da nessuna parte che una casa per anziani la devi esser sistemada in qualche posto de seconda categoria, lontan dal mar e da la vita de la città. Al contrario, proprio quei che ga dà tanto a Pola i se merita de goderse una de le sue viste più bele.
Anche per el Mornar xe prevista una trasformazion. Se parla de un possibile centro per i veterani de guera, de mantegnir le attività sportive e veliche, e de sistemar finalmente el vecio stabilimento balneare, con lavori che dovaria cominciar nel 2027. In particolare, el bagno el dovaria diventar completamente adato anche a le persone con disabilità e con difficoltà de movimento. Anche questa xe una bona notizia. El Mornar fa parte de la vita de generazioni de polesani e merita de esser recuperado, no de esser lassado andar in malora.
Quel che ogi ciamemo Mornar, per chi che no sa, el ga anche una storia curiosa. Una volta quela zona i la ciamava «Al Rosso» e proprio là, xa ai tempi de l'Austria, ghe iera el macelo militar, che serviva a rifornir de carne la Marina. Secondo una vecia spiegazion polesana, el nome Rosso el vigniva dal sangue che dal macelo el finiva in mar. Altri invece disi che el nome el vigniva da la tera rossa dei campi là intorno. Atri ancora i disi che el rosso (Valsaline) el bianco (come polesan per la Gortanova uvala e ‘l verde (Valcane, ma questa xe una forsatura inventada “a tavlino” perché no go ma’ sentì nissun ciamar Valcane “el verde” i stava a simbolegiar i colori della bandiera italiana sul lungomare de Pola.
Indiferente, el macelo el iera ancora segnado su le carte de Pola in epoca italiana, ma tra le due guere el xe stà serà. Intanto, nel 1924, poco più in là, i ga inaugurà el bagno de Valsaline, con quaranta cabine, bar e terasse. E nel 1937 xe rivada anche la strada del Lungomare.
Ma co parlemo dei progeti de ogidì per Valsaline no podemo dimenticar una question che da anni resta sul tavolo: Villa Idola.
Quela splendida villa, tirada su in tel 1914, xe una dele più bele dele tante vile de la Pola austroungarica. La gaveva fata costruir l'arciduca Carlo Stefano d'Asburgo (cugin de secondo grado de l'imperador Francesco Giuseppe) per sua fia, la principessa Eleonora d'Austria, e suo marì Alfonso von Kloss, ufficial de marina. El progetto lo ga fato l’architetto e costrutor polesan Giuseppe Heininger, pare de quel Ottomaro Heininger che tra el 1935/37 el ga fato quel belissimo palazzo ai Giardini indò che una volta ieria el cinema Impero, poi ribatezà Partizan e indò che ogi davanti trovemo un do o tre bar.
Dopo la fine de la monarchia, la villa la iera passada in altre mani. Nel 1918 la xe stada comprada da Antonio Crelenizza (Crljenica), originario de Marzana, che la ga tegnuda fin al 1947, co la xe stada nazionalizada. Per tanti anni la ga ospità anziani e persone bisognose de assistenza, fin al 2011. Dopo xe rivà l'abbandono, con tuto quel che questo significa per un edificio storico.
Nel 2017 el Stato croato el ga regalà Villa Idola a la Diocesi de Parenzo e Pola, con un contratto firmado dal premier Andrej Plenković e dal vescovo Dražen Kutleša. La proprietà la comprendi la villa, altri edifici e un teren de 5.016 metri quadrati.
E qua, secondo mi, xe stà fato un sbaglio. No perché la cesa no la gabi diritto de gaver edifici indò poder far quel che la ga de far fora de le cese, ma perché Villa Idola la gavessi dovù gaver un ruolo sai più rapresentativo de la storia de Pola.
E poi, de bei loghi a Pola, la cesa la se gaveva xa becà quel bel trato che va da Monte Paradiso verso Veruda, indò che una volta ghe iera una caserma militar che sotto la Jugoslavia la se ciamava «Vitomir Širola Pajo». Dopo el 1991 una parte dei edifici xe stada assegnada al seminario Redemptoris Mater, che nel 1997 ga comincià a costruir el novo complesso. Quel saria stà un bel logo per la caserma dei pompieri, per spostarli da quel posto streto che i ga zo in cità, indò che se gavessi podù far un parcheggio de quei smontabili a più piani.
Insoma, co vila Idola la ghe xe sta dada ala Diocesi xe sta fato un groso sbaglio. Vila Idola xe uno dei esempi simbolici de un’ epoca che ga trasformà Pola da cima a fondo, porandola in tela modernità: l’epoca austriaca.
Pola la ghe devi ‘sai a l'Austria. No solo perché la monarchia la ga fato de la città la principale base de la sua marina militare, ma perché intorno a questa scelta xe cresuda una Pola nova, moderna, con infrastrutture e servizi che i ga cambià del tuto la vita quotidiana dei cittadini.
Basta pensar a l'Arsenal, fondado nel 1856, a le caserme, a le fortificazioni, ma specialmente a le strade, a le scole, ai palazzi pubblici e ai quartieri residenziali. Pensemo solo al Cimitero civico de Monte Ghiro, inaugurado nel 1846, al Cimitero de la Marina, inaugurado nel 1862, a l'Ospedal de la Marina, inaugurado nel 1861, al novo ospedal civico de San Michele, inaugurado nel 1896, e a la Ciesa de la Madonna del Mar, costruida per la Marina imperiale.
E pensemo anche a le scole e ai edifici pubblici: la scola tedesca del 1908, indò che ogi ga sede la Biblioteca universitaria, el palazzo costruido nel 1890 per el Ginnasio statale tedesco, che ogi ospita el Museo archeologico de l'Istria, e el Liceo femminile, indò che desso se trova una parte de la Facoltà de filosofia.
Ma no xe tuto. Nel 1903 xe stà inaugurado el novo mercato coperto, quel che ancora ogi xe uno dei simboli de la città. Nel 1904 xe rivado el tram elettrico, ben sei anni prima de Zagabria. Za nel 1871 Pola gaveva una officina del gas, e le strade ga comincià a esser illuminate con el gas, prima che nei primi anni del Novecento rivassi anche la luce elettrica.
E no bisogna dimenticar i acquedotti, la rete de distribuzion de l'acqua, i lavori per le fognature e per el risanamento de la città, la ferrovia che dal 1876 collegava Pola con el resto de la monarchia, el telefono, i servizi postali e tuto quel insieme de opere che ga trasformà un centro relativamente piccolo in una città moderna, industriale e cosmopolita.
Insoma, l'Austria no ga costruido soltanto una base militare. La ga contribuì a costruir la Pola moderna, quela che ancora ogi, in tante sue parti, riconossemo come la nostra città.
Naturalmente, no bisogna far finta che tuto fussi perfeto. L'Impero gaveva i suoi interessi militari e strategici, e la storia no xe mai fata soltanto de robe bele. Ma negar o trascurar quel che l'Austria ga lassado a Pola vol dir no capir una parte fondamentale de la nostra identità.
E proprio per questo xe ora de tornar a parlar seriamente de due musei che a Pola manca: un museo de la storia militare e un museo dedicado a la presenza austroungarica civile a Pola: un Pula – Pola K&K Museum.
Per el primo no occoraria gnanca inventar un edificio novo. Intorno a Pola ghe xe un sistema straordinario de fortificazioni austroungariche, certe za recuperade, altre ancora in condizioni che no fa onor a la città. Una de queste podaria diventar la sede de un museo capace de contar la storia militare de Pola, senza retorica e senza nostalgia per le guere.
Villa Idola, per la sua storia e per el suo valor architettonico, la gave podu esser invesse la sede ideal per el Pula – Pola K&K Museum. No solo perché la xe una testimonianza de l'architettura de quel periodo, ma anche perché la sua posizion, el verde che la circonda e i spayi del complesso i gavessi oferto un ambiente adato a una esposizion permanente, anche multimedial, a mostre temporanee e a iniziative culturali dedicate a la storia de la città.
Se poi el spazio el se gavessi rivelà tropo picio, sensa tocar i muri e l'architettura de la vecia vila, se gavessi podù costruir, a un livel più basso del teren, un padiglion moderno, magari de fero e vetro. Un intervento architettonico contemporaneo, indipendente da la vila, che no ‘l gavessi sercà de imitar el passato, ma in grado de dialogar con quel che xe xa là, rispetando l'edificio storico e el paesaggio che lo circonda.
Insoma, un omagio de la Pola de ogi a la Pola de ieri, senza de la quale la Pola de ogi no la saria gnanche lontanamente imaginabile.
Prednost pri prijavi imaju djeca s područja Općine Medulin te djeca koja nisu sudjelovala na prethodnim radionicama
Briškula je puno više od kartaške igre – dio je istarske svakodnevice, običaja i načina druženja koji se generacijama prenosi s koljena na koljeno. Uz karte se razgovara, šali, prepričavaju dogodovštine, obnavljaju prijateljstva i stvaraju nova poznanstva, ali i popije i pojede
"Ako možeš, moraš za one koji to ne mogu", poruka je koju je Josip Kristian Periš za života nesebično dijelio i živio
Da bi ova web-stranica mogla pravilno funkcionirati i da bismo unaprijedili vaše korisničko iskustvo, koristimo kolačiće. Više informacija potražite u našim uvjetima korištenja.
Nužni kolačići omogućuju osnovne funkcionalnosti. Bez ovih kolačića, web-stranica ne može pravilno funkcionirati, a isključiti ih možete mijenjanjem postavki u svome web-pregledniku.