Pola, una cità, mile ricordi: Co le polesane le passegiava coi capei e 'l fotografo vigniva ai compleani

Certi libri se li legi dala prima fin l'ultima pagina e dopo no se li ciapa più in man, ghe ne xe de quei che i stufa xa ala seconda seconda, e ghe xe anche quei dove che uno torna sempre indrio perché ghe par de gaver visto in qualche fotografia qualcossa che la prima volta ghe iera scampà.

Proprio cussì xe l’ “Albo dei ricordi dei polesani“, la nova publicazion dela Comunità dei Italiani de Pola, insoma, del Circolo: un album de famiglia de una cità intiera, fato prima de tuto de fotografie che per anni anorum no le iera nei archivi, ma in tei cassetini, in tele scatole de cicolatina svode e nei album privati dei polesani. Probabilmente, sai de ‘sti album iera  quei veci coi fogli de carton leger nero o grigio, dove che col cortel o con la lameta se fasseeva quatro tai de sbiego, per ficar dentro, pian pian, i quatro cantoni dela fotografia in bianco e nero.

Nela prefazion dela presidente del „Circolo“, ma anche autrice dei testi e caporedatrice Tamara Brussich, se trova la ciave del letura de tuto el libro: „Il tempo ruba la memoria“, e a sta fato xe de oporse in qualche maniera. Per questo quei del Circolo i xe andai a vardar, come che scrivi la Brussich, dentro le scatole de „ciocolatini“, sui scafai e nei album de famiglia, in serca de fotografie che possi salvar quel che sai volte sparissi insieme ale generazioni che quei momenti li gaveva vissudi e se li ricordava.

Dai tempi del'Austria-Ungheria ala prima Jugoslavia

E libro no ‘l conta la classica storia de Pola. Qua in primo pian no xe imperatori, grandi date e cerimonie. I protagonisti xe i polesani: fioi, scolari, amici, bagnanti, sportivi, lavoradori, mule che passeggia, famiglie sentade in cusina o in terassa. L'album el procedi, ala larga,  per temi; se va dala vita de fimiglia e del'infanzia ala scola, poi al lavor, ale gite e ale compagnie, per le vie e le piaze dela cità, el mar e i bagni, lo sport e i divertimenti. Le fotografie le xe stade scatade in vari periodi, dai tempi austro-ungarici, fin al 1918, dal periodo italian, dal 1918 al 1943/47, ma anche a l’epoca dela Jugoslavia, dal 1947 fin ala fine dei anni Sessanta.

Mule in Vespa e Nini a Stoia

Del periodo jugoslavo xe particolarmente interessanti le fotografie del primo coro maschile del Circolo, nel 1948, e quele dei tempi dela motorizazion del società, coi muli e le mule sule Vespe e sule Lambrette –  al manubrio de una Vespa se vedi anche la nota poetessa polesana Gianna Dallemulle Ausenak e po' una serie de fotografie dedicada a una legenda locale, el bagnin Nini Načinović de Stoia.

La famosa poetessa de Pola Gianna Dallemulle Ausenak, in mezzo al volante de una Vespa in tela foto in basso a sinistra

Nini ga comincià a lavorar al bagno xa el 6 giugno 1933, dopo de gaver fato al Genova el corso per bagnin e in ben 51 stagioni el ga salvà dal 636 persone che le ris’ciava de negarse.

Nini Načinović e la "sua" Stoja

Sai interessante xe anche una fotografia fata davanti ala vecia Casa del lavoratre „Alfredo Stiglić“. Xa el nome Alfredo Stiglić ne fa capir che la fotografiala xe del periodo jugoslavo, e lo stesso sul muro, a grandi lettere, in italian, xe scrito „Casa del lavoratore Alfredo Stiglić“. El bilinguismo a Pola, se poderia dir, a quei tempi se lo „respirava“ naturalmente.

La fotografia del “pek Fanci“), dela paneteria Giotta in via Revelante, ogi via Faverijska, la par esser se la fussi vignuda fora de qualche film neorealista. La xe belissima. „Pek“ xe la parola che per tanto tempo i italiani de Pola doperava per dir panetier.

El “pek Fanci“

Torta, credenza e ocio drito nel obietivo

E poi, per quel stesso periodo jugoslavo – iera le foto del compleano. Ogi se „scata“ anche cento fotografie prima ancora de taiar la torta. Una volta, per far una fotografia de famiglia come che se devi, se ciamava el fotografo a casa. Solo verso la fine dei anni Sessanta e in tei anni Settanta, con la diffusion più grande de machine fotografiche semplici come la Kodak Instamatic e dela fotografia istantanea Polaroid – in Jugoslavia con un certo ritardo rispetto, per esempio, a Trieste indò che andavino a comprarle – le fameie ga comincià sempre più spesso a gaver una machina fotografica sua. A quei tempi la fotografia no iera una roba imediata, del tipo “scat e guardo”: el rullin se lo portava dal fotografo a svilupàr e dopo se spetava per qualche giorno, con impazienza, che le fotografie le fussi pronte. Fora, naturalmente, dela Polaroid, che la gaveva la sua tecnologia dela fotografia istantanea e le foto ti le vedive comparir in tempo reale davanti ai oci.

Insoma, tra i invitadi al compleano ghe iera sempre anche el fotografo professionista. Per questo tanti album dei polesani, fin ai anni Sessanta e Settanta, ga quasi sempre la stessa scena: el festegià, la torta, fradei e sorele torno la tavola, e drio de lori la „credenza“ o qualche altro mobile. Sul tavolo biscoti, fruti, un vaso de fiori, ciocolatini, una pupa e magari qualche giogatolo becà per el compleano. Nel libro xe imortalà un compleano proprio come che tanti se lo ricorda dai propri album de famiglia: in bianco e nero, un fià ingessà, solene e col obligo de vardar tuti driti nel obietivo.

L'Arena, sfondo che no podeva mancar

Impossibile no meter in evidenza una fotografia che dai anni Venti fin ala fine dei Sessanta se fasseva quasi come un rito sul „molo Fiume“. Là i fotografi professionisti, con l'Arena drio, i fasseva uno dei ritrati (personali e urbani) più riconossibili e classici de Pola.

Praticamente no ghe xe una famiglia polesana presente in cità almeno da una sessantina de anni che nel suo album no la gabi almeno una fotografia de quel tipo. Qualche volta in foto xe una persona sola, qualche volta una copia, e spesso mama e papà col fio in carozina – sempre sul molo Fiume e quasi sempre con l'Arena come sfondo che no la podeva mancar. Quel stesso motivo, però senza gente ma con un'inquadradura quasi preisa, più tardi lo ripeterà tante volte anche el noto pitor polesan Demir.

Moda „d'altri tempi“

Proprio sai bele xe le fotografie dele done (come quela in copertina de sto articolo) in cità nei anni Trenta e Quaranta. I Giardini (Largo Guglielmo Oberdan), Piazza Dante, piassa Foro... Per una semplice passegiada, le polesane xe vestide come se le stassi vignindo fora de una scena de film: tailleur, vestiti, capei, borsete, cavei ben messi.

Le sorelle Riboni in Piazza Dante

La fotografia dele due sorele Riboni in Piazza Dante verso el 1935, o quela del grupo de amiche a i Giardini, le trasmeti qualcossa che dai documenti scriti xe dificile ricostruir: la moda, el portamento, el modo de andar in cità e de meterse in posa davanti ala machina fotografica.

Una compagnia de omini ai Giardini

El Lungomare prima dela strada e dei pini

Un'altra Pola la vien fora lungo el mar. Nelle fotografie de Stoia, Valcane e Vergarola la costa la xe ancora quasi nuda. Xe assai interessanti le fotografie dela costa polesana dei tempi quando che la strada del Lungomare no la esisteva ancora. La strada costiera che dopo gaveria ligà Valcane con Valsaline la xe stada verta solo a metà dei anni Trenta – le fonti indica el 1936 o el 1937 – e per questo nele fotografie più vecie el mar e le grote se slonga senza quela strada che ogi ne par quasi una parte naturale del paesagio. La strada alora se ciamava Strada Litoranea e dopo la guera Šetalište Mašere i Spasića.

Bisogna anche dir che el rimboschimento dela costa, del Lungomare, coi pini, el xe comincià nel 1947 col lavor volontario dei giovani. Per questo in certe fotografie xe ‘sai dificile capir, solo dala forma del teren e da un per de case, de che parte dela costa se trata.

Insoma, nele fotografie no xe la strada de ogi che la segui bona parte dela costa, no ghe xe i auti e la serie de case che vdemo adesso. La gente sla e senta sule grote, ai bagni se va a pie, in barca in bicicleta e in moro (in auto in tei fotomontagi), el mar el par quasi un prolungamento, una verada dela cità. Una fotografia la mostra „ragazzine sconosciute al bagno di Stoia“, un'altra una compagnia a Valcane nel 1944. De Vergarola xe restà un momento che, guardà con i oci de ogi, el ga tuto un altro peso.

Un giorno d’estate diventà tragedia

A pagina 58 ghe xe un grupo de nudadori dela Coppa Scarioni a Vergarola el 18 agosto 1946, proprio el giorno dela tragedia – l'esplosion dele mine – che qualche ora dopo gla averia segnà per sempre la storia de Pola.

Nela fotografia in basso ghe xe Mario Angelini, nato a Rovigno ma residente a Pola, alenador de nuoto e pompier. Istra24 de lui gaveva xa scrito nel grande raconto-testimonianza de Bruno Castro – la fotografia in alto dela pagina xe proprio de sua proprietà – che a 14 anni el iera proprioa  Vergarola e per fortuna el xe sopravissù al'esplosion. Angelini quel giorno iera a Vergarola e el ga aiutà i feridi; xe restada anche una fotografia straziante dove che el prova a socorer una muletta gravemente ferida. El iera el nono del nostro fotoreporter de Istra24 Manuel Angelini.

La fotografia del novo album, in sto modo, la ciapa tuto un altro peso: la mostra un omo al bagno pochi momenti prima che una normale giornata d'estate la diventassi una dele giornate più tragiche dela storia de Pola.

La coridora Fanny Chodorowski al „Drosina“ prima del „Drosina“

Una picia storia a parte, lungo l'album, xe quela de Fanny Chodorowski. Xe proprio ela a verzer la parte fotografica del libro: in un fotomontagio del 1927, la giovane Fanny la xe sentada ai comandi de un aeroplan e poi de un auto disegnai, in quel tipo de fotografia scherzosa che cento anni fa evidentemente gaveva un poco la funzion dei filtri fotografici de ogi.

Fanny la iera nata a Pola el 22 aprile 1908, in Via Giulia, de mama italiana e papà polaco de Cracovia, come che decenni dopo la ga scrito anche ela ricordando Pola. Sie anni dopo quel „volo“ davanti al fotografo, la trovemo de novo in movimento, ma questa volta per vero : el 24 maggio 1933 la partecipa a una gara de corsa e la vinzi la medaia d'argento.

Xe interessante ossservar che la gara se ga svolto nel complesso sportivo nato con la grande modernizazion de Pola dei primi anni Trenta, nel posto dove ogi xe el stadio „Aldo Drosina“. El progetto del centro sportivo Campo del Littorio, col campo de calcio, la pista de atletica, i campi per i sport minori e due campi da tennis, el xe sta fato nel 1931 da Guido Brass, alora diretor del'Uficio tecnico comunal. Per questo la fotografia dele atlete no la xe solo un ricordo sportivo: la ne mostra anche come el novo impianto sportivo dela cità el xe diventà subito un palcoscenico dela vita de ogni giorno.

La festa de l'uva e tante altre “capsule del tempo”

El libro el xe pien de tante picie capsule del tempo: el re d'Italia Vittorio Emanuele III in autoa Pola el 3 febbraio 1919; i polesani in festa ala, una volta famosa e ogi sparida, „Festa dell'uva“ del 1930; le operaie dela Sartoria „Unione“ de Pola – nel libro xe publicada anche la reclame dela sartoria – una gita nei anni Trenta; classi de scola con decine de fioi; gite sula neve, con tanto de sci, pensè un fià, a Pisin nel 1947; giocadore de palcanestro al Pattinaggio in tei anni Cinquanta.

Ghe xe perfino el ricordo dela discoteca „Ofelia“ in via Dobrich, che alora tanti ciamava ancora „via Besenghi“ (ogi via Besenghi, dal poeta de Isola, la xe stada spostada verso el Parco dela Marina). Nada Brussich la se ricorda del 1969, dele luci colorade, dei Beatles, dei Rolling Stones, dela musica italiana, del rock'n'roll e dei lenti: un posto che, come che la disi, iera „un club per amici e amici de amici“.

Un libro su coem che se viveva a Pola

El valor più grande del libro forsi xe proprio questo: quele fotografie no xe stade fate pensando che un giorno le saria diventade storia. Qualchedun ga semplicemente fotografà le amiche, un fio, un bagno, una torta, una moto o una passegiada de domenica. Storia le xe diventade dopo.

La festa de l'uva

El material xe sta dà dale famiglie Angelini, Brecevich, Brussich, Carloni, Castro, Cergnul, Cnapich, Canevari, Emer, Golob, Ignaz, Hapacher-Barissa, Lassich, Lenassi, Lizzul, Marsi, Menin, Milotti, Odoni, Palaziol, Paliaga, Pavletich, Perucich, Putniga, Sidari, Slacki, Tomasi, Palermo e Zuccon. Senza el contributo de tuti lori questa Pola del libro no se poderia più veder.

E per questo, ala fine, „Albo dei ricordi dei polesani“ no xe tanto un libro su come che Pola iera, ma su come che a Pola se viveva. E questo che da un valor grando.

Autrice dei testi e caporedatrice xe Tamara Brussich, in redazion xe anche Alessandro Lakoseljac Ukmar, el progetto grafico xe de Teddy-Lee Akelić: El libro el xe sta stampà dala stamperia  MPS in 400 copie.