Elessioni UI: poca concorensa, tanti segi già assegnadi, ma votar necesse est

Si, ale elessioni del l’Unione Italiana del 31 magio ghe sarà un fià de concorensa per un posto in Assemblea, ma no sel pol dir proprio che uno ghe vendessi anche l’anima al diavolo per diventar consiglier UI. In tuto se ga presentà 107 candidati par 76 segi disponibili. In certe Comunità  xe più candidati che el numero de segi e vol dir che i se darà bataglia (un ben per la democrassia), ma in tante altre, (ben 32) el numero dei candidati el xe preciso de quel dei segi de assegnar; vol dir che chi se ga candidà el sa xa de gaver vinto. E tra queste xe anche Comunità grandi o storiche come quele de Rovigno, Piran, Sissan, Galesan, Verteneglio.

Xe de spiegar che l’Assemblea UI la xe formada da consiglieri eleti in tele le singole Comunità dei Italiani che i sarà ciamadi a rapresentar. Tuta la comunità italiana de Croazia e Slovenia la forma un’unica circoscrision eletoral solo nel caso de l’elezion direta del presidente de l’Assemblea de l’Unione Italiana e del presidente de la Giunta esecutiva de l’Unione Italiana.

Per sti do incarichi se ga candidà, rispetivamente, Marin Corva (fin ‘desso presidente de la Giunta esecutiva UI) e Paolo Demarin, che nel mandato ancora in corso el xe stà presidente de l’Assemblea UI. El presidente de l’Unione, Maurizio Tremul, no ‘l se ga candidà per una dele do funsioni a elezion direta, ma el risulta invesse come candidato unico per l’unico segio disponibile in tela Assemblea UI per la CI de Bertocchi. E qua xe de dir che per regolamento interno, co i do presidenti eleti diretamente i xe tuti do citadini del stesso Paese (nel caso de Corva e Demarin la Croazia), quel de l’Assemblea el vien obligatoriamente eleto da l’Assemblea stessa fra i consiglieri che i xe cittadini sloveni. Uno dei sloveni xe Tremul.

Xe de dir ancora una roba: in tuti i circoli se voterà solo per i consiglieri de l’Assembla dell’Unione, in certi se voterà anche per i consiglieri del stesso Circolo (come nel caso de Dignan), in altri per i consiglieri del circolo se ga xa votà sto anno (Buie, Rovigno), in altri se voterà presto (Sissan) e in altri ancora se voterà per el rinovo de l’Assembea ‘pena sto altro anno (Pola).

Dito questo, parlemo solo delle elessioni per l’Unione. Fra le Comunità dei Italiani con più candidature che posti disponibili in tel’Assemblea de l’UI spica Fiume, dove 14 candidati i concori per 6 segi. Situasion competitiva anche a Umago, con 7 candidati par 3 segi; a Piran i candidati xe 6 per 3 segi, a Capodistria e Dignan xe 4 candidature par 2 segi ciascuna. A Pola, 7 candidati i se contendi 6 posti in Assemblea. In un per de Comunità sarà “sfide direte” con due candidati per un solo segio disponibile. Xe el caso, fra le altre, de Ancaran, Cherso, Lussinpicolo, Momian e Orsera, ma anche Visinada, indò che i candidati xe tre.

Sto altro sabato parleremo un fia’ de qualche candidato. Giuntemo solo che Corva e Demarin, che i concori per el posto dei due presidenti eletti da tuti i ‘taliani de Croazia e Slovenia, anche se i xe candidati unici, i farà lo stesso incontri preeletorai. Probabilmente i animerà la gente de andar a votar perché in tele ultime elessioni iera andà a votar solo el 16% circa de quei che gaveva dirito, a diferensa del quasi 90% che iera andà ale urne in tel 1991, ale prime elessioni democratiche della nova Unione.

Eco le date:

Martedì, 19 de magio, ale sei de sera: in tela Comunità dei Italiani de Abbasia, incontro con i soci dele CI de Abbasia, Fiume, Laurana e Draga de Moschiena.

Mercoledì, 20 de magio, sempre ale 6 de sera: Comunità dei Italiani de Albona.

Giovedì, 21 de magio, sempre ale 6 de sera: Comunità dei Italiani de Pisin.

Venerdì, 22 de magio, ale sei de sera, a Palazzo Manzioli a Isola, incontro con i soci dele CI de Isola “Dante Alighieri”, Isola “P.B. Ughi”, Piran, Capodistria, Bertocchi, Ancaran e Crevatini.

Lunedì, 25 de magio, ale sei de sera; Comunità dei Italiani de Levade-Grisignana.

Martedì, 26 de magio, ale sete de sera: a Comunità dei Italiani de Rovigno incontro con i soci dele CI de Rovigno e de Valle.

Giovedì, 28 de magio, ale 6 de sera, ala Comunità dei Italiani de Umago incontro con i soci dele CI de Umago, Matterada, San Lorenzo-Babici e Salvore.

Venerdì, 29 de magio, ale sei de sera, ala Comunità dei Italiani de Pola, incontro con i soci dele CI de Pola, Dignan, Galesan, Fasana e Sissano.