GHE SOMIGLIEMO DE PIÙ AI NOSTRI NONI O AI NOSTRI NIPOTI? Son fio del rock'n roll, ma ogi che xe Pasqua me piasessi sai magnar una feta de pinza con mia nona

Ogi vivemo in un’epoca cariga de nove tecnologie che le ne ga cambià la vita: podemo parlar in video in tempo real con i parenti de l’Australia, podemo tacar la machina de lavar fin che guardemo un film restando comodamente sentai in cine, i dotori i pol far operassioni chirurgiche sensa usar el bisturi,  i motori de ricerca de internet i ne dà la possibilità de scoprir in 1 minuto, per esempio, chi che xe l’architeto dela cesa de San Biagio de Dignan sensa dover andar in biblioteca o senza dover andar sul posto e domandarghe al prete, sperando che ‘l sapi la risposta. Tanto per dir una roba privata, in Argentina i ga messo online i registri dei imigrati, cussì go rivà saver el giorno giusto e anche con che nave mio nono Giovanin xe rivà a Buenos Aires nel 1928, imbarcandose a Trieste.

Ste nove tecnologie, specialmente co se parla de gioghi online, le sta cambiando in maniera tremenda el modo de viver dei più giovani che, pur gavendo modo de comunicar con tuto el mondo, i xe tropo spesso serai in quei per de metri quadri dela sua camereta, coi oci puntai in tel telefonin o sul monitor.

Epur – ben ga osservà el mio amico Nico de Rovigno – xe stada la generassion dei nostri noni a viver quela rivolussion tecnologica che la cambiado quel modo de viver che el pareva esser sta quasi fermo per secoli, o adiritura millenni: xe stai i nostri noni e bisnoni a veder per primi un treno e un aeroplan, a gaver la corente eletrica e ‘l gabineto in casa, a poder comprar la radio, la television, la machina de lavar, a risponder e ciamar col telefono,  a guidar la moto e l’auto. Ma lo stesso, tuti sti cambiamenti, che i xe stai per vero epocali, “de dentro” no i li gaveva cambiadi più de tanto.

A sto punto xe de tirar in balo el filosofo tedesco Nietszche e ‘l suo famoso dito “Dio xe morto”, scrito nei sui libri “La gaia scienza” e “Così parlo Zarathustra”. Ogi xe Pasqua, casomai Cristo xe risorto, no morto. Indiferente, quel che intendeva Nietszche no ‘l va leto cussì come ghe ‘l xe scrito: lui intendeva dir che per secoli l’educassion, la morale e anche le abitudini de ogni giorno de l’omo le iera impensabili sensa tegnir conto dela ”presenza” de Dio. Nel modo de pensar, de lavorar, de magnar, de vestirse, de comportarse coi altri, de saludar…

In altre parole, cavando dal vocabolario e dale coscienze la parola “Dio” – qua se dovessi dir Dio come “paradigma” -  saria imposibile imaginar e capir el mondo nei ultimi Duemila anni. Invesse, dal Novecento in poi, con le ideologie de sinistra, la tecnologia, el giornalismo libero e militante, i movimenti de emancipassion (dei operai, dele done) e tuti i novi valori che i ribaltava gran parte de quel che la cesa la gaveva predicà e cementa per secoli, una grande parte de l’umanità la ga comincià a viver un tipo de vita che per capirla se podeva far a meno dela parola “Dio”, ma non se podeva far a meno dele parole “libertà”, “soldi”, “individualismo” ma anche “elezioni”, “democrazia”,  “libera informassion”,  “partecipassion de tuti ala vita sociale”, el “poder sceglier”. E poi, in tela storia de l'umanità, oltre a l'anima torna el corpo.

Poi, dope el 1990, co le ideologie e quell’idea de Giorgio Gaber “libertà è partecipazione” le xe andade a remengo, xe vegnudi a gala novi paradigmi: infati, la vita dei giorni nostri la xe regolada dai paradigmi “edonismo”, “successo”, i famosi “cinque minuti de gloria” de Andy Warhol e specialmente “internet” e “mobilità”, nel senso che un telefonin ne consenti de far mile robe sensa tegnir conto del logo indò che se trovemo. Per concluder, per millenni la vita de l’omo la saria stata incomprensibile sensa la parola “Dio”, quela de ogi la saria incomprensibile sensa la parola “telefonin” o, meo, “smartphone”.

A volte me domando se la generasion nata dopo la seconda guera mondial, che ogi la ga tra i 45 e i 75 anni, la ghe somiglia de più ai sui noni o ai suoi nipoti. Con tute le diferense tra schermo piatto e smart TV e una Gorenje in bianco e nero, se i nostri nipoti i guarda la TV, la guardavimo lo steso anche noi, ma quasi nissun dei nostri noni. Con tute le difernese tra i impianti luci e audio de ogi rispeto a quei de Woodstock, i nostri nipoti i va ai concerti dele star musicali, ma a questo tipo de concerti andavino anche noi, ma i nostri noni no. Con i nostri nipoti podemo parlar de Micahel Jackson ma anche de Dua Lipa, ma con i nostri noni no gavessimo mai podù parlar dei Beatles e dei Rolling Stones e scoltarli insieme. Co i nostri nipoti podemo parlar de robe intime, coi nostri noni mai, iera tabù. Co i ga problemi a scola, noi difendemo i nostri nipoti, no difendeno i professori, roba che i nostri noni no i gavessi mai fato. Quasi quasi anche se vestimo come i nostri nipoti: a volte, a giudicar dai vestiti, co ti le vedi insieme no ti riconossi più quala che xe la nona, quala la mama e quala la nipote.

Vol dir alora che ghe somigliemo de più ai nostri nipoti che ai nostri noni? Magari a causa de un giovanilismo che ‘l volessi cancelar el pasar del tempo, come che risulta dal caso dei vestiti che go nominà prima?  De una parte si, anche perché i nostri nipoti i xe, per bona parte, anche el risultato dele nostre scelte e dei nostri valori. Noi, tra i 45 e i 75, cussì come i nostri nipoti, semo cressudi in famiglie de uno o due fioi, i nostri noni i gaveva  tuti cinque, sei, sete tra sorele e fradei. Questo xe sta uno dei quei cambiamenti dela strutura demografica che ‘l ga rivoltà el mondo come una guanto. I fioi ga finì de nasser per voler de Dio, i ga comincià nasser per voler dela dona e de l’omo. Con tuto quel che ne consegui.

El momento de rotura, quel che ne ga fato cambiar rispeto ai nostri noni (e a volte anche genitori), xe stata l’emancipassion del 1968, i masc’i coi cavei longhi e le mule in cotola curta – la  minogona –  (robe mai vista prima) e tuto quel che se podessi definir come rock’n’roll, con tute le sue conseguenze culturali e de costume. Per certi versi i nostri nipoti, cussì come noi, i xe ancora fioi del rock’n’roll, roba ufo per i nostri noni.

Epur, epur (due volte, come che diria Minoli), prima che l'inteligensa artificial AI la cominci cambiar tuto (la si che sarà "o ti son dentro, o ti son fora"), ogi xe ancora dentro de noi qualcossa che ne fa somigliar de più ai nostri noni che ai nostri nipoti anche perché, indiferentemente se semo credenti o atei, voia o no voia me par che noi, nei nostri usi e costumi, semo più cristiani del modo in cui xe cristiani i giovani de ogi. E questo no xe un giudizio de valor, xe solo una considerazion, un modo per spiegar a mi stesso come mai ogi me gavessi piasso sai spelar un ovo  e magnar una feta de pinza con mia nona. E voi?