GUANTONI E GIRASSOI: Chi iera Aldo Banovac

I nomi del vie de un logo (odonomastica) i xe un fià come un picio libro de storia, un sunto dei personagi, dei loghi e dei fati che i ga determinado la fisionomia e l’identità de quel logo. Anche se xe tanta gente, per esempio a Pola, che i sta in via Ottomaro Heininger e che no i ga idea chi che el iera. Per no farve guglar ve digo che el iera un architeto e ingegner edile che ‘l ga fato, tra ‘l 1935 e ‘l 1937, quel bel palasso futuristico a Giardini, quel de color avana a destra del cine Valli, co se lo guarda dala parte dela strada.

Tra la ventina de personagi nati a Pola (anche se quei nati in altri loghie vissui a Pola i xe sai de più, tipo Mate Balota, Zvane Črnja o Domenico Cernecca) e che i trova el suo nome in tel stradario de Pola, vicin a quei bastansa conossudi (el musicista Antonio Smareglia, el podestà Lodovico Rizzi, i antifascisti e combatenti Alfredo Stiglich, Luigi Scalier, Sergio Dobrich, Slavko Grubiša, Lino Mariani, Božo Gumbac, Ivan Belas, Josip Poduje, i fradei Čeh, Levak e Leonardelli, el combatente de Spagna Riccardo Rohregger, el socialista Francesco Sponza, el stampador Josip Krmpotić el l pitor Antun Motika) xe anche un nome sai conossudo tra le generassioni più anziane (o tra chi che segui el sport), ma che ghe disi poco o niente a tanti  Polesani de ogi: Aldo Banovac. El ga una via a Veruda

In una cità che per tanti anni la xe stada la capitale dela bocs in Jugoslavia, in una cità indò che xe cressù e vissù el campion del mondo Mate Parlov, no conosser el nome de Aldo Banovac xe quasi come dir una bestemia. Anche se no ‘l xe sta mai campion jugoslavo, el xe sta campion croato, nazionale jugoslavo ma,  come che conta tuti, un grande omo, un esempio per tanti giovani e sai bravo maestro. Insoma, le fondamenta ma anche el muro maestro dela bocs a Pola. Tra l’altra, a Banovac ghe va una grossa parte del merito de gave fato diventar Mate Parlov campion olimpico tra i diletanti e campion del mondo tra i professionisti.

Nato come Eraldo Banovaz a Pola in tel 1931, za soto i inglesi el vedi bater i bocseri polesani  Otto Govich e Tullio Rocco (allenai, in tela sezion de bocs de l’ Unione sportiva operaia, da Giovanni Nincevich) e vinser contro aversari de Milano, Trieste, Fiume e quei dei militari aleati. In tel 1947 se fonda el club de bocs “Proleter” che in tel 1948 el cambia nome in Boksački klub Pula. Aldo se inamora de sto sport e za nel 1950 el diventerà campion croato dei pesi piuma. Dieci anni dopo el conquisterà el titolo de campion croato in tei pesi superleggeri.

Con Aldo Buršić, Enzo Bestulić, Enzo Peruško, Odogaso, Đani Rojnić e poi Vlado Vranješević, Banovac xe sta el bocser che ghe ga verto la strada a Parlov e ai campioni jugoslavi del bocs in tei Anni Ottanta. L’altro passo importante lo ga fato in tel 1964, co insieme a Aldo Buršić el ga fato verzer la scuola de bocs per i giovani.

In 20 anni de cariera el ga batù più de seicento incontri: in qui anni a Pola se bateva bocs ogni sabato, in Patinagio dentro, in Patinagio fora, perfin in tel stadio o in Arena. Banovac, bocser tecnico ma sai forte (tuti i gaveva paura dei sui tremendi colpi de destro) el ghe voleva cussì ben al ring che per ben cinque volte el ghe ga dà l’adio ai guantoni, per poi tornar de novo. De quanto che el sia stado rispetado lo dimostra anche una foto scatada a Stoia indò che se lo vedi col bocser polesan Otto Govich e con el campion del mondo, italian, nato a Isola Nino Benvenuti.

foto: Ester Carloni

Aldo Banovac xe morto in tel 1982, a soli 51 anni. El 13 setembre, l’altro sabato, iera 43 che no’l xe più. Per pura coincidensa quel giorno co guardà un video su de lui fato oto anni da suo nipote Jani Zombori Banovac. Xe un bel documentario de 44 minuti e quel che me ga impressionà più de tuto xe sta veder che in tel tempo libero el disegnava, e ben, quadri: nature morte con girasoi, scampie granzi, vasi de fiori, panorami. E me xe vegnù subito in mente che la bocs la xe conossuda come “noble art”, ovvero arte nobile, che la ga lo scopo de far vinser un pugile, no de massacrar l’aversario. La brutalità, tipica de tanti sport de ogidì derivai dala bocs indò che i due combatenti i se onsi con mani e gambe in una gabia, no la ghe interesava a Aldo Banovac.  Come quei de Van Gogh, i girasoi de Aldo Banovac i iera simboli de luce, contentessa, vita e l'amicizia