Homo sapiens: Semo cussì inteligenti, cussì bravi a distruger l’ambiente

A Bibići, vicin de Sanvincenti, xe ani che ghe xe un grando scovasson ilegal su tereni privati, dove che una dolina carsica la xe stada pian pian impinida con ogni sorta de scovassa. Là dentro i ga butà material de costruzion e de scavo, resti de cemento e “beton”, roba ingombrante, machine de lavar e frigoriferi veci, lana de vetro e anche amianto. I testimoni i ga contado che, in certi periodi, là rivava anca 20-30 camion al giorno. Del caso xe stado informà anca l’Ispetorato de Stato croato.

A Gospić, el caso  tonelade de rifuiti pericolosi butadi ilegalmente, con la presenza de PFAS – sostanse chimiche persistenti e pericolose per l’omo, ciamade anche “inquinanti eterni” – trovade in tele acque sototerra dela zona, el xe sta discusso giovedì e venerdi croato. Dopo quasi 18 ore de discussion, la magioranza guidada dal HDZ ga respinto tute quatro le conclusion proposte dal presidente Zoran Milanović, aprovandoghene invessee undise de sue. Una scelta che no la va critica solo per l’aroganza de l’HDZ anche in un caso cussì delicato e pericoloso per la salute dela gente, ma specialemnte perché, co Milanović domandava invesse interventi imediati, le conclusion dela magioranza no fissa nisuna data per cominciar la bonifica e no prevedi gnanca un coinvolgimento direto dei abitanti de Gospić, limitandose, tra l’altro, a domandar al Governo un rapporto sui progresi entro 90 giorni.

Ma vedemo ancora un caso. El centro regional per el tratamento delle scovasse de Castion (Kaštijun) el paga prima de tuto una scelta teritorial sai discutibile: l’impianto fato per servir tuta l’Istria el xe stado messo proprio in fondo ala penisola, tacà a Pola, Medolin e altre dele zone turistiche più importanti. Cussì Pola e l’Istria del sud se ciapa sul gropon anche le svovasse che le riva da Parenzo, Umago, Rovigno e dal resto dela penisola, con una pression sai  forte d’estate, co xe i turisti: nel 2024 a Castion xe rivade più de 70 mila tonelade de scovasse indiferenziade, col picco proprio nei mesi estivi.

Ai problemi dela posizion se giunta quei struturai. Per lavorar come che se devi, l’impianto xe stado pensado per tratar in condizioni otimali circa 390 tonelade al giorno, ma ogi in tei pichi estivi se xe rivadi fin a 500. Castion, inoltre, no ‘l ga un impianto per tratar le bioscovase che el continua a rivar mescolà col resto: tropa umidità xe un dano per el tratamento e no se riva a produr material bastansa stabilizà, cussì odori tremendi da anni i ghe rovina giorni e noti dela gente che sta là vicin. El risultato xe un sistema regional dove l’Istria del sud, proprio durante la stagion turistica, la se ciapa una granda parte dele conseguense danose per l’ambiente de una gestion inadata e mal calibrada per le scovasse de tuta la penisola.

Questi xe solo tre esempi, tuti locali o nazionali, de quanto che l’omo el xe bon  de cambiar l’ambiente dove che el vivi, fin a renderlo qualche volta pericoloso per la sua stessa esistensa. E qua vien fora uno dei grandi paradossi dela nostra specie.

L’omo no ‘l ga el  pel del orso polar per resistir al fredo, né i sistemi dele bestie del deserto per soportar un caldo estremo. No gavemo artigli, corazze, no semo sai svelti de corer e gnanche forti per copare e magnar altre preede. E pur semo rivadi a stabilirse praticamente a ogni latitudine dela Tera. La nostra vera specializazion xe un’altra: l’inteligensa. Dove che el corpo no basta, l’omo se fa vestiti, case, riscaldamento, aquedoti, strade, ospedai, machine. No el se limita a adatarse al ambiente: el cambia l’ambiente perché sia l’ambiente a adatarse a lui.

E xe proprio qua che la sua più granda qualità la diventa el suo più grande difeto.

L’inteligensa ne ga permesso de sopraviver; l’avidità e, no poche volte, la stupidità ne ga insegnà a doperar quela stessa inteligensa per consumar assai più de quel che ne servi, produr roba che dopo no savemo dove meter e scarigar da qualche altra parte el conto del nostro benesser. La scovassa butana nela dolina de Bibići, quel pericoloso sconto soto tera a Gospić o le cinquecento tonelade che pol rivar in una giornada d’estate a Castion le ga una roba in comun: qualchedun ga un vantagio subito ma qualchedun altro, magari ani dopo, el paga el conto.

In natura ogni specie la cambia, in qualche maniera, l’ambiente dove che la vivi e certe specie le pol far anca dani a un ecosistema. Ma l’omo ga qualcosa che rendi el suo caso completamente diverso: la capacità tecnologica de cambiar el pianeta su una scala enorme e, in tel stesso tempo, l’inteligensa per capir almeno in parte che el sta fassendo anche danni.

E forse xe proprio questo la roba più inquietante. No semo pericolosi per el pianeta perché no savemo quel che femo. Tante volte lo savemo sai ben. Savemo che l’amianto xe pericoloso prima de soterrarlo. Savemo che i PFAS resta nel ambiente. Savemo quante tonelade de scovasse pol tratar ben un impianto prima de mandarlo fora giri. Gavemo legi, analisi chimiche, limiti, ispetori, università e tecnologia suficiente per capirlo. E lo stesso riva qualchedun che decidi che costa meno scavar e incarigar de scovasse un buso. In una società che, come cantava Francesco Guccini, la xe dominada da “una politica che è solo far carriera” e sai poco interesse per el ben publico.

Eccolo qua, forsi, el vero paradosso del Homo sapiens: l’inteligensa la ghe ga permesso de conquistar quasi ogni ambiente dela Tera, ma no la ghe ga ancora insegnà definitivamente a no distruger proprio i loghi dove che el ga deciso de viver.