I ghe ga dà una nova man de 'sfalto nero in via Sergia. Dopo le mutande a l'Arena, Pola combina ancora una capela

A Pola xa da cinquanta anni circola la storia che la via Sergia  - la strada central del nucleo storico de Pola che la va da l'Arco dei Sergi a Piazza Foro – la sarìa stada 'sfaltada in una note sola, in tei Anni Settanta del Novecento, perché de là saria dovuta passar la Jovànka, la moglie de Tito, e no se voleva corer el risc’io de farghe finir un taco dela scarpa in tele fughe o in tei busi del vecio lastricato de piera.

Desso che ghe penso, sto fato de far robe grandi in tuna note sola xe un vizio local: un'altra legenda la disi che l’Arena la gavessi fata le fate, anche lore in un note sola, portando a Pola le piere ingrumade sul Monte Magior. E l’Arena la sarìa restada sensa el teto perché se gaveva fato giorno, e ste babe con le ali le podeva lavorar solo col scuro. Ma tornemo in via Sergia.

Ogi i storici i disi che la storia del ‘sfalto per la Jovànka la sarìa una bala bela e bona, e pol darse che la colada de ‘sfalto sula strada fata dai Romani no la c’entri niente con Tito. Ma se proprio volevemo colegar Tito col sfalto, sta disgrassia la podessi esser capitada nel 1971, co ospiti del Maresciallo a Brioni iera Elisabeth Taylor e Richard Burton (che el gaveva interpretado Tito in tel film “Sutjeska”, proietado proprio in quel anno al Festival in Arena). E se Tito gavessi volù farghe veder ala Liz la citavecia de Pola, eco che tornava a valer le ragioni del taco, come in tel caso dela Jovanka nata Budisavljević e sposada Broz.

Un'altra data possibile podessi esser el 1975, co a Pola xe vegnudo el presidente egizian El Sadat. Lo gavemo spetà in riva, vestidi da pionieri, sventolando bandierine de carta. E sicome che i resti in Egito i xe più veci dei quei de l'epoca romana, forsi Tito se gavessi podù vergognar del poderghe mostar a Sadat solo le "recentissime" piere romane, cussì che in Corso el ga fato calar el sfalto per ribaltar la fersora e far veder che semo moderni.

Indiferente dale ragioni de chi e perché ga combinà la capela, xe ormai xe meso secolo che i Polesani i se trova con el Corso sfaltà. Si go, scrito “Corso” perché, a diferensa dei Croati che i la ciama Prvomajska (via Primo Maggio, cussì ribatesada in tel 1947),  i Taliani de Pola la via Sergia i la ciama Corso. Da no confonder con “korzo” che xe la parola usada dai Polesani croati per i Giardini.

Ma tornemo in strada. Mi no so se prima de l’asfalto quele iera piere le iera de calcar istrian, de porfido, o de basalto come a Roma. E no so gnanche se le stava là da l’epoca romana, o se magari sora de quele romane, magari mile anni dopo, i Veneziani ghe ne ga posado de altre, o se i Austriaci in tel Otocento i ga cavà tuto per meterghene de nove e de suo gusto. Ma so de sicuro che ste piere, sto lastricato el iera sai più in sintonia con l’anima storica e mediteranea de Pola. Là el sfalto nol c’entra niente. Né a Pola, né in nissun simile logo al mondo.

El fato grave xe, che morti Tito, Sadat, la Jovànka, Liz Taylor e Richard Burton, in più de cinquanta anni chi che comanda in municipio in Piazza Foro no solo no ‘l xe sta bon de cavar el sfalto e rianimar le piere, ma, roba de pochi giorni fa, i ghe ga dado un’altra man de sfalto, nero com el carbon! El xe un vero pugno in tel ocio. E sta roba la xe sta fata con la benedizion dela sovraintendenza ai beni culturali (i famosi “konzervatori”) da dove che ne xe rivà anche el comento che tanto se trata de una soluzion provisoria e che col tempo el sfalto el sbiadirà.

A parte el fato che co de noi se disi che una roba la xe temporanea, alora vol dir che semo sistemai con quel che passa el convento per altri 50 anni, mi no rivo capir una roba. Ma uno che ‘l xe sindaco, no ‘l preferiria esser ricordà per gaver fato qualcossa de bon, piutosto che per gaver combinà capele? Senza anda lontan per el mondo, no xe meo esser ricordai come Lodovico Rizzi che  co el iera sindaco de Pola, oltre a far partir el tram, el ga fato far l’Ospedal, el Liceo, el Mercato coperto, i impianti dele fogne e del gas? O come Luciano Delbianco, che el ga rivà risparmiar Pola dale distruzioni che, prima de andar via, podeva far l’Armata jugoslava in tel 1991? E alora, el sindaco Peđa Grbin el ghe tien proprio cussì tanto a esser ricordà come el sindaco del “errare è umano, perseverare è diabolico”, quel che ‘l ga fato calar una man de sfalto nero là indove che casomai el sfalto bisognava cavarlo?

E xe de dir un’ultima roba. Mentre che a Pola se deturpa via Sergia con el sfalto, a Parenzo i meti a posto la riva usando le piere, come che Dio comanda. Parlemo de quela stessa Parenzo indò che se trova la Basilica Eufrasiana, tutelada da l’Unesco e finida in tela lista del Patrimonio storico e cultural de l’umanità. Una lista che come gnente la sarìa stada a portada de man anche per l’Arena de Pola, ma che invesse adesso se la podemo solo sognar, dopo che in tela metà dei anni Ottanta a l’Arena i ghe ga messo le mutande. Cossa dir, a volte a Pola semo proprio dei boni de gnente.