IN GIRO PER L'ISTRIA: La grota de Romualdo, là del Canal de Leme

Sul versante sud del Canal de Leme, che saria quel del Monte San Martin in tel teritorio comunal de Vale, se trova la Grota de San Romualdo. La sta a ben 128 metri de alteza sul livel del mar, da quel pra’ indo’ che una volta iera le case de legno dei vichinghi del set del film “Le lunghe navi” (con Richard Widmark, Sidney Poitier e Beba Lončar) parti una salita dura e streta che dopo una ventina de minuti de rampigada con la lingua penzolante e ‘l fià soto i tachi la porta fin ‘sta grota.

Xe una grota alta da un minimo de uno a un massimo del cinque metri, larga da due a sete metri, con un coridoio interno no drito, ma a serpentina, lungo più de cento metri.

La grota de San Romualdo la xe famosa sia per motivi religiosi, sia per motivi paleontologici. Quei religiosi, come che se capissi dal nome, i xe ligadi a San Romualdo. Nato a Ravenna tra el 951 e ‘l 953 e morto a Fabriano nel 1027, nel 1023 el fonderà l’ordine monastico dei Camaldolesi, che i saria una specie de Benedettini.

Proprio come Benedetto Da Norcia, fondator dei Benedettini, Romualdo credeva che uno dei modi più veri de dimostar la fede in Dio iera la solitudine, el star siti, insoma la vita da eremita. Per questo, co verso l’anno 1000 el xe vegnù in tel monaster benedettin de San Micel de Leme (Kloštar), el xe ben presto andà a viver in tela grota del Canal de Leme indò che ‘l xe restà per due anni e mezo. Dopo el ga fondà tante comunità eremitiche, la più famosa xe l’eremo de Camaldoli in provincia de Arezzo, in Toscana. Xe ben saver che fin al 1942 la gente de Vale e Orsera andava in procession fin a la grota.

Per quel che riguarda la paleontologia, bisogna tegnir presente che in tela zona de Leme se ga trovà segni de presenza umana xa dela preistoria, a partir da quele de  l’omo de Neanderthal  che qua el xe vissù tra i 200 000 e i 40 000 anni fa. In tuti quei secoli e mileni l’Istria la ga avudo anche la glaciazion (periodo de grande fredo) cussì che in tela grota xe sta trovai i resti di ben 49 specie de bestie, anche de bestie dela stepa, tipiche del nord indò che el clima el xe sai più fredo.

I segni più importanti li ga lassadi el nostro progenitor, l’Homo Sapiens (se ga trovà un dente) vissudo in zona Leme circa 30 mila anni fa. Ma no ‘l xe solo vissudo, el ga lassà anche el segno dela sua inteligensa e creatività. Nel 2018, Darko Komšo, za quela volta e anche ogi diretor del Museo Archeologico de l'Istria, in tela Grota de Romualdo el ga trovà nientemeno che 44 piture murarie, fate ben 12 mila anni prima de quele sai più famose (ma ancche più nitide e meo conservade) dele grote de Altamira in Spagna e de Lescaux in Francia.  In sti disegni de color rosso se vedi omini, triangoli, simboli e bestie, tra le quali un bisonte.

Xe de dir infine che tuta la zona de Leme la xe rica de castellieri preistorici. Sora del logo indò che finissi el mar dito Cul de Leme, za nel neolitico (durado dai 10.000 ai 3.500 anni fa),  xe sta fondà el Castellier de Leme (Limska gradina). Quel de San Martin di Leme (Sveti Martin) el xe invesse de l’età del bronzo (tra i 3.500 e 1.200 anni fa). Tuti due i vegnerà conquistai dai Istri in tela età del fero, circa 1.100 anni fa.

Insoma, de ragioni per una gita al Canal de Leme ghe ne xe bastansa. E poi dentro xe anche bel fresco