L'arte sacra de Dignan la xe bela e miracolosa anche per chi che no credi, la dovessi divetar logo de pelegrinagio

Savevo xa che a Dignan se conserva una colession de arte sacra, con le famosissime mummie, ma no gavevo idea de quanto bela e rica che xe sta colession. La go visitada, dopo sai anni, pochi giorni fa. E me xe vegnù un colpo, ma in positivo, per la meraviglia.

Scrivendo dei dai dati concreti de questa colession no ve dirò niente de novo, podè trovarli su internet e in tei cataloghi. Quel che me interessa xe dar un picio comento ala fine. Ma, senza la pretesa del voler essere original, ve fasso una sintesi dei sti dati.

La colession la se trova in tela cesa de San Biagio, una dele più bele e de sicuro la più granda in Istria. La xe stada fata in stile neoclassico tra el 1760 e 'l 1800, anche con i soldi dei fedeli locali. Infati, i Bumbari de quel’epoca i destinava el 10% dei tuti i sui prodoti agricoli per la costruzion dela cesa e, dopo che la iera finida, el 10% del vin e de l’oio d’oliva per altri 10 anni.

Fatostà che in tel 1818 la cesa la iera pronta per diventar el logo indove meter una rica colession capitada a Dignan de punto in bianco, quasi per miracolo. El 23 giugno sbarca a Fasana Gaetano Gresler, un pitor nato a Verona ma che el lavorava a Venezia, dove che el piturava ma anche 'l’ insegnava ala Academia de Bele Arti.

Pareria che dopo la caduta dela Serenissima nel 1797 e la libeciada anticlerical de Napoleon, Gresler gavessì messo in salvo reliquie, arredi sacri e quadri in modo de no farli finir in man dei Francesi, a l’epoca ancora rivoluzionari, che i demoliva tuto. Inoltre, xa el gaveva qualcossa de suo, el iera anche collezionista e in base a certe fonti ‘l tegniva tuto in tel palasso Lezze alla Misericordia a Venezia.

Ma qua xe de star ‘tenti: Gianjacopo Fontana, nel 1865, nel suo testo “Cento palazzi fra i più celebri di Venezia”, riferendose proprio al periodo napoleonico, el scrivi che “per questo palazzo si ha la memoria, che, primo d’ogni altro, fu messo a ruba e a sacco”.  Le ipotesi xe due: o i Francesi i ga portà via tuto, e Gresler gavessi riscatà el maltolto ricomprandolo dai Francesi, o el “messo a ruba e a sacco” podessi rifererirse anche una “scartassada” fata per man del stesso Gresler. La seconda ipotesi la se sposa 'bastansa ben con la tesi de quei  studiosi che i disi che Gresler el gavessi tentà de venderghe a qualchedun tuta sta roba, ma sicome che no ‘l ghe la gaveva fata, el gavessi portà tuto sto ben de Dio proprio a Dignan.

Perché proprio a Dignan? El motivo giusto no xe ciaro, ma pareria che lo gavessi invitado el paroco de Dignan Forlani. Quel che conta xe che con Gresler e sua moglie Maddalena in tela cesa riva ben 370 reliquie de 250 santi e tra queste un spin dela corona de spini de Gesù in passion, un tochetin del velo dela Madona, una s’censa dela croce de Cristo.

E poi xe ben sete corpi o resti de corpi mumificai, compresi quei de quatro santi. I nomi no li so a memoria, cussì ve li copio dal sito dela parochia de Dignan: “corpi incorrotti del vescovo S. Leone Bembo (+1188), del pievano Beato Giovanni Olini (+1300), della benedettina S. Nicolosa Bursa (+1512) e i resti incorrotti dell’ufficiale San Sebastiano (+282), della vergine e martire Santa Barbara (+288), della santa penitente Maria Egiziaca (+522) e l’indice destro del patriarca di Costantinopoli San Eutichio (+582)”.

foto: Manuel Angelini

La roba strana, che ne porta in odor de miracolo, xe che sti corpi i xe restai “incorrotti” o quasi anche se no i xe stai mai imbalsamai, e quei de San Giovanni Olini e de Santa Nicolosa i ga ancora tuti i organi interni! Sto esempio de conservazion, che el xe unico al mondo, el xe sta rivelado dala TAC nel 2009 fata da l’Istituto forense de Spalato.

A favor dela tesi che ‘l sarìa sta invità dal paroco Forlani, xe de agiunger che Gresler xe capità a Dignan proprio nel momento giusto co iera de decorar la nova cesa de San Biagio. Cussì lui el ga disegnà la pala che la sta de drio de l’altar principal dela cesa de Dignan, quela dela Madona con Gesù picio, San Antonio de Padova e San Antonio Abate. Suo xe anche el quadro de sant’Antonio da Padova con el giglio e ‘l libro, ogi conservado in tela colession de arte sacra.

A Dignan Gresler gaveva portado anche 18 quadri profani de vari pitori come Antonio Calza, Antonio Lech, Louis Dorigny, Jacob van der Kerckhoven, Onofrio Loth, Giuseppe Angeli e Jacques Courtois dito el Borgognone. Xe tute opere del XVII e XVIII secolo che, sai proabilmente, le fasseva parte dela colession dela famiglia dei conti Giovanelli de Venezia. E Gresler iera procurator dela vedova del conte…. Sti quadri, che fin pochi anni fa i iera sparsi per Dignan in circolo, in municipio, in biblioteca e a scola, adesso i xe tuti a Palazzo Bettica, diventado nel fratempo Museo civico de Dignan.

Xe bel saver che, fin che el stava a Dignan, Gresler gaveva per garzon quel Venerio Trevisan, tesidor e pitor autodidatta de Dignan che el se firmava sui quadri e che per la cesa de san Biaso el ga fato la Via Crucis e altri cinque quadri, lavorando poi in giro per l’Istria: a Pisin, Rovigno, Marzana, Carnizza, Hreljići e Canfanaro.

Dopo gaver firmà con el Comun un contrato de concession dela colession, Gresler el xe restà a Dignan per altri 15 anni. Dopo che xe morta sua moglie Maddalena el xe andà via, no se sa né dove né come, se dixi anche che a Dignan el gavessi fato barufa con qualchedun.

Ma quel che ogi ne interessa xe che el ga lassado una splendida colession, la grossa parte dei quei 730 ogeti sacri che ogi i la componi e che i va dal XII al XIX secolo: quadri, rilievi in piera, sculture, reliquiari, libri, gioiei, vestiti de preti, una specie de sindone. Xe de sicuro la più bela e rica colezion in Istria e anche oltre. Bravissima la guida Gianna Delton (andè a visitar la colessiion, che la ve spiegherà tuto) che la me ga dà una man per scriver sto articolo.

Anche se no se xe credenti, anche se la spina dela corona e la s’censa dela croce de Cristo le pol esser false o solo una rmenada, ga poco cossa far. El fato stesso che a Dignan ghe sia reliquie presentade in sto modo el ga un valor starordinario. Eco perché sta colession la dovessi esser proclamada anche uficialmente logo de pelegrinagio.