L'ISTRIA DE SCOPRIR: Le cascate, che meraviglia

Prima che l’estate e ‘l caldo i fassi mancarghe l’acqua, xe ancora tempo de goderse la vista de una dele belesse istriane meno conossude: le cascate istriane. L’Istria no xe solo mar e qualche montisel con sora un paeseto medieval, la xe anche una tera con i fiumi carsici, canyon, sorgenti de acqua e, apunto, cascate.

Per via del rilievo che el va su e xo, in Istria (e chi se lo gavessi imaginà?) xe più de 60 cascate. Certe le xe sai picie, altre le xe ‘bastansa alte: la più alta xe quela sensa nome in tel canyon Vela draga (Val d’Arsa) a l’interno del Parco naturale del Monte Magior (Učka), de la parte istriana. La fa un salto de più de 50 metri, ma se la pol veder solo de lontan.

La cascata Vela draga - FB

Tra tute le cascate dei bacini dei fiumi Quieto (Mirna), Dragogna (Dragonja), Arsa (Raša), quele dei torenti che i se cala in tel Alto Quarnero e quele dei fiumi carsici, tentemo de far un itinerario, nominando solo quele più bele.

Partindo dal nord dela penisola, Kotli, vicin de Hum, xe uno dei posti più simbolici de l’Istria interna. Qua el Quieto el ga scavà in tel sasso un canyon in discesa con cascate e un per de vasche naturali che le xe un spetacolo. Se vedi ancora i resti de una roda de un mulin a acqua, una volta l’omo usava anche le cascate come risorsa de energia.

La cascta Kotli - foto: Wikipedia, Drago Carlo

Kotli

Kotli pol esser, da sud est, el puto de partensa lungo Sentier dele Sette Cascate, una dele più bele passegiade naturalistiche de l’Istria. Procedendo a nord ovest verso Pinguente se incontra le cascate de Zelenšćak e Grjok, e ‘traversando due volte el fiume Quieto, poco prima de rivar sula strada tra Pinguente e Rozzo se gira a destra, verso sud est, e se incontra le cascate de Zagon, Bačva, Vela peć, Mala peć.

La cascata Vela Peć, foto: Wikipedia, Drago Carlo

Vela peć, alta 26 e larga 6 metri, a forma de fero xe caval, xe la più bela tra quel del Sentier; un fià più avanti de Mala peć se trova el ponte de piera de Napoleon sora del torente Draga, che i lo ciama anche Pivka. El xe un afluente del Quieto, no xe de confoderlo con el più grande Fiume Pivka in Slovenia.

El ponte del Napoleon sul torente Draga, vicin dela cascata de Mala peć - foto: Putna ideja

Calandose a sud, poco prima de rivar a Pisin, se trova ala cascata Zarečki krov, una dele più bele e l’Istria, generada dal fiume carsico Foiba (Pazinčica). L’acqua la casca soto una granda volta de piera formando un lagheto verde e fresco indò che d’estate la gente fa el bagno.

La cascata Zarečki krov - foto: Wikipedia, Drago Carlo

I giovani i gioga anche palanuoto, calando’diritura le porte galegianti, con le rede che se scorla co i segna un gol.

La cascata de Zarečki krov - foto: Manuel Angelini

Andando verso sud est, sula strada che da sud de Pisin la porta verso Gallignana (Gračišće) e Pedena (Pićan), se devi girar verso el paeseto de Zajci e vicin de Floričići se scopri la fantastica cascata de Sopot. El Švički potok (Rio sopot), subito dopo esser passà soto un ponte de piera, el se buta zo per 25 metri, generando una dele cascate più spetacolari in Istria.

La cascata Sopot - foto: Manuel Angelini

Sto torente el xe un afluente del fiume Arsa: el finissi sempre in te l’Arsa e ‘l se scori anche vicin de Zajci el torente Grajanski potok (Rio Graiana) che el porta l’acqua per la cascata Benkovski slap (Cascata del Graiana) alta ben 40 metri. Xe due lingue de acqua che le cala zo da un canyon carsico che el fa anche un fià de impression.

Benkovski slap (Cascata del Graiana) - foto. Wikipedia Drago Karlo

Xe de dir che la cascata Sopot vicin de Floričići no xe de confoderla con quela che porta el stesso nome, ma la se trova vicin Pinguente (e i pinguentini i la ciama Copot / Zopot) e, con  sui trenta metri, la xe perfin più alta. No la xe bela come al Sopot vicin de Pedena, ma la xe famosa tra chi che fa arampicata e alpinismo.

La cascata Copot, foto: Wikipedia, Drago Carlo

Se per caso decidè de andar a veder le cascate de Sopot e del Graiana in zona Pedena, saria de andar a nord est verso Gologorica (Moncalvo), no tanto per veder la cascata vicin l’agroturismo indò che se rifrensca le capre, ma per traversar la Valle de Moncalvo (Gologorički dol) che la proponi una natura con forme e colori de incanto, tanto che par de esser in Svizzera o in Austria.

Altre cascate che saria da scoprir la se trova nel Buiese. Sula strada che la va da Portole verso Buie, passada Sterna e prima de rivar a Marussici de trova la cascata de Butori. El torente carsico Jugov potok el casca per circa diese metri in un lagheto verde, per dopo sparir dentro un impressionante cavità carsica fonda più de duecento metri.

La cascata de Butori - foto: Manuel Angelini

In nel territorio de Momian, vicin al paesto de Brdo, sul torente Poganja/Argilla (che poi el finissi in tela Dragogna) se trova la cascata Zingarella (Cingarela. La xe sai pitoresca e la crea tante vaschete. Un fià sconta in t’una gola salvadiga xe anche la grota Zingarella e anche quela la xe de veder. E xe de agiunger che lungo el corso de rio Poganja/Argilla una volta ghe jera ben nove mulini con l’acqua che ghe fasseva girar la roda. L’ultimo el xe sta serado in tel 1965.

La cascata Cingarela (Zingarella) - foto: Wikipedia, Drago Carlo

Sempre nel Buiese, tra Vertenglio e Vilanova, el torente Laure, che poi el finissi xo in tela foce del Quieto, el genera la cascata de Scarline, alta cinque e larga dieci metri. Xe de andar a vederla perché tuta la zona de Scaline xe un parco natural e paleontologico, con resti de organismi preistorici sule piere verticali.

La cascate de Scarline

Insoma, meterse in serca dele cascate pol esser un modo interessante per scprir la bela natura istriana.