LA CHE XE PROFITO XE SAI POCA ARTE E CULTURA: El palaso de la posta de Pola el ga de eser valorizà, no svalutà con boteghe e boteghete

Tuti quanti savemo che ogni stato che el ga comandà in l'Istria el ga lasà segni del suo pasagio, specialmente per quel che riguarda el patrimonio edilizio e architetonico. Sto fato el xe sai ben visibile a Pola, in quela Pola nova e moderna, postromana e postvenesiana, rinata a partir dal 1850, co l'Austria la ga scelta come base principale de la sua marina de guera. Questo voleva dir no solo che la cità la saria diventada un porto militar ma, con el cantier e l'arsenal, anche una cità industrial.

Anche Rovigno la ga avù grandi cambiamenti soto l'Austria: grasie ala fabrica tabachi, ala produsion de liquori e del pese in scatola, la "popolana del mare" la ga cesà de eser solo un borgo de pescadori e de batane e la se ga industralizà e moderniʃà. E poi, con i nobili Georg Hütterott e Ignacy Karol Milewski, a Rovigno comincerà la storia del turismo, roba che no val per Pola perché Paul Kuplewieser el se ga limità a portar turisti de luso solo ale isole Brioni, pur gavendo qualche idea anche per Medolin, mai realiʃada perché iera sc'opada la Grande Guera.

Ma tornemo al patrimonio edilizio e architetonico de Pola. L'Austria ne ga lasà testimonianse de l'architetura industrial (in Arsenal e a Valelunga), loghi dela presenza dei militari (le caserme, l'amiragliato, i forti) ma anche della Belle Époque, con le vile dei uficiai a Veruda, el mercato, l'albergo Riviera, el Casino Marina, el teatro, le vile Münz. E poi la stasion dei treni.

L'Italia, invesse, con la sua architetura, la ga volù render visibile la presenza del „potere dello stato", lasandone bastansa roba che oggi ga valor artistico. In base ai progeti de architeti taliani (Munari, Mazzoni), ma specialmente polesani (Aurelio Brussi /Brussich, Ottomaro Heininger, Lino Moscheni, Alfeo Pauletta, Enrico Trolis, Alberto Turina, Guido Brass), nei anni Trenta i ga fato el stadio di via Promontore - Campo del Littorio, el „Dom braće Ribar" (ex Casa della Gioventù Italiana del Littorio - Casa Balilla), la Posta, el Genio civile (ex „Komitet", dove che adeso xe i ufici dela Region istriana), la stasion dele coriere, la Cassa di Risparmio di Pola in piasa Foro, el Mulin eletrico, el „dispensario" (Centro provinciale d'Igiene e Profilassi), el bagno de Stoia, la cesa de Sant'Antonio.

Tuta 'sta architetura la fa parte de quel movimento artistico che xe conosudo come „razionalismo italiano", che el saria come una specie de clasicismo denudado dale decorasioni. Ben, sto razionalismo el iera diviso al suo interno in due corenti: la prima la iera ideologica, e per questo monumental, imperial, fata per esaltar el nazionalismo talian, la seconda, invese, la iera sai più artistica e libera dala ideologia del regime. Iera un stile speciale, diferente dal "razionalismo puro" dei grandi architeti Gropius, Mies van der Rohe e Le Corbusier.

Un lampante esempio dela prima corente, quela ideologica, xe l'ex Banca d'Italia, ogi Fina. Sta banca, fata con la piera de Orsera e finestre sbarade con grate de fero batudo lavorà dai artigiani friulani e del Cadore, i la ga tirada su tra el 1937 e el 1939 su ordine del conte Azzolini, che el iera governador dela Banca centrale italiana. La ga progetada l'architeto roman Vincenzo Munari con la colaborasion del Polesan Alberto Turina e la se ispira ale catedrali gotiche e ai castei del'Istria.

D'altra parte, l'esempio più bel del razionalismo artistico a Pola, de quela corente che no la ghe faseva le bele ar regime, xe la Posta. Per prima roba bisogna dir come che la nasi. El Ministero delle Comunicazioni talian nei ani Venti del Novecento el gaveva deciso de costruir nove stasioni dei treni e poste in giro per l'Italia. Uno dei principali colaboratori del Ufficio Costruzioni Edilizie e Stradali (che el gaveva el compito de progetar le nove poste e stasioni) del Ministero delle Comunicazioni iera l'architeto Angiolo Mazzoni de Bologna, che in meno de venti ani el ga progetà 15 stasioni dei treni e 18 edifici postali in tuta Italia. Tra questi xe anche el Palazzo delle Poste de Pola, fato tra el 1933 e el 1935.La piera bianca istriana xe combinata con la monzonite nera, con detagli in alluminio ale finestre e ale porte. El bianco, el nero e poi el „rosso tiziano" dei mosaici della scalinada interna i crea bei efeti de color e un grande dinamismo.

Mazzoni el iera compromeso col fascismo, tanto che dopo la guera el ga dovù andar in Colombia, e sta roba no ghe fa onor. Però el iera un artista, nel 1915 el gaveva aderido al futurismo e la sua posta de Pola, dal punto de vista artistico, no la iera "schiava del regime", ma la iera invese un tentativo de architetura sperimentale (un bloco squadrà tacado a un bloco meʃo tondo) e più che del regime in cui la xe nata, la fa parte dela storia de l'arte.

In sti giorni gavemo leto che la Posta croata (Hrvatska pošta), diventada parona del palaso de la posta de Pola, no la escludi de venderlo. „ Per concentrarse sul svilupo dele capacità logistiche e sul ricavar novi profiti, tegnindo conto dela costrusion de un novo centro de smistamento, ocori attivar 'sti imobili de nostra proprietà. Noi li ativemo sia afittando locali comerciali, sia vendendoli", ga scrito quei de la Posta croata.
Insoma, xe el risc'io de veder trasformada la posta de Pola in un centro comerciale carigo de boteghe e boteghete. E se qualcosa sta sai lontan da l'arte, quela roba xe el comercio.

Soto certi livei, anche de prestigio, no se dovesi calarse. Eco perché la Cità de Pola, la Region istriana, ma anche el stato, i dovesi far de tuto per riscatar sto palaso per dedicarlo ala cultura. Tegnindo conto che Pola no la ga gnanche el suo museo civico, xa questa saria un'idea. Ma, in questa fase, più de saver coss' che se podesi meter in tela posta de Pola (le robe le andasi studiade per ben) xe più importante dir coss'che no se vol dentro.

Xe ormai quasi 100 ani che a Pola, in architetura, no se fa niente de veramente valido. La Jugoslavia la iera concentrada, diria anche giustamente, a costruir quartieri per la clase operaia (più qualche scuola, el campo de calcio de Scoio e el palaseto del sport a Veruda) e fin deso, in tei sui primi 30 ani, la Croazia la xe stada contagiada dala mania de far centri comerciali. E sta roba la val per tuta l'Istria: solo la palestra de Vale, la cantina de Kozlović a Momian, el torcio de Chiavalon a Dignan e do o tre novi alberghi de Rovigno xe costrusioni nove de qualche valor artistico. Eco alora che saria ben no svalutar quel che de bon ne ga lasà i altri, a partir da la posta de Pola.