El pitòr, meso de Pola e meso de Promontore, Robert Pauletta un fià de tempo fa el ga leto un’intervista col diretor de l’Ente turistica de la Region Istriana, Denis Ivošević; qualcosa ghe ga spuzzà e el ghe ga risposto con un film.
In quela intervista Ivošević gaveva dito che, sopratuto grazie al turismo, negli ultimi do o tre decenni iera stadi salvadi 330 paesi istriani. Pauletta se ga messo in furgon e ‘l xe partì in serca de sti paesi, par verificar de persona sta “ressuression”. El ga fato 3.300 chilometri, el se ga portà drio la telecamera e ieri sera el suo film “Mr. Danny & Istro-cid” el xe sta proietà in prima vision al cine Valli de Pola. La sala la iera piena come un ovo, la gente sercava una sedia in più. Ma no ghe iera bastansa, cusì qualchedun ghe ga tocà sentarse sui scalini.
Pauletta firma la scenegiatura e la regia, el film xe stado girà senza schei publici, anca grazie al lavoro volontario de qualche colaborador. Tra lori ghe xe el montador Marko Račan, el musicista Branko Okmaca e el coro “Praksa”, che ‘l ga cantà prima che cominciassi la proiezion del film.
Partimo dal titolo. Do sogeti, oto silabe, proprio come in “Pat Garret & Billy The Kid”, el famoso film de Sam Peckinpah, par el qual Bob Dylan, oltre a recitar, el ga scrito quela canson capolavoro che xe “Knockin’ on Heaven’s Door” (Bater ale porte del paradiso). Nel film quela canzon la comenta musicalmente una scena sai intensa in cui el scerifo ferì el mori, e la sottolinea el momento del passagio tra la vita e la morte. Dunque, in senso metaforico, l’ Istria de una volta, magari povereta ma autentica, la xe ancronistica proprio come el scerifo de Peckinpah che prima de morir el disi “take this badge off of me” (“tirime via sto distintivo”, simbolo del passato), la mori e la bati alle porte del paradiso, un posto che’l vive solo in tela fantasia. L’Istria con le galine e le cavare, coi contadini e coi veci mestieri, la ghe apartien ala storia proprio come el scerifo che con la sua morte el rappresenta anche la fine del Far West, el Far West, sotto i colpi de la società moderna che no se pol descriver senza la parola profitto.
Anca la letteratura classica la ne ofri un titolo che ne ricorda el film de Pauletta. Se trata del poema epico spagnolo medieval “Cantar de Mio Cid” (“El canto del Cid”). Però el ‘Cid’ de Pauletta no ga niente a che far col personagio del poema che el rappresenta quel onor e quele virtù che, secondo Pauletta, in tel’Istria de oggi le xe sparide. El suffisso “-cid”, nel caso de Pauletta, xe proprio quel che vien subito in mente, come nelle parole omicidio, femni icidio, genocidio, ecocidio. El vien dal latino cidium, che ‘l ga radise nel verbo caedere, cioè tajàr, butar zo, copar.
“Mr. Danny & Istro-cid”. Dunque el messagio xe ciaro. Caro signor Denis (Ivošević), cioè “Mr. Danny”, quel che se ga fato in tei ultimi anni no ga portà alla salveza dei paesi istriani, ma al “Istrocidio”, alla morte de la vera Istria (Istro-cid).
Secondo quel che se vedi nel film de Pauletta, cossa ga copà l’Istria autentica? Prima de tuto el sacrificio, senza spirito critico, de la tera, dei beni, delle vecie abilità de lavoro e anca del modo de pensar sull’altar del turismo. Nel film, che ‘l dura 26 minuti, se vedi inquadrature, scene e sequenza costruzioni abusive, de terribili interpolazioni de case nove dentro el tessuto edilizio e architettonico secolare dei paesi istriani, de scovazoni ilegali, specie de materiali da costruzion butadi via.
Dapertuto xe “spontade” case coi teti driti e piati, con troppo vetro o senza finestre; xe comparsa la mania de recintar le proprietà, e anche l’epidemia de piscine che la riva alla fase quasi letale nei novi insediamenti, dove i ga provà, senza sucesso, a citar l’architettura tradizional istriana. Visti da l’alto i par barache de un campo de concentramento, e le piscine a volte no le riva gnanca a do o tre metri de largheza, come canaleti. Ma quel che conta xe gaverle.
La funzion de ste costruzioni, che la ga portà alla devastazion visiva e ambientale del paesagio istrian, la decide l’investidor, un personajo-protagonista che Pauletta descrivi come qualcosa tra Gesù e Cesare. La funzion la xe quasi sempre turistica, e ‘l turismo con le sue necessità el ga provocà una rivoluzion indesiderada nelle dinamiche de vita secolari dell’Istria centrale. Condanando a morte le bestie domestiche “rumorose” e “sporche” e scazando via dai sui habitat le bestie salvadighe.
Se trata de possedimenti che in gran parte i xe in man de foresti, qualche veteran de guera, ma Pauletta no ga tasù gnanca la coresponsabilità dele autorità locali, che no solo no le ga fato piani urbanistici per protegger el territorio, no solo le fa poco o quasi gnente par risolver el problema delle costruzion abusive, ma le ga acetà un tipp de architetura e de design che ga rovinà el paesagio istrian originario. E ghe ne xe anca de quei che i fa affari privati fornindo acqua illegalmente là dove l’acqua ancora no xe rivada
Se xe evidente che una casa nova col teto piato no la cossa sercar, per esempio, a Gallignana, perché una casa bianca a forma de elisse no la podaria star ben, isolada, su qualche montusel ?
“Perché la sua funzion quasi esclusivamente turistica no la se integra e no porta gnente alla vita del paese”, ne ga dito, dopo la proiession del film, un architeto polesan che el ga anche giuntado:“Anche quando che se trata de una bela casa, el suo contrubuto el xe solo decorativo, dentro ghe xe poca vita, e per questo la resterà sempre in conflito col spazio originario”.
Pauletta el manda el suo messagio in modo grotesco, usando ironia, sarcasmo, satira, la predica, sotolineando e ripetendo tante volte certe parole, mostrando tante volte certe inquadrature al rallentador e ala moviola, usando una voce de fioi non solo par sottolinear l’innocenza perduda, ma anche perr dir che anche i fioi i vedi quel che xe capità. Momenti quasi da fumeto, animazioni, commenti musicali scelti con cura (el soundtrack) e anche ilustrazioni generade con l’inteligenza artificial le disegna l’ambiente de una tragicomedia doveche però domina la dimension tragica.
El film el ga difeti? Probabilmente sì, nella drammaturgia, nella gramatica cinematografica, ma forse questi no i xe sai interesanti gnanche per l’autor. Per noi un possibile difeto xe che la comparsa de Pauleta in tel film, che xe comunque un gesto coragioso, el ga sai de liturgia. E ogni liturgia la porta dentro un dogma. E qua nasci – anche senza volerlo – el dogma del “no tocar gnente”.
Anche se Pauletta el ga dito de no gaver gnente contro el turismo, nel film manca un messagio sul turismo sostenibile. Adiritura i vinaioli istriani, che i ne ga permesso de no ber più el vecio vin acido istrian che ‘ldominava slle nostre tavole fin ai anni Novanta, vien mostradi in modo caricaturale come parte de una nova élite istriana che la vola in elicotero, che la porta bellezze esotiche in tele sue piscine e che no la evita la proibida… cola.
I esempi della Toscana citada nel film — Monteriggioni, Montepulciano, Pienza, opur San Gimignano, che grazie alle sue tori conservade el xe in tela lista del patrimonio cultural mondiale dell’UNESCO (e noi in Istria no semo boni gnanca de far meter l’Arena in tel Uneso) — i dimostra che col turismo se pol viver ben e bel, basta saver conservar l’autenticità del teritorio e gestirlo con un fià de inteligenza.
A parte el principio del film, co el mostra una casa vecia e abandonada, svotada dopo l’esodo del dopoguerra e per la la qual “ancora no xe stade piante tute le lacrime”, Pauletta forsi el ga insistì troppo sul tropo costruir, e troppo poco sulla necessità de impegnarse in un restauro armonioso, concordado con le Bele Arti, de tante case rovinate non solo in tei paesi dell’Istria centrale, ma anca in tele contrade sconte drio le vie principali de Dignano o de Albona.
Immaginemo questo. Se Pauletta el gavessi fato un film sull’Istria nel 1989, probabilmente el gavaria mostrà come che tanti posti i xe indrio, le case case abandone e rovinate, e la mancanza de prospetive de vita par la gente dei paesi. E el publico, che ieri el ga sostenù la tesi de pauleta (e xe dificile no esser d’accordo) che in Istria se ga fato troppo, nel 1989 probabilmente i lo gavaria sostenù nella denuncia contraria, cioè che in Istria se fasseva tropo poco.
La parola magica, come in tante robe della vita, xe “misura”. Pauletta — e el suo amor per l’Istria xe indiscutibile, visto che ‘l xe fio de Ivan Corrado Pauletta, uno dei fondatori dela primo Dieta, quela bona — forsi la misura el la ga un poco trascurada. Ma ghe lo podemo perdonar. In fondo el suo film xe un ato de acusa, un’acusa de cui l’Istria gaveva bisogno. La porterà a un cambiamento? Chi lo sa? In ogni caso, proprio come Pauletta mostra nel so film, el fiume Quieto el continuerà a scorer...
