PERO TADIĆ DELLA PIZZERIA JUPITER: "Ve conto el segreto del nostro successo"

“El segreto dela nostra lunga e prospera durada in tel mercato, sai competitivo, dela ristorassion, el stà in tela bona cusina e in tela qualità dei nostri piati, ma anche in tel fascino del nostro local indò che i nostri ospiti i se senti ben e i vien acolti in modo professional. Chi che vien de noi una volta, poi el torna de novo. In quasi trentacinque anni de tradission dela Jupiter, la fedeltà dei nostri ospiti e dei nostri dipendenti – ghe ne xe anche de quei che i xe con noi dal primo giorno – xe la meo prova del fato che go ragion a pensarla in sto modo” - Pero Tadić (Pizzeria Jupiter)

El riconoscimento ECO FRIENDLY PARTNER dela Pula Herculanea

El riconoscimento ECO FRIENDLY PARTNER ‘sto anno el ghe vien consegnà a quei paroni dei ristoranti de Pola che, rispetando tuto quel che ghe vol far per manovrar con le scovasse a regola d’arte, i dimostra un livel sai alto de responsabilità sociale e i dà una grossa man per sbassar la quantità de scovasse urbane solide miste.

Per esser Eco Friendly Partner, che vol dire gaver un ocio de riguardo per l’ambiente, ghe vol smaltir regolarmente ste scovasse urbane solide miste e firmar un contrato con la dita municipalizada Pula Hercolanea per ingrumar in modo diferenzià carta, plastica e scovasse organiche. Poi ghe vol notar regolarmente in una documentassion aposita, quante scovasse che se ga smaltì ogni mese in modo diferenzià e pagar le bolete che la Pula Herculanea consegna ogni mese.

Nel 2024 el riconoscimento ECO FRIENDLY PARTNER lo ga otegnudo el ristorante Felix, le dite Jupiter Export d.o.o., Splendid Pula d.o.o. - Ristorante Markat e Baba Ruža d.o.o. (Hook&Cook).