Quel de Salvore, la lantierna de San Zuane, quel de Porer: i fari de l'Istria da vedete sul mar a loghi dal fascino simbolico

Per più de duecento anni la navigazion de note la iera ininmaginbile sensa de lori. La vita de chi navigava dipendeva da quele tori in mezo al mar, da una luce. Una sola. Una luce che, de note, la diseva: "Ocio che qua vicin xa la tera e acque basse, sta ‘tento de no raspar el fondal."

Desso xe rivai Se ghe rivai el GPS, i radar e i satelliti, ma i fari i ga ancora un grande fascino. Anche quei istriani.  Anche se i Asburgo, fin dai tempi de l'imperador Carlo V (1550-1558), i gaveva una quantità de sbochi sul mar – dai Paesi Bassi al sud de l'Italia aragonese, da la Spagna a la Tunisia, l'Algeria, el Messico e bona parte del Sudamerica orientale – quel impero, che tuti ciamava "quel dove che el sol no tramonta mai", no ‘l xe mai diventà una granda potenza naval fin verso la fin del Settecento. Fin quela volta su mar comandava l’Inghiltera, la Spagna, Venezia e Genova.

Le robe le xe cambiade in tel 1797, co  l'Austria, cascada Venezia per man de Napoleon, la ga ciapà gran parte dei teritori che i iera dela Serenissima e fra questi anche l'Istria e la Dalmassia Venessia e l'Istria. Grazie a l’impegno de l’arciduca Federico prima e, dopo, specialmnete de Massimiliano, la Marina austriaca più tardi la xe diventada una forza naval de primo piano. Dopo el curto periodo de dominio napoleonico in Istria, dal 1805 al 1813, Vienna la ga dovù adattarse a le nove esigenze de far sicura la navigazion in Adriatico e la ga tacà a costruir fari lungo la costa istriana.

El primo xe stà quel de Salvore, tirà su nel 1818 su progetto de l’architeto Pietro Nobile sul punto più a ponente de l'Istria. Alto 36 metri, el xe el primo faro moderno più vecio de la Croazia. Lo ga inaugurà de persona l’imperatire Francesco el 17 aprile de quel anno. Se conta che lo gavessi fato tirar su nientemeno che Klemen Von Metternich, prima ministro dei esteri, poi cancelier de Stato de l’Impero austriaco, per amor de una nobildona istriana de nome Gisela. El se gaveva inamorà de ela a un balo a Vienna e per gaver un nido d’amor segreto con sta baba istriana el gavessi fato far el faro a Salvore con una caseta rente. Ma la sorte gavessi volù altrimenti: pochi giorni prima dela fine dei lavori, la Gisela la xe morta e Metternich non ‘lxe vegnù mai più a Salvore. Ma la verità la xe sai meno romantica: el faro sul punto più a ovest dela nostra penisola el serviva a render più sicura la navigazion verso Trieste.

Più che l’Austria la potenziava la sua marina, più Vienna capiva che anche al resto dela costa istriana ghe serviva la segnalazion luminosa. Al largo de Rovigno ghe xe el faro del scoio dito Lantierna de San Zuane, vicin de l’isoloto de San Giovanni in Pelago. Se parla un scoio longo setanta e largo cinquanta metri. La tore otagonal de piera, tirada su in tel 1853, la xe alta quindese metri e la sta oto metri sora el livel del mar. La sua luce la riva fin a ventiquatro miglia marine, el segnal sonoro se lo senti fin a do miglia. La tore la xe tacada a una caseta dove che una volta viveva el farista e dove che, in tempi più recenti, i ga ricavà do apartamenti che vien ‘fitai a chi che vol passar una vacanza un fià diferente. La Lantierna de San Zuane, cussì come la ciama i Rovignesi, la se trova in un punto dove che el mar el riva fin a quaranta metri de fondal. De fianco del scoio, però, xe una spiageta con l'aqua bassa e l'isoloto el ga anche una gru par tirar su le barche.

Ma xa prima iera sta fato el faro del Porer, l’isoloto che sta al punto più a sud de l’Istria, circa un chilometro e meso via da Punta promontore. Nel 1832 i gaveva fato tre prove. Prima su Porer, in agosto; dopo su l'isoloto de Fenoliga, in setembre; e infine a Capo Promontore in otobre. Dopo gaver sentì el parer de tanti comandanti dei bastimenti, el governador de Fiume el ga deciso che el posto giusto iera proprio Porer. Cussì, nel 1833, a Porer i ga tirà su un primo faro de legno, provisorio. El definitivo, in piera, el xe rivà nel 1846, sempre su progetto de l’architeto triestin Pietro Nobile che, tra l’altro, el ga sistemà anche Piazza Port’Aurea a Pola..

Porer xe un picio isoloto de piera, lungo novanta e largo setantacinque metri. El faro el ga una tore cilindrica alta trentun metri che, posada sula goba più alta del scoio, la porta el fogo del faro a un'altessaa de trentacinque metri sora el livel del mar. La sua luce la riva fin a venticinque miglia marine, el segnal sonoro se senti fin a do miglia. Anche a Porer, in tela caseta rente el faro, ogi xe do apartamenti per i turisti. El mar intorno a Porer elxe sempre stà conossù per esser ricco de pessi (xe carigo de ociade) tanto che ancora ogi el xe una meta nuero ainz per i pescadori.

Ma i tre grandi fari no xe i soli. Lungo la costa istriana ghe xe anche quel sul molo (diga) a Citanova, poi quel de Punta del Dente (Capo Zub) sula penisola de Lanterna a circa a 13 km a nord de Parenzo. De fronte ala citadina dela basilica eufrasiana xe un faro sul scoio de San Nicolò, poi in citavecia a Rovigno sta el faro de Punta Sant'Eufemia (Lanterna da Monte) e poi a Peneda in tel arcipelago de Brioni, ma annche a Verudela, a Marlera e a Punta Nera (Crna Punta) sula costa orienta de l’Istria, a sud de Schitazza, tirà su nel 1873 per favorir la navigazion verso el Canal d’Arsa. Ma ghe xe anche altri fanai che magari i passa più inosservai, ma che i ga avù la stessa mission: vegnirghe incontro a chi navigava e portarlo a casa.

Ogi, con tuti i strumenti moderni che gavemo, un faro no xe più indispensabile come una volta. Eppur, quando vien sera e lontan se vedi una luce che la lampegia ritmica sora el mar, qualcosa se movi dentro. Forse perché quei fari no i indica solo una rota. I ne ricorda che, anche dopo la traversada più longa, da qualche parte ghe xe sempre una costa che te speta. E forse xe proprio questo el vero senso de un faro: no solo mostrar dove che xe la tera, ma ricordarghe a ognidun de noi che, finché ghe xe una luce all'orizonte, la strada de casa no la xe mai persa.