"Rovigno, tesoro, vardelo là..."

Ogni volta che vado a Rovigno me par de provar u fià de invidia. Un’invidia sana, fondada più sul rispeto per i Rovignesi che su una specie de gelosia cativeriosa.

Anche Rovigno ga i sui problemi, dal tropo turismo ai scossoni politici, dal “peso particolar” (per quel che riguarda i Taliani) che ga Rovigno, nel ben e nel mal, a l’interno del microcosmo minoritario e in genere dela politica in Istria. Ma, almeno per mi, prima de ste robe vien la Rovigno come logo bel, una Rovigno che pur essendo protagonista delle sfide dela modernità (el turismo de Serie A, l’istituto oceanografico, el Centro de ricerche storiche) la sa come curar la tradission.

Xe vero, come tuti quei che se sforsa de unir la cultura popolar ai interesi dei turisti, a volte anche i Rovignrsi  i casca nella banalità, ma el più dele volte i resta autentici o i riscata la tradission in modo da farla viva, anche quando che la se presenta come museo, come la “Casa del Batana” che la xe un picio gioiel.

E autentici, i Rovignesi, i xe co i parla (co i parla in istroveneto se senti sai ben i resti de l'Istrioto che i cntnua a coltivar in forma artistica) ma specialmente co i canta. Se xe una tradission che la deternima Rovigno e anche la presenza italiana a Rovigno xe quela del canto. Tra „bitinade“ e „arie da nuoto“ (arie da note, intesa come „notte“) no i sa (lori i diria „i no sa“) dove pescar prima, in tei altri loghi de l'Istria la xe più grave, a partir da Pola. A parte le canzoni simili in tuta l'Istria e a Trieste, a parte la canzon „Vedendote mia 'Rena“, non savessi cossa risponder se qualchedun me domandassi de parlarghe dele tradizioni de Pola.

Come che Rovigno ga avudo Ligio Zanini e Giusto Curto, e i ga ancora Libero Benussi, tuti poeti che i ghe ga dedicado tanti bei versi a Rovigno, anche Pola, con Stefano Stell, Venci Krizmanich, Ester Barlessi, Gianna Dallemulle Ausenak (ma anche Umberto Matteoni e Mario Cocchietto), la ga avudo i poeti che i la ga cantada in dialeto e in lingua. Ma co se trata de cantar, conossè voi quando che xe sta scrita, magari in italian, l'ultima canzon dedicada a Pola?

A parte Nello Milotti, che per i cori della Lino Mariani el gaveva fato un musichiere polesan metendo in musica anche poesie del poeta polesan Stefano Stell (lo gaveva fato nel 1992, anche Alex Perin dela Compagnia del Caligo in Do bemolle, fata de giovani a l'epoca ativi in Circolo, che, cantandola con Guido Stocco, el gaveva messo in musica la poesia „Usi e costumi“ de Stell), mi no me vien in mente una sola canzon dedicada a Pola scrita in tei ultimi 50 anni.

A Rovigno, solo Ricky Bosazzi ghe ne ga scritte tre (“Ruveïgno par meï” / “Rovigno per mi”, “Rovigno ma dêi” /“Rovigno me disi” e “Rovigno bela”), el compianto e bravo Vlado Benussi (figura central dela tradission musical rovignese e mentore de tante generazioni de cantanti della Comunità degli Italiani di Rovigno) el ghe ne ga scrite almeno cinque restade conossude: “O bella Rovigno”, “La banda della mia città”, “A Figarola”, “Li muriède ruvignìʃe”(“Le mule rovignesi), ma anche “Rovigno tesoro”, interpretada dal trio “Biba, Ricky & Vlado”, ma anche dala banda de otoni. Adiritura un Polesan, Maurizio Di Capua, el ghe ga dedicado una canson a Rovigno, quela “Santa Eufemia” cantada da Toni Cetinski. E poi xe la famosa "Ruveigno xe senpre Ruveigno" cantada da Sergio Preden Gato e quela triste, scrita da Piero Soffici e cantada da Ines Giuricin, dedicada a l'esodo "Coreva xi pal modo" coi versi “Coreva xi pal mondo? / e tanto tribolar, /per capir che tuto il mondo / i lo gavevimo qua!” (Oocoreva andar per el mondo? E tanto patir / per capir che tuto el mondo / lo gavevimo qua").

Vlado Benussi, al qual la cantante rovignese de generazion più giovane Patrizia Sfettina Jurman la ghe ga dedicado la splendida canson “Grande omo” ("maestro e amico, sempre con la batuda pronta"),  la canson “Rovigno tesoro” la ga cantada con la moglie Biba (spesso, con lui, autrice anche dele musiche) e Riccardo Bosazzi che mercoledì sera el ga celebrà la sua cariera in Circolo a Rovigno in una serata intitolada “Dimelo in dialeto che ti me vol ben”. L’articolo in croato su quela bela serata, cariga de emossioni, lo podè leger qua, domani publicheremo quel in italian.

Biba, Ricky, Vlado, Sergio Preden Gato, Patrizia Sfettina Jurman, Sara Salvi, Matteo Tromba, Antonella Rocco Sugar, Luciano Sugar, Alessio Giuricin, el coro dela "Marco Garbin", le compiante Liliana Budicin e Cristina Fištrović, Piero Soffici orto in Italia e i tanti grupi impissai e istudai nel tempo („Batana“, „Le quatro colone“ e quei „Cannibali“ che robe che i sfondi in Italia e tanti altri): Rovigno xe un logo indò che i canta col cuor. Qualchedun disi che i Rovignesi i sarìa sarcastici, burberi, anche barufanti. Ma almeno i sa chi che i xe e dove che i xe. E i sa cantar.