STEVE JOBS COME SAN FRANCESCO, TUTI DUE I GAVEVA UNA "START UP" E UNA "MISSION": Sai volte va finir che sacro e profano xe la stesa roba

Scoltar el storico Alessandro Barbero, almeno per mi, xe un vero godimento. La conoscenza che ‘l ga, la pasion che ‘l ghe meti col conta robe capitade cento o mile anni fa, la sua teatralità misurada e mai esagerada le te porta  dentro (o “drento”, come che volè) in un mondo finì che te par de veder davanti ai oci, te par de sentir i odori dele epoche pasade, i rumori de artigiani e campane che sona in tele cità in tempo de paʃe e i rumori dele guere – spade che se incrocia e cavai che urla, sui campi de bataglia.

Tra le migliaia de comenti scriti dala gente che lo segui su Youtube, uno el spiega tuto. “A scola la storia per mi la xe stada sempre la materia più noiosa e inutile”, ga lassà scrito un tipo “, ma da quando che go scoperto Barbero no poso più far a meno de almeno una dose de storia la giorno”.

Una dele tante splendide oservazioni de Barbero xe sta quela de veder le somiglianze tra due personagi che a prima vista i pareria diferenti in tuto: San Francesco e Steve Jobs, el fondador della Apple, quela dei computer Mechintosc e dei telefonini Aifon. Tra lori due xe ben 750 anni de diferensa, el primo xe nato nel 1181, el secondo nel 1955. E poi, San Francesco xe Talian e idolo dei poveri, el secondo American e, se no servi eser proprio richi, per comprar i suoi prodoti, qualche soldin in più bisogna gaverlo.

Anche se, riguardo a come che i valori sociali i xe cambiadi nel tempo, saria normale el contrario, Jobs el iera un meʃo misogino, San Francesco invese el diʃeva che le done le iera importanti sia per la società, sia per la ceʃa. E poi, el Santo povero che piaʃeva i uʃseleti, el Santo tecnologico preferiva i cani pit bull.

E poi, i diʃi che San Francesco saria stado anche in Istria, a Pola, Steve Jobs pareria proprio de no.

E ‘lora, cossa liga ste due persone cusì diferenti? Tante robe. Dito in termini moderni, tuti i due i ga fondado una "start up". La start up de San Francesco xe stada el movimento dei frati predicatori che, a diferensa dei Benedetini, i ieri poveri e mendicanti. Mendicanti come i Domenicani, nati in tei stesi anni (al principio del Duecento) che i usava la miseria per contrastar l’eresia, invesse i Francescani i voleva “suguir nudi el Cristo nudo”.

Per capir meo se devi saver che i monaci fin a quel momento i iera obligadi solo ala povertà personale, ma i monsteri i i gaveva dirito a “ricchezze collettive”, case, tere e rendite, co invesse per san Francesco la povertà dei ordini religiosi la doveva eser completa. I monaci Cluniacensi, un ramo dei Benedettini, i se faseva adiritura pagar per pregar, tanto che i li ciamava “i mulini dela preghiera”.

La start up de Steve Jobs xe stada invese la sua azienda tecnologica a Cupertino, nella Silicon Walley in California. Tute due ste start up le xe diventate ben presto multinazionali con schiere infinite de adepti grazie “allo slancio visionario dei loro fondatori”, diʃi Barbero.

Sia San Francesco, sia Steve Jobs, i iera due leader carismatici, tuti e due i xe diventadi dei miti xa de vivi. Francesco xe uno dei pochi tra quei che stadi fati “santi subito” poco dopo la morte, Jobs xe per milioni de persone un “santo laico”.

Se San Francesco el gaveva una “missione”, Steve Jobs xe stado uno dei primi a usar la parola che in tel business english la sona “mission” per descriver coss’che gavessi fato la sua azienda. Parola, come anche altre tipiche dei Francescani, poi riciclida nel mondo contemporaneo del marketing, dela comunicasion e menagment (vision, mission, semplicità della comunicassion). Le performans de Steve Jobs, ogni volta che ‘l presentava un suo novo prodoto, iera una specie de predicasion, le gaveva un’aura de religiosità. Insoma, la fidelizzazion del cliente come se el fussi un credente.

E poi vien el branding: tuti e due i xe stai maestri de comunicazion, de l’uso del “look”: i Francescani, no i portava solo la tonaca fata de tela de saco color grigio-senere (più tardi diventada maron con i Cappuccini, che i xe Francescani anche lori)  per distinguerse da quela nera dei Benedettini (che in origine i iera vestidi in bianco) e da quele bianche dei Domenicani e dei sui “derivati” Camaldolesi de San Romuoldo de Canal de Leme, dei Cluniacensi, dei Cistercensi e dei Certosini, ma specialmente per i capuci a punta da contadin (no tondi, come che i li portava in cità i giovani richi) e la corda intorno ala vita, i unici frati a gaverla, per dimostrar che no i podeva permeterse una cintura de pele. Nel caso de Jobs, basta pensar al’ estetica dei prodotti della Apple per concluder quanto importante che ghe iera el look.

Con questi stratagemi, sia San Francesco, sia Steve Jobs, i se ga conquistado una sua “feta de mercato”, un “target” preciso de gente che iera stufa dela normalità e che la voleva qualcosa de diferente: per farse bei ai oci de Dio, i seguaci de San Francesco, per farse bei ai oci dei altri, i seguaci de Steve Jobs.

Un’ultima analogia la sta nel fato che sia l’ordine de San Francesco, sia la dita de Jobs, le xe diventate in pochisimo tempo vere e proprie multinazionali, con centinaia de conventi francescani in tuta l’Europa nel giro de pochi anni, e milioni de persone col telefonin Aifon in scarsela.

Xe ciaro, quel che ga fato San Francesco e Steve Jobs lo ga fato anche tanti altri ordini religiosi o quei dei Cavalieri (Templari, Ospedalieri ecc). e in età contemporanea tanta altre aziende, ma anche pariti politici. Ma i due che gavemo nominà xe i esempi più lampanti de leader carismatici che i ga generado un vero proprio culto dela personalità. Sacro e profano sai volte xe la stesa roba.