TEMI DE PASQUA: Perché Gesù Cristo el vien presentà con la barba?

Doman xe Pasqua e ‘lora ogi scrivemo de robe de cesa. E femosse una domanda.  Perché Gesù Cristo, in tela storia de l’arte e poi anche in tei film, el più dele volte el vien presentado con la barba? Epur, no se sa che sembianze che ‘l gaveva. Né i evangelisti Matteo, Marco, Luca e Giovanni, né Giuseppe Flavio l’ebreo, unico storico contemporaneo de Cristo, i ga ma descrito Gesù fisicamente. De dove, ‘lora, capita la barba?

Per prima roba xe de dir che per i primi anni dopo la crocifission, mai nissun se gaveva permesso de disegnar Gesù Cristo. Questo xe capità perché el primo cirstianesimo el iera sai radicà in tela religion ebraica (el stesso Cristo no gavevà mai pensà de fondar el cristianesimo, ma solo de darghe una slavassada e una rinfrescada a l’ebraismo), e l’ebraismo, come più tardi l’islam, el probissi severamente de darghe sembianze umane a Dio.

Se fussi sta per San Piero, mai nissun gavesì disegnà Cristo. Infati, el capo dei apostoli el iera convinto che la lezion de Gesù la doveva esser condivisa solo tra i Ebrei. Xe sta San Paolo, el vero fondator del cristianesimo, a dir che la parola de Cristo la doveva essere condivisa anche con chi che no iera Ebreo (quei “altri”, per lo più pagani, che i Ebrei ciamava con el nome de “gentili”).  

Partido in mission, San Paolo xe andà in Siria, Turchia e, quel che più conta, in Grecia e a Roma. Da quel momento, no solo che la Bibbia la ghe vien presentada a tuta l’Europa in tela tradussion greca, ma xe anche de pensar che ai Greci e ai Romani ghe piaseva sai presentar i Dei, anche tramite quel che poi xe sta conossudo coime “ideale di bellezza”. Basti pensar ale statue dela Dea Atena al Partentone, o de Zeus in tel suo tempio a Olimpia fati dal scultor Fidia, ma anche a tuta l’arte romana che la gaveva ingrumando anche quela eutrasca, che no la scampava anche dalla nudità in tel’arte.

Insoma, tra i popoli europei iera sto grande bisogno de visualizzar i Dei, cioè Dio, dal momento in cui Graci bizantini e Romani dal politeismo i passa al cristainesimo. Dopo esser sta per anni raffigurà come un pesse, eco che il tel III secolo compari anche le prime imagini de Gesù Cristo. E sicome le compari in tel mondo roman inamorà de l’arte greca (in tele catacombe de Domitilla e in quele de Priscilla a Roma, in tel Batistero de Dura-Europos in Siria Siria), el model xe Apollo, cussì che in tele prime figure Gesù xe un giovane senza barba, per lori sai più acetabile che in tela version “hippy che la vegnerà più tardi.

L’idea che Gesù gaveva la barba la se fa ‘vanti in tel 593, co el storico bizantin Evagrio scolastico in tela sua “Storia dela cesa” (Historia ecclesiastica) el nomina l’esistenza del Mandylion, più conossudo come “Immagine di Edessa” o "Santa Immagine di Dio”. Se trata de un telon con el viso de Cristo che ‘l saria stado fato con Gesù ancora vivo, ma no dala man de l’omo (in greco saria “Acheiropoietos”) ma per via divina.

Evagrio el riprendi la storia contada in tel IV secolo da Eusebio de Cesarea che la saria questa: el re de Edessa (città in Turchia che oggi la se ciama Şanlıurfa) Abgar el iera malà, cussì, dopo gaver sentì che l’omo de Nazareth el fasseva miracoli, el ghe gaveva scrito a Gesù per gaver el suo aiuto per guarir. Cristo no’l ga podù andar de persona, cussì, tramite un suo discepolo, el ghe ga mandado a Abgar sto Mandylion, sta strassa con el disegno del suo viso. Dopo gaverlo tocado el re Abgar el guarisci e ‘l impica sto Mandylion in tela sala più bela del suo palasso. Più tadi i ortodossi i gà acolto sta imagine de Edessa come sacra icona. Dopo gaver vagà per Costantinopoli e Parigi, el Mandyilion el sarià sparido in tel ambaradam dele crociate.

Co Eusebio de Cesarea scriveva sta roba, verso el 330 dopo Cristo, no ‘l gaveva visto sta imagine e Gesù se continuava a disegnar sensa barba. Solo più de 250 anni dopo (593.d.C.) , quasi 600 anni dopo la morte de Cristo, Evagrio el vedi sto Mandylion (o una sua copia) e ‘l ghe comunica al mondo che Gesù gaveva la barba.

Poco prima iera stadi posadi i bellissimi mosaici suil l’arco de l’abisde della Basilica eufrasiana de Parenzo: là Cristo, sentà su un globo blu, iera ancora sensa barba. Anche in tela cointemporanea, famosa Basilica de Sant’Apollinare Nuovo de ravenna, Gesù no ga la barba.

Gesù Cristo sensa barba (sentà sul globo blu) in tei afreschi de l'arco de l'abside dela Basilica eufrasiana a Parenzo

In tei afreschi più veci ben conservadi in Istria, quei dela cesa de S. Agata a Canfanaro (XI secolo) e dela cesa de S. Fosca a Valmadorso (Batvači) Cristo el ien rafigurà per la prima volta con la barba.

In tela cesa de Santa Fosca a Valmadorso (Batvači), in una del prime imagini de Gesà in tei afreschi in Isttria, Cristo el ga la barba

Insoma, a partir dal VII secolo Gesù Cristo el vien rapresentado con la barba: un viso seren in tel’arte bizantina, duro e sensa emossioni in quella romanica, sai emotivo in quella gotica. Cristo comapari con la barba anche in tel famoso film "Gesù di Nayareth" de Franco Zeffirelli e in tuta la grande arte italiana del Rinascimento, ma con un’unica, grande eccezion. In tel grande afresco “Il giudizio universale” drio l’altar dela Cappella Sistina, Michelangelo tra el 1531 e ‘l 1541 el ga disegnà Cristo senza la barba. Ma Michelangelo, uno che ga rivoluzionà mesa arte e che ghe piaseva sai protestar, el podeva permeterselo.