AFRESCHI DEL RINASCIMENTO IN ISTRIA? Poca roba, se li trova solo a Portole, Mondelebotte e Draguccio

Se gavà acorto che l’Istria la xe piena de cesete? Xe più de 140 le località in do’ che se trova cese con afreschi per niente, mal, poco o ben conservadi. I più veci i risali tra l’VIII e ‘l IX secolo, ma tra quei che se conserva ancora i più veci xe quei dela cesa de Santa Sofia a Docastei (dell'VIII secolo, trasferidi al Museo archeologico de Pola) e quei della cesa de Santa Fosca (XI secolo) a Batvači che in italian se disi Val Madorso o Valmadorso.

Ben, quel che forsi se sà de meno xe che la quasi totalità de questi afreschi i xe de stile romanico e gotico: ne manca quasi del tuto el Rinascimento! Anche l’afresco istrian più famoso, “La Danza macabra” dela cesa de Santa Maria dele Lastre a Vermo, fata da Vincenzo da Castua nel 1474, la xe de stile gotico. E la xe stada disegnada 50 ani dopo che Masaccio, con i afreschi in tela cappella Brancacci dela cesa de Santa maria del Carmine a Firenze (1424-28) el gaveva inaugurado el Rinascimento in tela pitura.

Femola simplice. Se in architetura el romanico ga le finestre che in alto le se sera con un arco tondo (“a tutto sesto”) e nel gotico le finissi  invesse a punta (“a sesto acuto”), in tela pitura i due stili i se diferenzia più che altro nei temi: simbologia, pecati, vizi, giudizio universale  in tel romanico; vite dei santi, de Cristo, de la Madona e a varie scene bibliche nel gotico.

Per quel che riguarda la forma, sia el romanico che el gotico i se li riconossi per le figure piate, sensa profondità, quel che dovessi star "de drio" de fatto el vien disegnà "de sora", i personagi i ga le aureole de oro.

Tuto cambia con el Rinascimento che con la prospetiva el porta la profondità dei disegni e con el giogo de luci e ombre se riprodusi i volumi: sta ultima roba se la vedi ben nele increspadure e in tele pieghe dei vestiti, o in tei cavei.

San Giacomo, Mondelebotte

Dito altrimenti, i quadri del Rinascimento “i par veri”, se parla de un stile con cui l’omo ga rivà copiar la natura, quasi come in una fotografia. Tuto quel che vegnerà dopo sarà un alontanarse dala natura (infati, chi che continuerà a farlo fora tempo tempo massimo e vegnerà ciamà “manierista”), usando l’arte per trasmeter impresioni (impressionismo), espressioni (espressionismo), sintesi con l’esaltazion dele caraterisiche fondamentali (cubismo) e rinuncia al sogeto per pasar solo ala forma con Kandinski, Mondrian e in genere tuta l’arte astrata.

Ma tornemo ai afreschi. Quei del Rinascimento (Michelangelo in tela Cappella Sistina, l’Ultima cena de Leonardo, La scuola di Atene de Raffaello) i xe consideradi i più bei. E, in Istria, afreschi del Rinascimento praticamente non ghe ne xe. Nel Quatrocento e primo Cinquencento, secoli del Rinascimento, la nostra penisola la iera relativamente povera, solo dopo dela tremenda guera de Gradisca (o dei Uscocchi) durada tra el 1615 e ‘l 1618, comincerà una ripresa, con loghi come Rovigno e Piran che i se arichissi con el mercato del pesse salà e del sal e dove che se troverà i soldi per costruir due belissime cese barocche: el Duomo de San Giorgio a Piran e la cesa de Santa Eufemia a Rovigno.

Per tute queste ragioni i pochi segni del Rinascimento che se trova in Istria i ga un valor speciale. In architetura e urbanistica gavemo l'armoniosa piassa con la logia a Sanvincenti, ma per quel che riguarda i afreschi, i esempi xe pochi e anche quei tirai per i cavei. Tra questi, i più bei i se trova a Portole, Mondelebotte (Bačva) e Draguccio.

No stemo spetarse opere spetacolari. Anche se in Istria i compari con 50 e anche 100 anni de ritardo rispeto a Firenze e ala Toscana, i afreschi rinascimentali istriani i xe comunque opere periferiche, provinciali, de artisti che no iera de primo piano.

Se no li gavè ancora visti, andè lo stesso a vederli. A Portole, nella cesa dela della Beata Vergine Maria, su l’arco trionfal sora el presbiterio Clerigino da Capodistria nel 1471 el ga fato un’ “Annunciazione” che xe el primo afresco istrian in cui xe presente la lession del Rinascimento. La prospetiva non la xe perfeta, ma la xe presente, le vesti del l’Arcangelo Gabriele e quele dela Madona no le sarà bele come quele de Tiziano, ma le ga un volume e pighe che in tel arte gotica no i esisteva.

Portole, cesa dela Beata Vergine Maria

A Mondelebotte (Bačva), vicin de Visignan, in tela ceseta romanica de San Giacomo, che la ga anche un bel campanil a vela, Domenico da Udine, che el stava a Dignan, verso la metà del XVI secolo el ga piturà anche lui una bela anunciazion su l’arco trionfal e scene dela vita de Santa Domenica sui muri. Anche in tela sua pitura se nota i segni del Rinascimento.

Mondelebotte (Bačva) Afreschi de Domenico da Udine nela cesa de San Giacomo

El terzo caso xe quel de Draguccio dove che el pitor Antonio da Padova (Padova in Istria, che saria Kašćerga) tra el 1529 e el 1537 el ga tapessà de afreschi tuta la cesa de San Rocco con temi cristologici e figure de Santi. Nel suo stile xe però ancora presenti elementi del vecio gotico.

Affreschi de Antonio da Padova (Kašćerga) nela cesa de San Rocco a Draguccio

Le vere opere del Rinascimento in Istria non sarà i afreschi, ma pale de altar e vari quadri (pittura da cavalletto) che al principio i vegniva importadi da Venezia. I primi  pitori (de tele, no de afreschi) rinascimentali in Istria sarà Girolamo da Santacroce (no se sa dove che el xe nato, ma el xe morto a Venezia nel 1556) che el ga disegnà e trittico per la cesa parrochiale de Pisin, e poi el Zaratin Zorzi Ventura che el stava a Capodistria: el ga lavorà a Fasana, Galesan, Visinada….