CHE BEL CHE IERA UNA VOLTA Magari che se podesi tornar indrio...

L'altro giorno su la mia pagina Feisbuc go publicà una vecia canson, de i ani ’80. Me piasi i ani ’80. Secondo mi iera el periodo che in qualche modo se stava meio. Me par che tante robe iera più facili de deso. Per esempio, almeno de quel che me conta la generasion de i mii genitori, verzer un credito iera come far una pasegiata. Deso, invese, tra documenti de ogni tipo che ti ga de portar in banca xe come cori a una maratona, mai fine.

Me par, anche, che iera tuta un’altra atmosfera. La parola stres iera ancora sconosciuda e se iera più spensieradi. No voio dir che se lavorava de meno, ansi. I lavoradori oltre el proprio lavoro gaveva anche el lavor in te le campagne. Però, disemo, che se afrontava le robe diversamente.

Che no parlemo poi co se andava fora a balar e divertirse. No centra se iera inverno o estate, per el vichend sopratuto, se andava fora. E i posti iera tantisimi. Ogni setimana ti podevi scelgi un altro posto. Ghe ne iera per tuti i gusti. Deso, invese, praticamente no ti ga dove andar, tuto se ga serado. Posti che ga fato la storia - come el Uljanik, la Marelica, la Piramida (prima Tvrđava), e più tardi l’Aquarius (dopo diventado Imperial), el Fort Bourguignon, el Palaticum, el Doberman, el Zodiac, la Tangenta, el Mirage, el Monte Serpente e altri ancora - ormai fa solo parte de un felice pasato.

E deso, i giovani se ritrova in parco Tito a Pola. Pararia che questo ghe xe el masimo del divertimeno. Mi, invese, gavesi fato carte false per andar fora a balar. Da scampar fora de la finestra de note fin a far l'autostop...

Altri tempi. Bei tempi. Ogni tanto penso quanto che saria bel se podesi tornar indrio in quei tempi, anche solo per un vichend.

Cedo la parola a Velan...

Nel 1980 vivevo a Trieste, iera giugno, gavevo 23 ani e gavevo pena dado l'ultimo esame a la Facoltà de scienze politiche de Zagabria. L'unica roba che no me mancava iera el tempo e cusì me gavevo iscrito a la Facoltà de letere. No iero amante del lavoro, però me piaseva scriver e el giornalismo iera la strada più semplice, cusì go studià anche letere e me ga servì.

In quei giorni la radio trasmeteva in continuasion le cansoni de Bob Marley che el stava per tignir un concerto a Milano al stadio San Siro. La musica no me ga mai tirado tanto però iero inamorà de la musica de Marley che gavevo inteso la prima volta a Zagabria quando che gavevo comprà per caso el disco con la canson No woman no cry... Iera el mio idolo e cusì gavevo ingrumà i soldi per andar a Milano a sentir e veder Bob Marley. No so perchè, ma a Milano no son rivà, go rinuncià l'ultimo momento e me ricordo che me disevo: "La prosima volta no sgaro..." Marley el xe morto l'ano dopo de un cancro. A Milano i iera in centomila e xe sta uno dei quei concerti che resterà ne la storia, mi però no iero e ancora ogi me dispiasi.

Voio dir che la vita la xe piena de ste robe: ti podevi ma no ti ga fato, ti stavi per andar ma no ti son andà, ti stavi per dir ma no ti ga dito... Avanti de sto paso no ti impari mai e intanto i ani i se ingruma. Cosa dirghe a i giovani? Niente, tanto i farà la stesa roba e a quei che invece i parti sempre col roso un decimo de secondo prima del verde, no go cosa dirghe, i xe avanti per talento. Un giorno a Trieste go leto una frase de Pasternak: "No se vivi per imparar a viver".

Quando che iero a le elementari go leto tanto, penso due libri la setimana, iero carigo come una susta. Un giorno un mio amico che el iera avanti con le idee el me ga consiglià el romanzo de Jack Keruac Sulla strada (On the road). Me ricordo che discutevimo de le aventure de Dean Moriarty nel garage de casa sua dentro un vecio furgon Citroen che su pare gaveva portà de la Francia. Sognavimo de partir con sto furgon e de rivar fin in Africa per venderghe bira fresca ai beduini.