CHE MOMENTO TREMENDO: In poco tempo semo restai senza la Silvana Wruss, Giancarlo Moscarda e Denis Stefan

Sto anno el xe comincià bastansa mal. E no go in mente solo la tremenda tragedia de Crans Montana (dei quaranta morti in tel fogo in un local, venti i iera minoreni), o la scoribanda de Trump in Venezuela (chissà se ‘desso l’Europa la blocherà i beni americani, come che la ga fato con la Russia e chissà se la ghe regalerà armi al Venezuela, come le ga fato con l’Urcraina); penso invesse ai tropi morti che gavemo avù in sti pochi giorni del 2026.

Dopo che el 9 dicembre ne gaveva lassà la rispetada maestra de Dignan e poetessa Anita Forlani, xe de stamatina la notissia che xe morto l’ex caporedator del Glas Istre Miroslav Sinčić. Lunedì, a l’età de 95 anni per sempre ga serà i oci la professoressa Silwana Wruss. Se la ricordemo in tanti come maestra de italian prima ale ale elementari de Galesan e  Dignan, poi de italian e latin in tel ginasio italian de Pola, ma anche de francese in tel ginasio croato. La xe stada tra i promotori dela ricostrituzion de comitato de Pola dela prestigiosa società “Dante Alighieri” che poi la ga presiedudo per 25 anni. Dando una man a far rispetar el bilinguismo aministrativo, la ghe ga insegnà italian anche ai dipendenti del municipio de Pola e la ga fato anche de guida turistica. La iera una signora elegante, quasi de altri tempi, e la ga meteva sempre sai passion in quel che la fasseva.

Ieri gavemo savà che a l'età de 86 anni xe morto Giancarlo Moscarda, spiritus movens de Fasana. A lui, al defunto Lucio Toffetti e a Luciano Paris ghe vai meriti per la ricostituzion, nel 1992, del Circolo de Fasana, logo indò che per via dela presenza de Tito ale Brioni per 40 anni iera tuti impauridi. Dirigente dela squadra de calcio "Mladost", presidente del Circolo de Fasana e ativista in tel folclore del Circolo de Galesan, el ga anche fondà la società filatelica "Amfora" e tante dele imagini de Fasana che lui gaveva salvà le xe finide in tei francoboli. Oltre che lavorar sul presente, el iera colezionista de memorabilia fasanesi. Con la sua morte gavemo perso una grande parte dela memoria storica de Fasana.

Sempre ieri, personalmente me ga scosso sai la tristissima nova dela morte de Denis Stefan, psicologo e per tanti anni diretor dela Scola elementare italiana Belvedere de Fiume. El gaveva solo 61 anni. El xe sta per 45 anni membro della mandolisnistica della SAC Fratellanza del Circolo de Fiume e grande ativista in campo cultural ma anche politico in tel mondo dela CNI. Fiuman, Denis Stefan iera un amico, un omo bon, con un stile tuto suo, ironico, serio e inteligente con iera de discuter, grande omo de compagnia co’ iera de far festa.  El ne mancherà.

Come che scrivi la poetessa fiumana Laura Marchig, nisun de noi dela Comunità italiana de l'Istria e del Quarnero xe sostituibile. Questo perché semo in cussì pochi e ogni giorno che passa semo sempre de meno....