CO L'ISTRIA DIVENTA EL MONDO: Dai vichinghi a Clint Eastwood, a la Lombardia dei Promessi sposi e altri 130 film famosi girai in tela nostra penisola

Chi che ga qualche ano in più se ricorda sicuro ancora de quela roba strana che, fin ai primi anni Otanta del secolo passà, se podeva veder nel Canal de Leme: un vero e proprio vilagio de vichinghi. 

Case de legno, teti a punta e tori che le pareva rivade diretamente de la Scandinavia. Col passar dei ani le iera diventade quasi un'atrassion turistica, ma no le iera stade fate par i turisti. Le iera quel che restava del set de The Long Ships, un colossal de aventura girà nel 1963-64 e diretto dal britanico Jack Cardiff. El Canal de Leme, par l'ocasion, el gaveva fato finta de esser un fiordo scandinavo. Lo vedè in tela foto publicada da Novella Bačić in tel grupo Facebook Polesani de Pola: el paese dei vichinghi e, de drio, un per de auti parchegiai. Ogi se diria: distopia.

El film iera una coproduzion britanico-jugoslava e el cast no iera proprio de quei de poco conto: Richard Widmark, Sidney Poitier, Rosanna Schiaffino, Russ Tamblyn e Oskar Homolka, insieme a Beba Lončar. Le scenografie le iera de Veljko Despotović e a la produzion gaveva partecipà la Avala Film de Belgrado.

Evidentemente i vichinghi in Istria i se gaveva trovà ben, perché poco dopo i xe tornadi. In tel 1965 Mario Caiano ga girà qua Erik il vichingo, con Giuliano Gemma, Gordon Mitchell e Eduardo Fajardo. Anca sta volta el Canal de Leme ga fato la parte del Nord Europa, certe scene le xe stade girade a Pola. In tel stesso ano el regista svedese Arne Mattsson, usando sempre le stess scenografie del Canal de Leme, el ga girà el film  Här kommer bärsärkarna (Due oriundi per Cesare), con Walter Chiari, Loredana Nusciak e Valeria Fabrizi.

Insoma, par qualche ano, da le parti de Leme incontrar un vichingo forse iera più facile che incontrar un pescador.

Ma questa xe solo una picia parte de la storia dei film girai in Istria. L'Istria Film Commission ga catalogà ben 130 lungometraggi giradi in Istria. E la roba più curiosa xe veder quante parti del mondo che la nostra penisola la ga savudo interpretar: fiordi scandinavi, campi de batalia, Francia, Italia e altri posti che con l'Istria, almeno su la carta geografica, no gaveva gnente a che far.

Clint Eastwood tra Visinada e Caroiba

Uno dei titoli più famosi de la grande stagion jugoslava xe sicuramente Kelly's Heroes (I guerrieri), del 1970. Brian G. Hutton ga portà in Istria un cast che ancora ogi fa impresion: Clint Eastwood, Telly Savalas, Donald Sutherland e Don Rickles. Le riprese le xe stade fate tra Castellier-Santa Domenica, Caroiba e Visinada.

Sete ani dopo xe rivà un altro grande nome del cinema americano, Sam Peckinpah, che a Salvore ga girà Cross of Iron (La croce di ferro), con James Coburn, Maximilian Schell, James Mason e Senta Berger.

E dopo xe rivà perfino Jackie Chan: nel 1986 Armour of God (La prima missione) ga portà el cinema d'azion asiatico a Montona. Nel 1999, invece, Pola e la sua Arena le xe finite nel visionario Titus (Titus) de Julie Taymor, con Anthony Hopkins e Jessica Lange.

Il tel 1989 l’Istria la xe finida anche nel Around the World in 80 Days (Il giro del mondo in 80 giorni), miniserie diretta da Buzz Kulik e trata dal romanzo de Jules Verne. Le riprese le xe stade fate anche a Pola e Dignan, con Pierce Brosnan nei panni de Phileas Fogg e un cast che comprendeva Eric Idle, Peter Ustinov, Christopher Lee, Robert Wagner e Gabriele Ferzetti.

E la lista continua. Nicolas Cage el ga girà a Promontore Season of the Witch (L'ultimo dei Templari), Naomi Watts xe rivada a Rovigno par Diana (Diana - La storia segreta di Lady D), mentre Red Tails (Red Tails), prodoto da George Lucas, ga utilizzà Buie, Draguccio, Grisignana, Montona e Rovigno.

Pochi ani fa The Hitman's Wife's Bodyguard (Come ti ammazzo il bodyguard 2) el ga portà in Istria un'altra compagnia niente mal: Ryan Reynolds, Samuel L. Jackson, Salma Hayek, Antonio Banderas e Morgan Freeman, con riprese tra Momian, Rovigno, Dignano, Cittanova e Antenal.

E i italiani? Franco Nero, Alberto Sordi, Kim Rossi Stuart…

El rapprto tra l'Istria e el cinema italian el xe vecio. Nel archivio se nomina anche Marinai senza stelle de Francesco De Robertis, filmà tra el 1943 e el 1949 tra Fasana e Pola.

Nel 1957 Gillo Pontecorvo ga girà La grande strada azzurra tra Rovigno, Umago e Orsera. Nel cast iera Yves Montand, Alida Valli, Francisco Rabal e un giovanissimo Mario Girotti, che dopo tuto el mondo gaveria conosudo come Terence Hill.

Nel 1962 Rossana Podestà e Philippe Leroy xe rivadi a Pola ear Solo contro Roma, mentre La guerra continua, con Jack Palance e Giovanna Ralli, xe stà girà tra Valle e Rovigno.

Tipicamente istrian xe stà dopo La rosa rossa de Franco Giraldi, del 1973, girà tra Valle, Albona, Pola e Rovigno. El film xe tratto dal romanzo omonimo de Pier Antonio Quarantotti Gambini, scrittor istrian nato a Pisin nel 1910. E qua, per una volta, l’Istria la interpretava semplicemente se stessa, con i loghi e l’atmosfera del romanzo de Quarantotti Gambini.

Nel 1987 Luigi Magni ga portà Franco Nero e Kim Rossi Stuart tra Valle, Gallignana, Pola, Rovigno e San Lorenzo per Il generale, e due ani dopo l'Istria xe diventada addiritura la Lombardia de Manzoni. La grande produzion televisiva de I promessi sposi, diretta da Salvatore Nocita, la ga portà in Istria grandi nomi come  Alberto Sordi, Franco Nero, Burt Lancaster, F. Murray Abraham, Dario Fo e Walter Chiari, le riprese le xe stade fate tra Rovigno, San Lorenzo, Dignano, Zubini e Levade.

In fondo xe proprio questo el bel de la storia cinematografica de l'Istria. Nel giro de pochi chilometri el Canal de Leme pol diventar un fiordo scandinavo, Montona un set per Jackie Chan, Visinada un campo de batalia per Clint Eastwood e un paese istrian la Lombardia dei Promessi sposi.

E par chi che nei ani Setanta e Otanta passava par el Canal de Leme, almeno una de ste finzioni la iera diventada quasi realtà: el film iera finì za de tanti ani, ma el paesoto dei vichinghi el iera ancora là.