Con Ugo Vesselizza, sul quel mureto in cima a via Muzio....

 Ve aviso subito. L’articolo de ogi el sarà sai personale, per certi versi anche privato, ma me par che el tema sia de dignità publica almeno qua in Istria.

Luglio de sto anno xe sta un mese sai bruto per la cultura de Pola. El 12 luglio, a l’età de 79 anni, ne ga lassà Arinka Segando Blašković, una delle due anime (l'altra xe el marì Franci) del grupo musical Gori Ussi Winnetou (cantastorie de storie locali e identitarie e voce critica dela società istriana de ogidì), ma anche impersonificatrice del personagio radiofonico de Siora Spia che per trenta anni la xe stada in modo ironico la coscienza critica dela cità de Pola, a volte fassendo da varichina, altre volta da malva.

Ma xa el primo luglio iera morto Ugo Vesselizza, uno dei poeti più bravi dela comunità italiana In Istria e nel Quarnero (ma anche oltre) e, per quel che me riguarda, el mio più grande amico in tei anni formativi, dai 14 ai 22/23.

Dopo che el’ xe morto, savendo quanto che ierimo ligai, tanta gente me ga domandà “ma perché no ti ga scrito niente de Ugo”? Le ragioni xe tante. Co lui el ne ga lassà no iero a Pola, no iero a Pola gnanche per el suo funeral (i lo ga sepelì el giorno del mio compleano) e, anche se la prima roba che go fato pena tornà a Pola (prima de andar a casa) xe sta andar sula sua tomba, no me la sentivo de scriver gnente.

Ogi, dopo che dala sua morte xe passà quasi un mese, non posso più torvar scuse per no dedicarghe un testo. No so se quel che scriverò el sarà al livel de quel che Ugo se merita, ma provo. E no voio scriver un articolo da enciclopedia, voio contarve Ugo dal mio punto de vista, dal punto de vista de un amico.

Tuti due andavino in tela scuola ‘taliana, mi una classe prima de lui e verso i 14 anni gavemo comincià trovarse con i muli e le mule più grandi (desso me vien in mente el compianto Moris Odor, Roberto Dobran, Manuela Perović, Selina Peročević, Enid Cukon) in Circolo, in una specie de grupo leterario. Proprio su idea de Ugo (che el iera sei mesi più giovane de mi) gavemo preparà un recital sul poeta russo suicida Majakovski che mi no gavevo idea che el iera.

Tornando a casa dal circolo (ma no solo dopo el grupo leterario, anche de sera tardi dopo la discoteca), per quatro anni fassevimo quasi tuta via Muzio (ex Omladinska, ogi Radićeva) insieme, fin al punto in cui lui el girava a destra (verso via Olga Ban, dove che el stava) e mi a sinistra, verso el colmo de Monte Paradiso. Sul quel mureto, prima de saludarse, se fermavino a ciacolar: a volte mesa ora, a volte un'ora, a volte anche quatro o cinque ore, fin che fasseva giorno.

Quel mureto el ga sentì tanta de quela roba: le nostre discussioni su taliani de l’Istria, sul comunismo da refar o lassar star, su coss’ che dovessimo far in circolo. Ma anche sula musica, quela dei cantautori italiani (a lui ghe piaseva Francesco Guccini, Fabrizio De’Andrè e Sergio Caputo), de musica classica (me ricordo che una volta, dopo una sua incredibile storia romantica a Capodistria, gavevino comprà tuti due un disco de Prokofiev), dei grupi locali come i Šumski svirači Gortanove uvale e i Gan Catlizan indò che sonava el suo compagno de classe Sandro Peročević,  ma specialmente dei Doors. Quela volta Ugo gaveva i cavei lunghi, ma lunghi per vero, fin soto le spale, e un fià el me ricordava Jim Morrisson.

Ma più de tuto, quel mureto ga scoltà parole sula poesia. E per el 90% iera Ugo che parlava e mi che scoltavo. El parlava de poeti locai (ghe piaseva Cocchietto), dei grandi poeti internazionai (più de tuto Baudelaire e Rimbaud) ma el parlava anche de teoria leteraria. Prima su quel mureto, ma anche dopo, insieme a Padova a l’università, xe sta Ugo a spiegarme Wittgeinstein e Heidegger, a studiar la diferensa tra leteratura e realtà e quando che, come che diseva Pirandello, la letteratura la costrussi la realtà.

Tante de ste parole le finiva in Panorama Giovani, l’allegato a colori dela rivista “Panorama” de Fiume che la iera diventada una palestra de pensiero politico e una vetrina leteraria per i giovani taliani de l’ex Jugoslavia. Per due o tre anni Ugo iera stado uno dei colaboratori più bravi de “Panorama Giovani”.

Una ventina de giorni prima dela sua morte, me xe capità in man un per de numeri de “Panorama Giovani” e dela rivista “El clivo” del Circolo de Pola. Go trovà articoli scriti da mi e scriti da lui. Per quel che riguarda, i mii, si, i iera scriti ben per un mulo de 17/18 anni, ma no iera niente de straordinario. Quei de Ugo invesse, oltre a l’italian meraviglioso che lui usava, i iera pieni de personalità, analisi profonde, osservazioni originali. El iera avanti anni luce. E go ciamà subito un nostro amico comun per dirghe che mi no iero mal, ma che Ugo iera una bomba.

In dificoltà per quel che riguardava le robe dela vita del ogni giorno, co se parla invesse de leteratura e de lingua Ugo el iera un genio. In tele sue biografie troverè che el ga frequentà la Facoltà de Lettere e Filosofia de Padova che el ga dovù abandonar i studi per motivi de salute. Ma no troverè che i primi dieci dei venti esami totali li ga tuti superai con el voto de Trenta e lode, né troverè che el tornava deluso dale lezioni disendo “so più mi che el professor”.

I motivi de salute. No ve conto i detagli ma ve digo questo. Ugo xe cressù savendo che sua mama la saria poduda morir da un momento a l’altro causa una leucemia che i ghe gaveva diagnosticà co Ugo el iera sai picio. Per fortuna, la xe rivada a viver fino ai 18 anni de Ugo, la xe morta fin che el iera (o poco dopo) militar a Skopje dove che, in modo iresponsabile, i lo gaveva messo in tela polizia militare e ghe tocava dormir per noti de fila in tei sachi a pelo in busi scavai dentro la neve.

Trauma dopo trauma, una note, in tela casa studente de Padova (mi iero al secondo pian, lui al quarto), el me ciama al citofono disendome “vien subito su de mi”. Rivo in camera de lui, lui el scoltava una canzon de Sergio Caputo con i versi “abito qui perché non sali, ho una collezione di medicinali” e poi el me disi “no rivo, portime a Pola”.

A Padova no el xe tornà mai più. Ma in tela cità veneta el gaveva fato certe amicizie, in primo logo con i critici letterari Fernando Marchiori e Stefano Dal Bianco che più tardi i che publicherà poesie e interventi critici in riviste leterarie italiane.

I anni de Pola per Ugo i xe stai duri, ma lo stesso el ga rivà studiar latin, greco e tedesco (“no se pol svilupar pensieri filosofici seri senza saver el tedesco, el diseva”), farse publicar da l’Edit de Fiume la sua racolta de poesie “Acqua sull’acqua” e qalche saggio in tela rivista leteraria “La Battana”. Grazie a Boris Biletić (poeta, tradutor, editor, fondator e diretor della rivista ltteraria Nova Istra, dirigente dela Società dei leterati croati de l’Istria), Ugo se ga visto publicar la meravigliosa traduzion in italian (fata con l’assistenza de l’amico polesan Željko Jakšić) dela racolta de poesie “Kolajna” (“Collana”) de Tin Ujević, uno dei più grandi e particolari poeti croati. E xe de dir che chi che ’sai stima Ugo xe Mauro Sambi, polesan professor de chimica all’Università de Padova, ma anche grande appassionà de poesia e bravissimo poeta lui stesso che, tra l’altro, el ga presentà Ugo in tela rubrica "Voci Oltrenordest" del blog leterario Cartesensibili.

De più no ve conto. Ve digo solo che co ripenso a Ugo me vien in mente el mureto, quela volta che lo go visto giogar ping-pong in tel palasport de Pola che a l’epoca el se ciamava “Savo Vukelić”, i bagni a Stoia con i fradei Mocenni, i defunti Vittorio Fraccaro e Eros Kliček, le ridade con Alen Deghenghi (compagno de classe de Ugo, bravissimo tennista e morto a soli 36 anni), le ciacolade a Padova con Egidio Ivetić (polesan, ogi professor de storia a l'Università de Padova) o in camera de un altro polesan, quel Sergio Ceccada, ignegner che 'l recitava a memoria in croato parti del romanzo Kiklop de Ranko Marinković), quela caminada a pie de note da Medolin a Pola (con noi iera el suo compagno de classe, el giornalista de "La Voce" Giuliano Libanore) e quel giorno del 1985 che, go gavevo 'pena fini de far el militar JNA a Brčko, invesse de andar a casa son andà ancora più lontan, a Skopje, a trovar Ugo che el militar lo gaveva ‘pena comincià. E in un bar sora el fiume Vardar gavemo ciacolà per ore. Pareva de star sul mureto….