DUBROVNIK LA XE FAMOSA, MA ANCHE L'ISTRIA LA GA COSSA MOSTRAR: Croazia, oto meraviglie mondiali in un Paese picio picio

El sindaco de Dubrovnik (Ragusa), Mato Franković, pochi giorni fa el ga dito che la sua cità saria l'unica vera campionessa del turismo croato e che la magior parte de la gente, fora del Paese, no savaria gnanca dove che se trova l'Istria. El giorno dopo el ga domandà scusa, riconossendo che quel che el gaveva dito iera fora posto e precisando che la sua critica la iera rivolta a certi protagonisti del turismo istrian, no a l'Istria e ai istriani.

Le scuse xe sempre ben acetade ma, anca se no le saria rivade, no gaveria avù lo stesso intension de consumar el spazio de sto nostro articolo in dialeto per una polemica de bassa lega. Al contrario, sto fato de cronaca poco serio e trascurabile el me ga fato pensar a quante beleze naturali, paesagistiche e culturali, conossude e quasi uniche al mondo, che la Croazia la ga de mostrar, pur essendo un Paese cussì picio.

No parlo semplicemente de posti incantevoli, come che xe anche la nostra istriana Montona, che spesso, esagerando, semo portadi a considerar unica, dimenticandose che solo in Italia ghe xe decine de borghi fortificai in colmo al monte, altrettanto o ancora più bei e afascinanti. Basti pensar a Ostuni, Orte, Ascoli Piceno, Volterra, Urbino, San Gimignano, Brisighella, Anghiari o Monteriggioni.

Me riferisso, invese, a quele autentiche meraviglie dela Croazia che se le pol meter tra le ecelense mondiali. Posti, monumenti e paesagi che, per carateristiche naturali, storiche o architetoniche, le rapresenta qualcossa de veramente straordinario, dificile de paragonar a quel che se pol trovar da altre parti.

In altre parole, go fato un'analisi tentando de trovar una risposta a sta domanda: quale xe le beleze che la Croazia pol mostrar al mondo, vantando una vera e riconossibile unicità?

Secondo sta analisi, ben oto realtà croate se le pol meter ai vertici mondiali in tele rispettive categorie. Certe le xe conosude dapertuto e le xe subito spetacolari, come Dubrovnik stessa, i laghi de Plitvice, l'Arena de Pola o l'arcipelago de le Incoronate. Altre le xe meno apariscenti, ma le ga carateristiche storiche, architetoniche, scenografiche o paesagistiche quasi uniche.

La richeza del patrimonio naturale e culturale de la Croazia la diventa ancora più significativa se se tien conto de le dimensioni del Paese. Con circa 3,8 milioni de abitanti, la Croazia la ocupa più o meno el 130° posto al mondo per popolazion. Con una superficie de 56.594 chilometri quadrati, invece, la xe intorno al 127° posto per estension teritoriale. Ma se femo una valutassion qualitativa del patrimonio natural e cultural, la Croazia la vegneria a trovarise intorno al quindicesimo posto assoluto al mondo, drio a le grandi potenze storiche, culturali e paesagistiche come Italia, Cina, Egitto, Turchia, Grecia, Spagna, Francia e Giapon. Se poi metemo in raporto la concentrazion de le sue ecelense con el numero de abitanti e con l'estension del teritorio, la Croazia la se rampigasso indicativamente al quarto posto mondiale rispetto a la popolazion e al quinto rispetto a la superficie, escludendo i microstati come el Vaticano.

No se trata de una classifica uficiale, ma de un confronto ragionà, basà su la presenza de beni che pol aspirar ai primi posti mondiali ne la propria categoria. E vedemole, alora, ste belesse. E cussì stavolta in sta nostra rubricheta, che de solito la xe un comento in bianco e nero, metemo anche qualche bela foto a colori.

Dubrovnik (Ragusa), una de le più bele cità fortificate sul mar

Ragusa (Dubrovnik), patrimonio de l'UNESCO e meta de circa un milion e mezo de arivi turistici ogni ano, ai quai xe de giuntar mezo milion de crocieristi, se la pol comodamente meter ai massimi vertici, insieme a La Valletta a Malta, e Saint-Malo, in Francia, e davanti a Rodi, Cartagena de Indias in Colombia e Essaouira, in Maroco, tra le cità fortificate che le sta  sul mar. E bisogna dir anche che Dubrovnik la xe anche più famosa e visitada dele bele citadine fortificade italiane come Siracusa, Otranto, Alghero, Gallipoli e Gaeta. In tel conto no metemo Venezia che xe tuto un'altra roba.

Se però slarghemo el confronto a tute le cità murade, anche a quele in teraferma, Ragusa no ga un primato indiscusso, perché la se devi confrontar con Carcassonne, citadela medieval francese con dopia cinta murada e cinquantadò tore, visitada complessivamente da quasi quatro milioni de persone ogni ano, e con Pingyao, in Cina, cità fortificada con sei chilometri de muri, conservada in modo ecezional dai tempi Ming e Qing, patrimonio UNESCO che nel 2025 el ga superà i undise milioni de visitatori.

L'Arena de Pola e la richeza de l'eredità romana

Pur no essendo ancora riconossuda da l'UNESCO, l'Arena de Pola, visitada normalmente da circa 400-500 mila persone ogni ano, se la pol meter, a parità de numeri, con quel de El Jem in Tunisia, tra el quarto e el quinto posto al mondo tra i anfiteatri romani meio conservadi e visitai dai turisti, dopo el Colosseo de Roma (14,7 milioni de visitatori), l'anfiteatro de Pompei (4 milioni de turisti, ma i numeri i xe riferidi a tuto el parco archeologico) e l'Arena de Verona (600 mila ingressi turistici e oltre 400 mila spetatori dei spetacol), ma prima de quei de Arles (350 mila) e de Nîmes (260 mila) in Francia. Per farse un'idea xe ben saver che nel mondo xe stadi identificadi circa 260-280 anfiteatri romani, ma, se del conto cavemo quei sparidi del tuto o incorporadi in tela urbanistica moderna, come a Lucca, ghe ne resta circa 230 con resti archeologici ancora riconoscibili; solo una ventina i xe ancora in pie con struture monumentali consistenti.

L

Se poi consideremo anca el Tempio de Augusto, l'Arco dei Sergi, el Foro, le porte, el teatro e i mosaici, Pola figura tra le prime sei o sete cità fora de l'Italia per concentrazion de resti romani. Pur restando drio ai grandi complessi de Efeso, Gerasa, Mérida e cità come la spagnola Tarragona e Nîmes, Pola la se pol vantar de un patrimonio romano che poche altre cità al mondo ga conservà. Ma anche ne la stessa Italia, dopo Roma, Verona e Pozzuoli, e insieme — e forse anche de più — de Aosta, Brescia e Benevento, Pola la conserva una granda concentrazion de monumenti romani, tanto più eccezional perché tuta concentrada in centro storico bastansa picio.

Piazza Foro con el Tempio de Augusto

Plitvice, una meraviglia che no xe solo cascate

Patrimonio naturale de l'UNESCO e visitadi nel 2024 da quasi un milion e mezo de persone, i laghi de Plitvice no i pol competer, se li giudichemo solo per la potenza, l'altessa e la spetacolarità de le cascate, con quele del Niagara, tra Canada e Stati Uniti, con quele de l'Iguazú, tra Argentina e Brasile, con le cascate Vittoria, tra Zambia e Zimbabwe, o con el Salto Ángel, in Venezuela.

foto: NP Plitvička jezera

I riva invece in cima de la classifica mondial co se considera perché le xe speciali: un sistema vivo de sedise laghi a terasse, boschi, cascate e bariere de travertin che continua a formarse. Un paesagio paragonabile sopratuto a Jiuzhaigou, la val cinese dei laghi turchesi e de le cascate tra i boschi, e a Huanglong, famoso per le migliaia de vasche colorade de travertin disposte a terasse.

Le Incoronate, un mar de isole che no se trova dapertuto

Le Isole Incoronate, o Kornati, no xe patrimonio de l'UNESCO e no se le pol confrontar con le Galápagos o Raja Ampat (arcipelago indonesian, paradiso mondial de biodiversità marina: le sue acque ospita oltre el 75% de le specie de corali conosude al mondo, oltre a pesci tropicali, mante e tartarughe marine), né con la Polinesia per el rigoglio tropical.

foto. Travelcroatia

Anche tuta la costa croata, per quanto straordinariamente frastaiada, no la xe quantitativamente paragonabile ai teritori insulari de la Svezia, che la ga circa 267.500 isole, de la Norvegia, con circa 239 mila, de la Finlandia, con quasi 179 mila, del Canada con 52.455 o del Cile con 43.471 isole.

Ma la concentrazion de le Incoronate — circa 150 tra isole, isoleti e scogli — l'aridità del paesagio calcareo, le coste a pico sul mar e la straordinaria continuità del paesagio marin fa de sto arcipelago probabilmente el più carateristico arcipelago carsico arido del Mediterraneo e uno dei primi diese paesagi nautici insulari del mondo.

Parenzo, una basilica che val più de quel che tanti pensa

La Basilica Eufrasiana de Parenzo no ga la notorietà de Ravenna o de Istanbul e no la pol competer con queste per la quantità de mosaici bizantini. Ma anche se consideremo solo questo criterio la vien prima de San Marco e Santa Maria Assunta di Torcello de Venessia, le basiliche paleocristiane de Roma o i resti bizantini a Salonicco.

foto: Wikimedia Commons

Ma, quel che più conta, la conserva uno dei complessi episcopai paleocristiani più completi al mondo, con basilica, atrio, batistero, capela e palazzo vescovile. Se el criterio no xe solo l'estension dei mosaici, ma l'integrità de tuto el complesso, Parenzo la sta ai vertici de la classifica mondiale.

Spalato, el palazzo imperial diventà una cità

El Palazzo de Dioclezian a Spalato el pol aspirar al primo posto mondial tra i palazzi imperiali romani ancora riconossibili, abitadi e integradi ne la cità contemporanea. Costruì tra el terzo e el quarto secolo, el iera insieme residenza imperial e fortezza, con muri, porte monumentali, soterranei, mausoleo e Tempio de Giove.

El centro storico de Spalato el se ga svilupà dentro i muri del vecio palasso de Diocleziano

La sua ecezionalità xe la continuità de vita: le strade interne le xe diventade vie e piasse, el mausoleo la catedral de San Doimo e el tempio el batistero. Roma e Villa Adriana conserva complessi più grandi, Gamzigrad, Treviri e Costantinopoli ga palazzi ridoti a rovine o resti sparsi. Eco perché Spalato resta un caso quasi unico: un palasso romano che nei secoli xe diventà la cità stessa.

La piana de Stari Grad a Hvar (Lesina), un paesagio agricolo de oltre domila ani

La Piana de Stari Grad, su l'isola de Lesina, xe uno dei più antichi e meio conservadi paesagi agricoli organizadi dai Greci e ancora in uso. Dopo la fondazion de Faros, nel 384 avanti Cristo, i coloni greci i ga diviso la pianura in parcelle regolari, separade da strade e muri de piera a seco.

Quela geometria de 2.400 ani fa la xe ancora visibile e i campi continua a esser coltivai a vigne e olivi. Metaponto, in Italia, e Chersoneso Taurico, in Crimea, conserva altre importanti divisioni agricole greche, ma in pochi posti el sistema antico el xe restà tanto integro e ancora vivo. Per questo la piana xe patrimonio UNESCO dal 2008.

Spalato e Stari Grad i xe meno conossudi de Dubrovnik, ma in tele sue categorie i pol rivendicar un primato ancora più s'ceto.

Sebenico, una catedral solo piera e niente malta

Tra le ecelense monumentali croate bisogna meter anche la Catedrale de San Giacomo de Sebenico, fata, come i trulli de Alberobello, interamente de piera e sensa malta. In tela sua specifica categoria tecnico-architetonica, la se pol considerar un caso quasi unico al mondo.

Tanto per far capir quanto che xe speciale sta cesa de Sebenico, basta pensar che l'UNESCO la considera un capolavoro eccezionale de l'architetura in piera: una costruzion dove muri, pilastri, volte e cupola xe fati de elementi de piera sagomadi e incastradi con una tecnica straordinaria. Una particolarità che la fa anche più preziosa (anche se meno spetacolar) perfin da meraviglie come i trulli de Alberobello, i nuraghi de Sardegna, le gigantesche mura inca del Perù, el santuario de Borobudur in Indonesia, l'acquedoto de Segovia, le mura ciclopiche de Micene in Grecia e i templi megalitici de Malta.

No perché la sia più granda o più bela, ma perché la ga savudo trasformar la piera in una strutura architetonica completa, con una tecnica che l'UNESCO riconosse come unica nel suo genere. In conclusion, quel de Sebenico el xe probabilmente el primato tecnico più neto: una strutura fata tuta de piera, con lastre, nervature, volte e cupola messe insieme con una tecnica fata cussì ben che xe robe de mati.

Un Paese picio, ma con una richesa enorme

A sto punto, visto come che sta le robe, mi me par ciaro che la question no xe stabilir se Ragusa xe più famosa de l'Istria. La vera question xe riconosser che el vero valor, e de conseguensa la forza turistica de la Croazia, no sta in una sola cità o in una sola region, ma ne la straordinaria concentrazion de meraviglie naturali e culturali che un territorio cussì picio el ghe riva a mostrar al mondo.

Un patrimonio cussì rico e diferente che le polemiche paride da Dubrovnik le finissi per parer, in fondo, un fià tropo provincialote.