El 29 novembre, el mio amico kossovaro e i campi de concentramento

Ogi xe le 29 novembre e tanti de voi se ricorderà che soto la defunta Jugoslavia quela del 29 novembre, Giorno dela Republica, la iera, con el Primo magio, la feste più grande de quei tempi. Oltre a esser anche un fabrica de salami e carne in scatola, per dirla giusta iera due i 29 novembre che se festegiava. El primo iera quel del 29 novembre del 1943 co a Jajce, in Bosnia, el Consiglio antifascista de liberazion nazional dela Jugoslavia (Antifašističko vijeće narodnog oslobođenja Jugoslavije – AVNOJ), el gaveva stabilì del abolir la monarchia dei Karađorđević e de fondar un stato federativo una volta  finida la guera.

El secondo 29 novembre iera quel del 1945 co, a l'Assemblea costituente, xe stada proclamada la Repubblica popolare federativa de Jugoslavia (Federativna Narodna Republika Jugoslavija - FNRJ) con Tito presidente del Governo.

Insoma, el 29 de novembre el iera sta una specie de „rodiliste“ dela Jugoslavia socialista, con la riunion de Jajce che la gaveva un valor simbolico, un poco come Romolo e Remo per la fondazion de Roma o Cristoforo Colombo per l'America in tei oci de noi Europei che prima de quel 1492 no la gavevino mai vista  o, no gavevino lassà nissuna testimonianza de gaverla vista.

Quaranta anni dopo i fati del 1945 iero militar a Brčko, un posto che tanti conossi per la famosa ferovia Brčko – Banovići  fata col lavoro volontario, che 'l sta in Bosnia, sula sponda sud del fiume Sava. Oltre al ponte xe Croazia, una cinquantina de chilometri più a este xe Serbia. Soto la naja de funzion iero quel che quà i ciamava „čato“ (ciato), in italian saria furiere, quel che, anche se de leva e senza gradi, el tegniva in man la documentazion dela compagnia, el stabiliva chi che doveva esser de guardia e chi che doveva netar i gabineti, el tegniva evidenza delle licenze e robe compagne. Ogni matina mi me tocava anche andar in cità in lateria e portaghe el late fin al parco dei veicoli e darghelo a quei militari che i lavorava con le baterie (acumulatori) dei cari armati. I diseva che 'l late el neutralizava el velen che i respirava da quel baterie.

Bon, uno dei mii amici iera un Kossovaro, de cognome el fasseva Murtezi (se legi Murtesi) e 'l nome no ve lo digo per una question de praivassi. El iera un bonacion, sensa scole, semianalfabeta, el gaveva visto sai poco sfalto in via sua, e la tevision mai prima de far el militar. Desso posso anche confersarve che, per farghe el favor ai mii compagni de leva, no de rado scrivevo licenze false, scassinando con el cazavide l'armadio indò che stava el blocheto con le licenze e i timbri e firmandome in cirilico come se fossi mi el tenente montenegrin, in modo che i podessi andar a casa dal venerdì dopopranzo ala domenica sera. In cambio becavo ciocolate, burek e ‘l dirito de farme la docia ogni giorno, invesse che una volta la setimana, come da regolamento.

Sta roba capitava ogni do mesi per ognidun de lori, ma Murtezi un giorno el iera vegnù solo quindici giorni dopo che ‘l iera xa sta a casa de foravia. Mi ghe lo gavevo fato notar, ma lui el me gaveva risposto che iera un urgenza, che el doveva andar a casa per….far fioi.

Ma desso tornemo al 29 novembre, de cui anche Murtezi iera sta, a suo modo, protagonista. Prima de leger ricordeve che Jajce iera una logo sacro per la Jugosavia federativa. Ogni sera, ale 7 e mesa, gavevino l’obligo de guardar el telegiornal e capitava che la matina dopo i uficiai ne domandassi de darghe la prova che el “tiggì” jugoslavo lo gavevino gurdà per vero. Ben, quela volta iera capità un controlo, con el comandante dela caserma, un general serbo che ‘l ne guardava e scoltava le nostre risposte. El nostro comandante, el tenente montenegrin, el iera sai stà sai poco sgaio e ‘l se ga messo interogar Murtezi. Ecco quà coss che i se gaveva dito.

Tenente:             Murtezi, ti ga guardà el telegiornale ieri sera?

Murtezi:               Si, compagno tenente.

Tenente:             Ti sa dirme coss’che i ga fato veder al telegiornale?

Murtezi:               No, compagno tenente.

Tenente:             Come no ti sa? I ga fato veder Jasenovac. Ti sa almeno coss’ che iera a Jasenovac?

Murtezi:               No, signor tenente.

Tenente:             Ma come no ti sa? Iera un campo de concentramento! De   sterminio! La i ustassi i copava i partigiani, i antifassisti, i Serbi, i singani, i omossessui….

Murtezi:               Ve ben, compagno tenente.

Tenente:             No va ben!

Murtezi:               No va ben, compagno tenente.

Tenente:             Bo, ti ga capì coss che iera a Jasenovac?

Murtezi:               Un campo de concentramento, compagno tenente.

Tenente:             Poi in television i ga fato veder anche altro. Ti te ricordi cossa?

Murtezi:               No, compagno tenente.

Tenente:             I ga fato veder Jajce el 29 novembre del 1943. Cossa iera a Jajce?

Murtezi:               (dopo gaver pensà un poco) Anche un campo de streminio!

Insoma, Murtezi, inocentemente ignorante, el gaveva profanà uno dei loghi più sacri dela Jugoslavia socialista. Se lo gavessi fato mi, son sicuro che no i me gavessi lassà andar a casa per altri tre anni. Tanto i me gaveva xa ciapà per spia italiana dopo che el bon Claudio Deghenghi el me gaveva mandado per posta una racolta de sei mesi del giornal “Panorama” de l’Edit de Fiume che el iera finanziado dall’Alleanza socialista del popolo lavoratore di Croazia. “Strani tisak kapitalističke reakcije“ (Stampa straniera dele reazion capitalista) me gavevo dito a l'interogatorio el capo del controspionaggio, una capitano che 'l gaveva l'uficio insonorizà con porte dopie.

Ma questa xe un’altra storia. Come anche quela che per qualchedun anche la Jugoslavia socialista, con l’Isola calva (Goli Otok) la se gaveva rivelà un campo de sterminio. Sorte tocada anche a un partigian de Pola, poi andà esule a Sesto San Giovanni vicin Milano, logo conossudo come la Stalingrado d’Italia. Quel Polesan el iera papà de Sergio Segio, ex terorista (o combatente per la rivoluzion?) che presto el riva a Pola per presentar el 5 dicembre el suo libro “Miccia corta” ala Fiera del libro. Come che, dopo gaver avù un pare maltratà dai comunisti, lo stesso el gabia scelto la lotta armata per el comunismo, xe uno dei mile misteri de un secolo inverigolà come che xe sta el Novecento.

Saria de scriver anche dela marcia contro el fascismo che se farà domani in varie cità dela Croazia, Pola compresa. Ma ormai go scrito tropo, speremo solo che resti ciaro el fato che esser antifascisti non vol dir esser comunisti, e che esser antifascisti ogi vol dir oporse in genere a una tendenza globalistica a l’intoleranza e al nazionalismo che ‘l sta rispuntando in in Croazia,con tanto de colona sonora ei simboli e saluti che i pareva esser xa stadi sconfiti e canceladi dala storia.