Da quando che xe crolà el socialismo autogestito monopartitico comunista per farghe posto ala democrazia parlamentar, i italiani de Croazia e Slovenia i ga votado 10 volte per nominar i propri rapresentanti sia in tei circoli a livel local, sia in tela Unione Italiana intesa come organizazion unitaria in tei due paesi nati dala dissoluzion della Jugoslavia.
El 31 maggio de sto anno sarà l’undicesima volta che se va ale urne, ma invesse de esser una festa della democrazia interna ala comunità italiana, l’evento el fa anche un fià de paura: la paura che sarà pochi quei che i andarà a votar.
El calo dei numeri dei membri della minoranza italiana, drasticamente visibile da censimento in censimento, el xe andà de pari passo anche con una specie de disinamoramento per i nostri Circoli e l’Unione. Ale prime elezioni democratiche de l’UI, quele del 25/27 genaio del 1991, gaveva votà ben 13.150 dei 15.563 eletori con dirito de voto, che saria ben l’84,48%. Poi, da elezion a elezion, sta percentuale la ga comincià a calar tocando un triste 16% ale elezioni del 26 giugno del 2022.
Solitamente, le elezioni per el rinovo dei incarichi in tei circoli le se svolgi el stesso giorno (e in tel stesso logo) de quele per l’Unione. Rovigno sto anno ga volù far diversamente, là i ga votato per el rinovo del Consiglio dela Comunità degli Italiani xa el 12 aprile e, e come tuti i altri, el 31 magio i ‘ndarà de novo ale urne per votar i sui rapresentanti in tel’ Assemblea dell’Unione, ma anche per votar el presidente de l’UI e dela Giunta UI. Ben, el 12 aprile a Rovigno ga votà solo el 15,44% (332 votanti su 2.150 aventi diritto) che xe una Caporetto se se pensa che in tel 1991 a Rovigno gaveva registrato el 90,29% de afluensa ale urne.
Dito questo, xe tre le robe che me premi segnalar.
La prima xe che ale 8 de sera de dopodomani, 4 magio, scadi el termine per candidarse. Se, per iperobole, volessimo paragonar l’assemblea dell’Unione Italiana al parlamento italian e a quel croato, se acorgeriimo subito che a Montecitorio e al Sabor dal 1991 in qua xe cambiai mile nomi, mile governi, mile partiti. Per fermarse in Croazia, rispeto a quei de 35 anni fa, tra i partiti xe restari ativi fin a ogi solo l’HDZ, l’SDP e la DDI/IDS. In tela nostra minoranza, invesse, dove che el richiamo dela politica el xe sai debole e ciorse un incarico no xe sempre un segno de ambission personal, ma anche un gesto de responsabilità de quei che i ghe tien ala comunità italiana, el rinovamento dei quadri el va sai per le longhe. Questo anche perché quel che una volta ciamavino “senso di appartanenza nazionale” el xe sai più presente e sentito in tele vece generazioni, piutosto che tra i giovani. Ma questa no la pol e no la devi esser una scusa, perché gavessi dovù esser proprio i veci a motivar i giovani a farse strada. Xe ancora due giorni de tempo per candidarse: saria bel veder, tra i candidati, tanti nomi novi, anche per far un poco de onde i sto mar piato che da tropo tempo xe l’Assemblea de l’Unione. El fato che l’anno scorso, per l’incarico de vicesindaco italian a Pola, Dignan, Buie e Vertenglio se gabi candidà tanti Under 40 el dimostra che co se vol, se pol.
La seconda roba riguarda el dirito, che in tel caso de una minoranza xe quasi un dover, de andar a votar. Saria facile sparar contro la croce rossa e dir in lungo e in largo che i italiani de Croazia e Slovenia no i va a votar ale “sue” elezioni perché quei che ga governado l’Unione fin desso no i ga savà inganzar i eletori con programi e interessi importanti e preziosi al punto de tegnir viva, in ogni eletor, la voia de andar a votar. Me premi invesse dir de più un’altra roba, cioè che una scarsa adesion ale urne la xe un’ofesa nei confronti del ruolo e del peso storico dei italiani in Istria e in tel Quarnero nel corso dei secoli. Decidendo de no andar a votar se svalutemo soli con le nostre mani, mandemo el messaggio che semo pochi, disinteressai a noi stessi e carighi de ignavia (e Dante ga smacà i ignavi in tel inferno). In un momento in cui se registra una ripresa del bilinguismo grazie ala Region istriana e ale Cità e Comuni indò che esisti el bilinguismo, disertar el voto xe come dir che ne va ben rinunciar a star unidi e organizadi. E se xe de cambiar l’Unione, se no la ne va ben come che la xe, le elezioni xe la bona ocasion per farlo.
La terza roba riguarda i programi e l’imagine che i italiani de Croazia e de Slovenia i da de se stessi. Una volta, co comandava i comunisti, i ciroli iera i loghi indò che i film novi ti li podevi veder un anno prima che in tei cine dele nostre cità. i Ioghi indò che rivava strumenti musicali, rifletori e tecnologie che i nostri amici croati e sloveni se podeva solo insognar. Poi, co xe rivado el mercato libero, invesse de esser l’avanguardia del rinovamento semo stai sorpassai de bruto, continuando a far robe da XX secolo. Me rendo conto che per una organizzazion, come l’UI, indò che l’identità nazionale la xe centrale, operar in un mondo(quel de ogi) dove che no solo l’identità nazionale la xe sai for moda, ma la stessa identità la vien percepida come roba fluida (a partir dala domanda “son femina o son masc’io, o qualcossa altro?) xe sai dificile imbocar la strada giusta. Ma non per questo se devi rinunciar a idee e sfide del tuto inovative rispeto a quel che gavemo fato fin desso, con programi in grado de trasformar i circoli in loghi de interesse cultural, social e agregativo sia per i italiani, sia per i altri. Sensa rinunciar ala sperimentazion. Xe per questo che dovemo dir “largo ai giovani”.
