EL CASO DE LA CASA NOVA SORA DE L'ARENA. Se Gabriele Emo el sarìa vivo ogi, de sicuro de mestier el farìa l'urbanista

Se ogi, per magia, el patrizio venessian che la tradission ricorda come el “salvador de l’Arena Gabriele Emo el tornassi a Pola,”, el faria fadiga a riconosser el nemico. Verso la fine del Cinquecento el se gaveva messo contro de quei che i voleva smontar l’anfiteatro roman de Pola per tirarlo su de novo da qualche parte vicin de Venessia. “Gnanca par sogno”, el gavaria dito alora.

Ogi, inveze, per far danno no ‘cori gnanche tocar una sola piera de l’Arena. Basta tirar su una palassina che la la supera in altessa. El monumento el resta là dove che el xe, ma el resta anche sensa fià. Quasi meso milenio fa, secondo la tradission, i voleva smontar e portar via l’Arena; ogi la se lassa star la dove che la xe, basta che visivamente no la domini più el paesagio. Xe una forma più furba de conquista, una specie de vendeta contro Emo: no distruger el monumento, ma trasformarlo, invadendo el suo spazio, trasformandola, in tele percezion visiva, in una costruzion come tante altre.

Cussì podaria sonar un comento che ‘l meti insieme el gesto nobile de Emo con quel che capita ogi a Pola, dove l’investidor priato MER Arena el ga tirà su, drio l’anfiteatro, sul canton tra via Varaždin e via Croazia, una palassina de quatro piani che la rovina la vista del monumento roman sia dal mar che de drio e sora. E so fato el ga scatenà un casin de polemiche tra i polesani.

Eppur, quel del principio de sto articolo, el saria un comento bastansa tirà par i cavei, sai semplificà e quasi telefonà, fondà su una storia che la ghe somiglia più a una legenda che a la storia vera. Saria sbalià doperar Emo come una clava  ideologica e dir che lu, l’omo che gavaria salvà l’Arena, ogi el sarìa pronto butar zò quella casa nova. Le robe le xe un fià più complicade.

Prima de tuto bisogna dir che i storici no i ga mai trovà un documento vero che confermi che le autorità venessiane le gavessi per vero gavù l’intenzion de smontar e trasferir l’Arena de Pola in un altro posto. E la facenda la se complica ancora de più quando che legemo quel che ga scrito el “Plutarco istrian”, el storico de Barbana Pietro Stancovich (1771-1852); lui el scrivi che “un certo architeto” el voleva tirar xo l’anfiteatro a colpi de canòn, ma che Emo no lo ga lassà far. E desso ciapà qua! Gavemo za perso una bona parte dela credibilità del eroe che el iera la base de la tesi iniziale de sto commento.

In più, xe de dir che la casa nova drio l’Arena la xe stada costruida nel pien rispeto de le norme. La stessa architeta Helena Sterpin la ga dito: “Purtroppo xe tuto legale”. Ma ghe xe anche un altro elemento che ne complica de tirar in balo Emo. In una fotografia storica fata dopo i bombardamenti aleati de Pola del 1944 e 1945, quasi nel stesso punto dove che ogi se trova la costruzion nova, se vedi una casa bombardada de altezza quasi precisa. Vero xe che no la gaveva quatro piani ma tre più la sofita, però le altesse interne de quei tempi le iere più alte de quele de ogi.

E cossa dir del fato che tra el 1929 e el 1931, proprio drio l’Arena, xe stada costruida la cesa de Sant’Antonio, col suo campanil che domina ecome la visual de l’anfiteatro? Me vien quasi de dir che se ogi no vedessimo quel campanil che ‘lvien fora drio l’Arena vardandola dal mar, poca ma sicuro el ne mancherìa.

E ‘lora, cossa far? Gavemo de rinunciar a Emo e rassegnarse a l’idea che un giorno, in un mondo dove che el capital el sgretolerà la storia, vedaremo l’Arena imbragada tra blocchi de cemento? Mi dirìa de no.

La storia la ne ga lassà personagi che forse no i xe mai esistidi e fati che forse no i xe mai capitai, ma che i se ga piantà in fondo in tela la memoria coletiva de popoli e nazioni. No ghe xe prove che Guglielmo Tell el sia veramente mai vissudo, ma la sua storia la ga contribuì a formar l’identità svissera. Lo stesso val per Re Artù: la sua esistenza storica la xe poco sicuro, ma el mito el ga influensà la cultura inglesa per secoli. Per no parlar de la fondassion de Roma atribuida a Romolo nel 753 avanti Cristo, sensa prove certe, o del Caval de Troia con la sua storia epica che la xe diventada uno dei miti più influenti de la civiltà ocidental. In poche parole, anche quando che no se pol dimostrarle, certe storie e certi personagi i finissi col formar el modo in cui una comunità la guarad e la vedi se stessa. E cusì xe anche la nostra storia con Emo.

Alora, anche se no fussi vero che Emo el ga salvà l’Arena, almeno una roba la savemo de sicuro: che lui el xe veramente esistido. Dal 1583 al 1585 el xe stado Capitan de Raspo, el più alto rappresentante de l’amministrassion venessiana con competenze militari, giudisiarie e amministrative.

Sula tore nord-ovest de l’Arena de Pola ghe xe ancora ogi la lapide che i polesani ghe ga dedicà e dove che se pol leger: “Universus Polensis populus Gabrieli Aemo Petri filio, clarissimo atque excellentissimo Veneto senatori, ob aeternam monumenti huius, veteris amphitheatri civitatis, conservationem, grates agit. Anno 1583”. Che sarìa: “Tuto el popolo de Pola ringrassia Gabriele Emo, fio de Pietro, ilustrissimo senator venessian, par la conservassion eterna de sto monumento, l’antico anfiteatro dela città. Anno 1583”.

Davanti a quella lapide Emo el torna atual. Xe come ch’l andassi oltre la storia per fertlisar la realtà de ogi. No come eroe de una legenda, ma come un omo che ‘l ghe fa domanda scomoda a chi governa la città. Se un omo del Cinquesento el ga savù meterse contro quei che minaciava l’Arena, chi la difenderà ogi da quei che pian pian i la sofiga?

Se lo vedemo come un omo disposto a contrastar una decision legal ma sbaliada, in nome de un valor più alto – la tutela de un patrimonio che supera el proprio tempo – alora bisogna concluder che Gabriele Emo ogi de mester el farìa l’urbanista.

E probabilmente el scoltarìa i consigli de l’architeta Breda Bizjak: el cambieria el Piano urbanistico de Pola e magari el prepararia un Piano de detaglio per la zona de l’Arena, che ogi no esisti. E secondo mi el farìa sta roba seguendo ala lettera quel che la Bizjak la ghe ga dichiarà al nostro giornal: “Spesso se se dimentica che la conservassion del patrimonio architetonico o la conservassion urbana no la xe limitada solo ala protezion dei singoli edifici, ma che nella valorizassion de un monumento cultural se analiza criticamente anche el contesto indò che l monumento el se trova”, ricordando inoltre che l’UNESCO protegi anche le “percezioni e le relazioni visuali”.

Per questo, grazie comunque a Gabriele Emo, simbolo de un omo che ‘l ga capì che certi beni no i xe solo dei governanti del momento, ma i xe dela comunità e dele generazioni future, e che proprio per questo i va difesi e valorisai meo che se pol.

Forsi Gabriele Emo no ‘lga mai salvà l’Arena. Forsi el progetto de trasferirla no xe mai esistido. Ma la domanda che ne lassa la storia de Emo la xe ancora ogi sai atual: quando un monumento el perdi el suo spazio, le sue visuali e l suo fià, podemo veramente contentarse de dir che xe tuto legale?