EL CICLISMO IN TEL SANGUE: La famiglia Valčić de Lavarigo e l'amor per i pedai (prima parte)

In 'sto mondo ribaltà, in do’ che conta solo i schei e la gente più stimada no xe quela che la sa far ben qualcossa, ma xe quela che la se fa largo coi comi , in ‘sto mondo  in do’ che l’utile a tuti i costi el vien sai prima del “bel”, del “bon” e del “giusto”, fa sai piasser (xe quasi “balsamico”) poder contar una storia, e ancora de più perché la xe nostra, istriana, che la ga per protagonisti la passion, l’amor per qualcossa, el gusto del “far” ‘piutosto del gusto de guadagnar. Xe la storia dela famiglia Valčić de Lavarigo e del suo amor per la bicicleta.

Disemolo subito. Se el capostipite Nevio (1933-2007) el garegiassi ogi, stemo sicuri che lo vederiimo in television, a corere e guadagnar coi professionisti, al Giro d'Italia, magari anche al Tour de France e anche ale Olimpiadi che lui, comunque, le ga fate a Roma nel 1960.  

Ma co Nevio Valčić el ga comincià a corer, nel 1953, Lavarigo gaveva poco più de 300 abitanti, no iera ancora la television, la guera la iera finida da poco, i sport de squadra no i iera ancora ben organisai, cussì che i svaghi per i giovani i iera ‘sai pochi. Ma i gaveva la bicicleta. E a Pola, con quela del canotagio, del patinagio e dela bocs, esisteva xe da tanto tempo una bela tradission ciclistica.

Xa nel 1896 a Pola iera sta fondà el Veloce Club Polese e subito dopo la Seconda guera mondiale, da una costola de l’Unione Sportiva Operaia, xe nato el club ciclistico Pula. Un club che poi el ga cambià nome in Uljanik, poi Cement e dal 1963 in Siporex. E con sto nome el xe diventà famoso a livel nazionale e anche internazionale tra i diletanti.

Lavorando con l’alenador Edi Rajković, che ghe speta el merito de gaver tirà su un per de campioni e tanti altri bravi ciclisti e de gaver fato grande, a livel jugoslavo, el ciclismo de Pola, Nevio Valčić in poco tempo el diventa un vero, autentico campion dele do rode. Dopo gaver vinto i titoli juniores de campion de Croazia e Jugoslavia e dopo la vitoria, sempre tra i juniores, dela prestigiosa corsa „Giro de l'Istria e dela Slovenia“ (1953.), passado ai seniores el ga vinto tre volte de fila (1957, 1958, 1959) el titolo de campion jugoslavo su strada. Nel 1958 el xe sta el primo ciclista istrian a vinser el  duro „Giro de Jugoslavia", andando a recuper in Slovenia, sul passo Vršić (la „cima Coppi“ del quel Yugotour), ben dieci minuti de ritardo ch'el gaveva in clasifica.

Sto grande ciclista de Lavarigo, oltre a esser sta tre volte anche campion dela Croazia (1959., 1960 e 1964) e campion de Jugoslavia (1961) e Croazia (1959) anche a a squadre, el ga corso e vinto in Italia, Francia, Olanda, Germania, nei ex paesi de l'est Europa Unione Sovieta, Germania orientale (DDR), Cecoslovacchia, ma anche in Algeria, Tunisia e Marocco.

Sicome che soto la Jugoslavia ai sportivi sai dificilmente che vegniva dà el permesso de pasar ai profesionisti in qualche paese capitalista, Nevio Valčić el ga dovù corer tuta la cariera tra i diletanti, anche se nel 1961 lo voleva la squadra italiana dela “Ignis” capitanada dal grande campion Louison Bobet, uno che ‘l gaveva vinto tre Tour de France, la Milano – Sanremo, la Parigi – Roubaix, el Giro dele Fiandre e che ‘l iera anche campion del mondo. Come consolassion, Valčić el podeva dir che nel 1958, ai Campionati mondiali de Reims in Francia, el ga conossù el grande Fausto Coppi.

Nevio Valčić, un istrian che ghe iera indiferente tra el parlar el croato ciacavo o el talian istroveneto, el xe sta el rapresentante de quel ciclismo dei tempi eroici fati de fadiga e passion. Le biciclete le iera pesanti, le maie de lana le becava la pele, le gare longhe e i ciclisti gaveva dirito de magnar e bever solo do volte in tuta la corsa. Le strade le iera scalcagnade, co i sbusava i ciclisti le gome i se le doveva cambiar soli. Tecnologia zero, niente misuratori de pulsazioni e de watt prodoti dai muscoli, niente palestre per alenarse. Un altro ciclista de quei tempi el me contava che per abituarse al dolor i se alenava fassendo la salita del Canal de Leme senza posar le mani sul manubrio, ma tegnindole ferme sule gambe.

Valčić xe sta el primo sportivo istrian a finir, per meriti, in tei giornai nazionali. Nel 1964 el ga concluso la sua cariera sul podio, rivando primo ala tapa Pola Nova Gorica del Giro de Jugoslavia e vinsendo per la terza volta el titolo de Campion de Croazia. Co ‘l ga molà, dopo Ivan Levačić e Veselin Petrović, el iera considerà el terzo ciclista jugoslavo de tuti i tempi.

Nevio Valčić el ghe ga verto la strada a tanti altri ciclisti de Lavarigo: al grande Cvitko Bilić e ai cugini de Cvitko Egidio e Romano Bilić, ma anche a suo fio Luciano Valčić (anche lui ga vinto bele gare), a suo nipote (el ghe iera zio) Bruno Valčić (el xe diventà giudice de gara internazionale al Tour de France, al Giro d’Italia e ale Olimpiadi), a suo nipote (el ghe iera nono) Silvano e pareria che diventerà ciclisti anche Viktor, fio de Silvano (2 anni e meso e xa el mena la bici) e Leonard, fio de l'altro nipote Lorenzo, che 'deso el ga un anno.

Nevio Valčić xe anche el capostipite dela grande e sorprendente storia ciclistica dela minuscola Lavarigo, indò che nel 1997 xe nato el primo club ciclistico  professionistico de Croazia. I coridori de sto picio logo dela bassa Istria i ga vinto in tuto ben 39 titoli de campioni nazionali, tra Jugoslavia a Croazia. Ma questa storia, come quela dei eredi dela famiglia Valčić, del fio Luciano, dei nipoti Bruno e Silvano e dela fia Helena che con amor la cura la sua memoria, ve la conto nela seconda parte, 'sto altro sabato.

Nevio Valčić con la moglie Eleonora, la fia Helena e 'l fio Luciano

Intanto xe ben saver che Luciano Valčić, sempre in forma anche se 'l ga ben sessantasei anni, domani matina ale 7 davanti ala Stazion dei treni de Pola el parti per Nova Gorica. Pedalando per 200 chilometri el vol onorar la memoria de suo papà che sessanta anni fa el gaveva vinto su questo percorso la 13-esima tapa del Giro de Jugoslavia. Chapeu, Ciano!