Italiani a Rovigno "con" ma anche "contro" la DDI/IDS: val più i acordi politici o la civica libertà de giudizio?

A Rovigno xe capitado un fato sai interessante. El Circolo de Rovigno, che in 'sto caso sarìa proprio de indicar come Comunità degli Italiani, el xe sta protagonista de un'azion politica a favor no solo dela minoranza, ma de tuta la società e del suo teritorio. Un poco come che iera capitado nel 2008, co el Centro de Ricerche storiche, sempre de Rovigno, el gaveva dado una man per blocar la vendita de tombe storiche abandonade, quasi tute de famiglie de esuli, per no cancelar l'identità storica del logo.

I fati xe questi. Nel 2023, su richiesta e a spese de un privato paron de tereni (urbanisai) in zona,  xe sta fata la proposta del sistemazion (masterplan) de “Laste”, che saria un zona “sora” e a est de Valdibora. Una zona che, in tel’opinion del Circolo, se dovessi indicar piutosto con el nome de “Concetta” (derivado dala ceseta de l’Immacolata, nota proprio come “Concetta”, che la sta là vicin) per no far confusion con el cimitero de Laste.

Con sta proposta, su 60 mila metri quadri de teren, no lontan dal mar e con vista sul mar, se ga previsto la costruzion de 21 edifici per un total de 82 quartieri, più un albergo con 80 posti leto. Sto masterplan el ghe iera piasso a l’ex sindaco de Rovigno Marko Paliaga, tanto che dicembre del 2024 el Consiglio citadin de Rovigno el gaveva deciso de proceder ala realizazion uficial del Piano de assetto urbanistico “Laste”.

In tel setembre de l’anno scorso xe sta fato el dibatito publico sula proposta del Piano, e xe rivade tante critiche sia dal mondo politico, sia dai esperti, sia dai citadini. Qualcossa del piano xe sta cambià (via l’albergo, ma dentro altri 22 quartieri), ma lo stesso l’opposizion al Consiglio municipal de Rovigno, che sarìa Možemo, Socialdemocratici e Pensionati, i ghe ga proposto formalmente al Consiglio municipal una Delibera sull’abrogazion del Piano de asseto urbanistico “Laste”.

E qua vien el bel! Anche se sto Piano lo gavessi volù el novo sindaco (dietin) Emil Nimčević e la Dieta Democratica Istriana (che a Rovigno i comanda, ma no i pol contar su una magioranza sicura in Consiglio), el Circolo de Rovigno, che con la Dieta prima dele ultime elezioni el gaveva stipulà un acordo de colaborazion politica, el xe sta contrario al novo Piano perché no ‘l garantiva un svilupo citadin a misura d’uomo. In parole semplici, se ga paura che i quartieri che se farìa in quela zona i sarìa sai cari e in questo modo non adati a risolverghe el problema dela casa per i giovani rovignesi, ma adati invesse solo a quei, in primo logo gente de fora, pronti a sborsar tanti soldi per tarsformarli in apartamenti per i turisti e per questo destinai a restar svodi per almeno metà de l’anno. Insoma, poco interesse publico e sai interesse privato.  

Eco come che el Consiglio del Circolo el ga spiegado quel che ‘l ga deciso: "Dopo aver analizzato tutta una serie di tesi, di dati statistici, di realtà quali il calo demografico e della natalità, l’elevato numero di unità abitative esistenti e non in uso, le strategie e i piani urbanistici che prevedono la limitazione dell’aumento del numero di alloggi privati, l’overturismo, la mancata pianificazione di contenuti di interesse sociale generale nella zona interessata, l’enorme costo dell’infrastruttura e della sua manutenzione, il pericolo di inondazioni abbiamo ritenuto sia inutile adottare il Piano in discussione". De conseguenza, el Consiglio del Circolo el ga invità i suoi rapresentanti in tel Consiglio municipal ("sui" de facto, ma no de iure perché no i x stai votai sula lista del Circolo, ma su quela dela DDI)Tea Batel, Ines Venier e Monica Marich a votar a favor de l’abrogazion del Piano. Davanti a ‘sta situazion, l’altroieri el sindaco Nimčević, ala riunion del Coniglio citadin, el ga rinunciado al piano acetando la proposta de abrogazion presentada dala oposizion con el sostegno dela Comunità degli Italiani de Rovigno.

Fin quà i fati, e comentarli no xe proprio semplice. Partimo da un ragionamento storico. In tei loghi in cui l’italian (ciamemelo pur “neolatin”, “lingua romanza”, “istrioto” e “istroveneto”, ma comunque “protoitalian”) fin al 1945 el xe sta per secoli la lingua dela magioranza e, el più dele volte, anche unica lingua, ancora per un per un per de anni, fin che come comunità nazionale e linguistica no incontreremo el nostro inevitabile destin de estinzion in Istria, la comunità italiana la dovessi gaver el dirito de dir quel che la pensa in tei loghi del suo insediamento storico. Ma sta roba xe formalmente quasi impossibile perché, a causa de l’esodo, i pochi italiani restai a casa sua no i ga numeri per condizionar le decisioni politiche in tei consigli dele Cità e dei Comuni. In tela stessa maniera, a l’interno de un ordinamento democratico, saria impensabile riconosserghe ala Comunità italiana una specie de dirito de veto o, al contario, de impor l’obligo de gaver l’imprimatur dei Taliani ogni volta che le aministrazioni le fa interventi sul teritorio.

Quai xe alora i strumenti? Qualcossa pol far i vicesindaci italiani e i consiglieri dei segi garantidi ai rapresentanti dela minoranza in tei consigli de Cità e Comuni, ma xe poca roba, a volte solo folclor politico. Un’altra strada, no ben vista da tuti, xe quela dei acordi con i partiti.

A Rovigno, xa nel 1993, la Comunità degli Italiani la gaveva scelto proprio quela strada, quela dela colaborazion con la Dieta Democratica Istriana che per quasi trenta ani la xe stada al potere in quasi tuta l’Istria. In tei anni Novanta, co i risc’ci de verderse ridur i diriti minoritari in Istria a causa del nazionalismo imperante in Croazia el iera grande, rivolgerse ala Dieta, l’unico partito che sosteneva el multiculturalismo e ‘l multilinguismo istriani, iera sta per la comunità italiana una scelta normale e no solo inevitabile, ma anche gravida de bone speranze e costrutiva.

E iera stada un colaborazion costrutiva per tute e due le parti perché, se alla DDI ghe va el merito de gaver aprovà tanti statuti citadini e comunai rispetosi dela presenza italiana, xe anche vero che grazie ai Italiani de l’Istria e ai suoi rapresentanti la Dieta ga podù aver contati privilegiai con l’Italia, specialmente con el Friuli Venezia Giulia e 'l Veneto, imparando da ste Regioni le esperienze de gestion locale del teritorio, conossendo figure politiche e portando arichimento al dibatito politico in Istria e Croazia. Ma anche ingrumando modi e stili de una moderna comunicazion politica, non ancora presente in tel resto dela Croazia. Basti dir, tanto per far un esempio, che da l’incontro de interessi tra l’Unione Italiana, la DDI e la Region Veneto nel 1994 xe stada aprovada la Lege regional del Veneto per la tutela e la valorizzazion de beni culturali, architetonici e linguistici in Istria e Dalmazia, conossuda come "legge Beggiato": grazie a quela lege fin ogi xe sta fati 765 interventi che i ga portado in tele nostre zone circa 12 milioni de euro.

Ogi la Dieta no la xe più el partito de una volta, de sbagli i Dietini i ghe ne ga fati tanti, la gente ale elezioni li ga castigai per ben, tanto che gnanche a Rovigno, da sempre rocaforte dela DDI, no i comanda più in modo comodo. Epur, prima dele elezioni aministraive del magio del 2025, la CI de Rovigno la ga rinovado el suo acordo de colaborazion politica con la DDI.

Sorvolando sula domanda classica, tormentada e tormentante, se le Comunità degli Italiani, che le xe sì organizazioni politiche, ma che le se dichiara apartitiche, le fa ben o mal a far acordi con partiti politici, i fati de sti giorni de Rovigno i ne meti davanti a questa domanda dificile: visto che la Comunità degli Italiani de Rovigno la gaveva un acordo eletoral con la DDI grazie al qual la ga otenudo tre rapresentanti in tel Consiglio citadin (Tea Batel, Ines Venier e Monica Marich), la ga fato ben o mal a invitar queste stesse tre consigliere a votar contro l’aprovazion de un Piano che ala DDI, che la ga contribuido a farle diventar consigliere, el ghe stava ben? In altre parole, val de più la disciplina partitica e ‘l rispeto dei acordi o le ragioni morali e civili e la libertà de giudizio?

Anche se penso che la libertà de giudizio la sia una valor universal che ‘l val per sempre, e al contrario, i acordi con i partiti ogi i xe e domani no i xe e, pur fassendome sai piasser che i Italiani de Rovigno i sia stadi protagonisti de una decision che no li riguarda solo lori bensì la salvaguardia del teritorio, no son bon de dar un’opinion convinta. Ma posso agiunger due robe. La prima xe che xe de sperar che ‘desso la DDI non la serchi vendeta andando a no rispetar altre voci de l’acordo con el Circolo. La seconda xe che me dispiasi sai per le tre mule (consigliere citadine) che le se ga ritrovà tra l’incudine e ‘l martel. Rovigno xe un logo picio, el riscio de farse ciamar, semplicemente caminando per strada, “traditrici del partito” da una parte o “traditrici de Circolo” da l’altra, secondo mi el andava evitado metendosse d’acordo prima, a tu per tu, sensa far s’ciopar el bubon davanti al mondo. Insoma, xe stada una vitoria, ma con el retrogusto bastansa amaro.