Sti giorni gavemo leto che l'Europa ga bachetà la Croazia. E savè perché? A Bruxelles no ghe squadra che nela proposta per el bilancio de stato del 2024 Zagabria la ga mantegnudo quele miʃure de aiuto ai citadini e ala economia per contrastar la cirsi energetica. Per eser ciari, grasie a ste misure la gente paga la luce meno de quel che la dovesi pagar se no ghe saria l’intervento del governo. Gavevi capì ben, semo rivai al punto che co el governo el serca de far qualcosa de bon per la gente, sta roba non la va ben.
“E come la bora che vien e che va, i dixi che ‘l mondo, se ga ribaltà”, recita una vecia canson triestina. E pareria che, bora o no bora, el mondo el se ga ribaltà per vero. Ma se ricordemo come che andava le robe nela seconda metà del Novecento? Quaʃi tuto in politica gaveva come scopo el far star meo la gente.
Tanto per far un esempio, demoghe un ociada al’Italia: a parte el dirito ala salute publica che el esisteva xa, nel 1946 le done le otien el dirito de voto, la Costituzion italiana nel 1947 la ghe riconosi ai lavoradori el dirito ale ferie pagade, nel 1970 riva la lege sul divorzio, nel 1978 xe pasà el referdum su l’aborto (prima de quela data, le done che abortiva le podeva finir in galera anche per 4 ani) e cusi iera anche nell’ex Jugoslavia. In Svezia el trasporto pubblico el iera gratuito, i sindacati i gaveva un peʃo e tante volte i ga portà a casa bei risultati per la gente che lavora. El centro dela politica, pur con mile problemi, iera l’omo.
Deso invese, dopo che a Maastrcih nel 1992 i se ga meso d‘acordo che el deficit del stato (nei stati UE) no'l devi esser del 3% più grande del prodoto interno lordo (PIL) e che el debito publico no ‘l devi eser più grande del 60% del PIL, el stato in funzion del citadin (e non el stato contro el citadin che gavemo ogi) el ga comincià squaiarse come la neve soto el sol.
Per rivar a starghe dentro a sti numeri che i xe maledeti per tuti i stati, Germania compresa, i governi i ga comincià taiar tuto quel che gaveva a che far con el stato sociale. A taiar no con la britola, ma con la manera! L’Europa, come l’America, per salvar le banche la se caleria le braghe fin per tera, ma co xe de far del ben per la gente, la xe subito pronta a dir “no se pol”.
Dixeva el grande giornalista Andrea Purgatori che una volta, co i politici i parlava, che i fosi simpatici o antipatici, de lori se gaveva cosa imparar. Con questi de ogi te vien voia de sprofondar dela vergogna per le stupidade che i dixi e che i fa. Provemo a imaginarse che ancora no esisti el dirito ale ferie pagade: domandarghe una roba del genere ala clase politica de ogi saria mission impossible. Sta roba la faria anche de rider, se el preso de pagar no ‘l saria cusì alto. E più poveri che se xe, più ste nove politiche tute profitto-crescita-banche se le senti sula pele.
Volevino l’Europa per no pagar dogane, per pasar el confin sensa far la file, per gaver l’Euro. Ben, le dogane no le xe più, ma se volemo far una spesa come che dio comanda ne toca andar de novo in Slovenia o in Italia: Schengen el xe come el “žmigavac”, un poco el “lavora” e un poco no. E l’Euro? Per el momento el ne ga fato creser el costo de la vita de un bon 20%. Chi che ga qualche utile de 'sto tipo de Europa xe solo quei che i sa rangiarse con i progeti europei.
Tanti de noi xe nati in un mondo in cui dal star peʃo se andava verso el star un fià meo. Deso par de viver in un’epoca in cui se torna indrio. Cosa gavemo combinà nei ultimi ani? E perché?
