LA FEROVIA IMBRIAGA: Nova atrazon turistica istriana o simbolo de quanto che semo remengo?

In croato i la ciama “pijana pruga”e da qualche tempo, come curiosità turistica, la xe conossuda anche in Italia col nome de “ferrovia ubriaca”, cussì che anche noi la ciameremo ferovia imbriaga. O magari “ferovia cariga”, no perché cariga de vin, ma cariga de significati simbolici no tropo bei.

Co l’Istria la xe passada alla Jugoslavia, la “ricostruzion” la se ga basà tanto sul lavoro volontario, che poi tanto volontario no ‘l iera. Iera un lavor duro e imposto per decreto,  tanto che, quei che no i xe andaì via a causa del foibe, del cambio de regime e del cambio de lingua, i xe scampai a l’estero per no dover far sto lavoro volontario.

Indiferente, col lavoro volontario se ga netà le macerie dei bombardamenti de Pola, se ga bonificado la piana de Cepic e poi, dal 1948 al 1951, le mule e i muli istriani i ga lavorà ala posa dela famosa ferovia Lupoglav (Lupogliano) -Štalije (Stallie), che la saria ogi la nostra ferovia imbriaga.

La Jugoslavia la se stava industrializando, a l’industria ghe serviva el carbon, el carbon stava in tele miniere de Arsia e Arsia la iera taiada fora dale vie de comunicazion. Bisognava colegar Arsia con le ferovie jugoslave che da Skopje, pasando per Belgrado, Zagabria e Lubiana, le rivava a Pola tocando Lupoglav. O, se preferì in Italian, Lupogliano.

Oltre ai quasi due chilometri che colegava Arsia con Stallie, per rivar fin a Lupoglav i ga posa 52,7 chilometri de sine e tole, meritandose anche le congratulazioni de Tito, contento per una “nuova vittoria de lavoro”. Nota bene, co i ga finì iera el 25 dicembre del 1951, giorno de Nadal e, quela volta giorno de lavor.

Fin che ga durà la Jugoslavia i treni carighi de carbon de Arsia i caminava ‘sai su sta ferovia, ma con la fine della federativa xe vegnù a mancar el mercato e vagoni con carbon ghe ne transitava sempre de meno. Poi, nel 2009, vicin del castel de Cosgliacco (Kožljak) xe capitada anche una frana che la ga 'sassinà le sine. Anche per via del cedimento del teren in altri loghi, con uno in manutezion e cinque in incuria per i governanti, adesso sta ferovia la xe tuta storta e sghemba, tanto che in certi punti la par come le montagne russe. E la xe diventata un’atrazion turistica.

Disevo che prima che sta ferovia la xe anche cariga de simboli. Vedemo solo due. El primo, ‘desso che la xe tuta scavassada e mal messo, la xe el simbolo de un sistema, quel comunista (socialista jugoslavo), che el iera cussì scavassà e mal messo che ‘l ga fato andar via de l’Istria almeno la metà dela sua gente. Oggi la xe invesse el simbolo de quanto scavasade e mal messe xe in genere la ferovia istriana (che po saria quela fata da l’Austria), tanto che per andar in treno da Pola o Pisin a Zagabria ghe vol passar per Lubiana fassendose un viagio che el dura tre volte de più che farlo in auto.

Ferovia imbriaga? Xe un deto che ‘l disi che al mondo xe più veci imbriagoni che veci dotori. Se xe cussì, un treno e una ferovia come che Dio comanda per Zagabria podemo solo insognarseli.