Ogi xe el 25 aprile e in Italia se celebra due feste sai sentide: quela dela liberazion dal nazifascismo e quela de San Marco, el patrono de Venezia. Xe due feste che, dipendetemente dale interpretazioni, le xe sai divisive e, volendo esser seri, su sto scontro saria de scriver libri, no un articoleto del sabato in dialeto.
El fato che ste date le sia generatori de contrasti se lo podessi individuar adiritura in tela prima frase de sto articolo: “Ogi xe el 25 aprile e in Italia se celebra due feste sai sentide: quela dela liberazion dal nazifascismo e quela de San Marco, el patrono de Venezia”. Infati, in Italia esisti (tropa) gente che la vitoria su quel disgrassià de fascismo no i la vedi come una liberazion, ma come un tradimento. E, andando avanti, sempre dela stessa frase, i più autonomisti e intransigenti tra i Veneti i diria che no se pol parlar de “feste celebrade in Italia” perché Venezia, sule ali dela defunta Serenissima, con l’Italia no la gavessi gnente cossa far.
Dirò qualche roba, cominciando con el 25 aprile. Partimo dala revision dela storia, ancora in corso, che la vol far diventar cativi quei che in tela seconda guera mondiale i ga vinto e boni quei che i ga perso. Mi no digo che, qualche correzion ala storia che se ga comincià contar a partir dal 1945, no la sia stada giusta, utile e necessaria. In fin dei conti i partigiani, ma anche el movimento de liberazion guidado dai comunisti, no iera solo rose e fiori. Ma da quà a voler riscatar el fascismo in Italia, ma anche i ustaši in Croazia – come che avien in tei ultimi trenta anni – ghe xe un buron carigo de leture false e forzade dela storia, de giustifcazionismo per i ditatori e de un iperbolico carigar de colpe a quei che i ditatori i li ga combatuti.
A volte xe in balo la malafede, altre volte interessi politici e elettorali de oggi, altre volte se confondi la memoria privata con le eveidenze storiche. Tipo quei che i disi „mio nono iera fascista /ustaša ma el iera un omo bon, el se ciogheva cura dela famiglia e poi el iera un grande patriota“ dimenticandose che el serviva una regime che ha ocupà l’Etiopia, la Grecia, Lubiana, che el maltratava i Slavi in Istria, che el censurava la libertà de pensiero, che el ga copà el parlamentarismo e de conseguenza la rapresentanza dei citadini al governo, voluda dai stessi citadini e no imposta con la forza. O tipo quei altri che disi che “ai tempi de Mussolini i treni i iera puntuali” dimenticandose che, tra le mile malefate contro i altri popoli (ebrei compresi), sto nane el che ga dichiarà guera a l’America e poi el ga mandà soldati italiani ai morir in Russia dandoghe stivai con le siole de carton.
Fassendo tuto sto casin, oltre a tuto el resto el fascismo el ga rovinà el bon nome de l’Italia, patria de l’Umanesimo e Rinascimento rispetai e invidiai in tuto el mondo. Questo xe sta el vero tradimento, no quel de chi che ga disertà da l’esercito de una patria che la gaveva tradido sia i sui citadini, sia i valori de umanità e de giustizia. Per no dir che, sta macia del fascismo la ne ga rovinà la vita anche a noi, italiani restai in Istria e in tel Quarnero, carighandone de vergogna storica e metendone per meso secolo in posizion minorata, oltre che minoritaria.
E qua voio spender qualche parola per i esuli. Mi ai esuli ghe voio ben e per tanti anni gavevo pensà che esuli e restai fossimo la stessa gente che, anche in tela disgrassia, la se voleva ben. I momenti più bei dele mia estate co iero fioi iera co a Pola vegniva i mii sii, esuli a Brescia. Solo de grande go capì che tanti tra i esuli ne vedeva a noi come traditori e, qualchedun tra quei che xe restai, i li vedeva lori come fascisti.
Bon, con tuta la comprension umana, ma anche identitaria per el dolor soferto dai esuli, no rivo capir una roba: capisso benissimo che i la ga con Tito e con i comunisti, sia jugoslavi, sia italiani, ma no capisso perché al tempo stesso tropi de lori xe nostalgici del fascismo, el regime che xe sta la causa prima che li ga fati diventar esuli. Una sindrome de Stocolma incredibile. Xe vero che el partito neofascista de Almirante, el Movimento Sociale Italiano, xe sta l’unica forza politica a darghe bado ai esuli, ma acetar la man de quel che prima te ga taià due gambe me par che sia una roba fora de testa. Cussì come che i gavessi dovù cior a piade in tel cul i comunisti italiani (che i ga fato de tuto per insabbiar e relativizzar la storia dei esuli istriani) i gavessi dovù darghe piade in tel cul anche al MSI.
Sul 25 aprile, sui sbarchi dei Americani e le consguenze de lungo periodo per la politica italiana (diventado un paese a sovranità limitada), sul fato che la Resistenza nascifascsta no la ga fata solo i partigiani comunisti ma anche, e in gran numero, i catolici e i liberali saria de scriver pagine. Ma, forsi, basta dir questo per sostener che el 25 aprile va ricordado come un giorno de libertà ritrovada: el contrario di fascismo no xe el comunismo (che no me passa per la testa de difender), ma xe la democrazia.
Per quel che riguarda la festa de San Marco, no me interessa scriver de l’autonomismo veneto, ma un per de robe storiche. In tel anno 828 due mercanti veneziani, Buono da Malamocco e Rustico da Torcello, a Alessandria d'Egitto i ga fato quel che vien ciamada “traslazione delle reliquie di San Marco”. In parole povere, i se ga portà via a Venezia el corpo de l’Evangelista. Sto fato che ga dà una man ai Veneziani a conquistarse l’indipendenza da Bisanzio che la avien poco tempo dopo, co doge de Venezia iera el polesan Pietro Tradonico, tra el 836 e l’864.
Da quando che el xe a Venezia, San Marco el vien celebrà come patrono dela cità al posto de San Teodoro. Le sue relique le xe conservade in tela Basilica de San Marco. El 25 aprile i Venezaini i xe sai orgogliosi, i tira fora le bandiere e i se scambia el “bocolo” che saria una bocciolo de rosa che no el devi esser ancora verto.
Mi digo che anche noi in Istria San Marco lo podessimo festegiar un fiatin. E questo no perché Venezia, almeno per quel che riguarda i taliani de l’Istria, la ne ga portà la lingua che parlemo adesso. Una lingua neolatina, romanza, ciamela come che volè, sula costa ocidental istriana se la parlava xa prima che l’Istria la passassi a Venezia. De San Marco dovemo ricordarse perché Venezia la ne ga portà l’architetura che ancora ogi la definissi i nostri loghi, i nomi dei pessi, dei venti, dei ordegni, abilità artigianli e ricette culinarie e usanze ancora presenti in Istria. E anche se ai Croati de l’Istria ghe piasi parlar de Venezia come de un ocupator che segava i boschi, un fià de festa i la dovessi far anche lori. Questo perché, a parte quei dele zone de Pinguente e de Barbana presenti in Istria ancora dal VII secolo, el grosso de croati (ma anche de serbi, greci, rumeni, montengrinio, albanesi, furlani) i xe rivai in Istria proprio su invito de Venezia che tra el XV e ‘l XVIII secolo ghe ga dado tere, lavor e la possibilità de rifarse una nova vita qua, soto sto ciel istrian.
