Quel che gavevo de dir sula tremenda tragedia de Vergarola penso de gaverlo dito, sempre per questa nostra rubrica in dialeto e sempre su questo portal Istra24, xa l’anno scorso. E, a dir el vero, no gavevo più intension de tornar su un tema che el risc’ia sempre de verser veci rancori. Ma sicome sto anno se celebra i otanta anni tondi dela strage, no posso far finta de niente e qualcossa devo pur dir.
L’esplosion del 18 agosto 1946 la ga causà la morte de, dipendentemente dale fonti, dale 65 ale 116 persone. Pareria che i corpi identificai i sia stai 65, altri circa 50 i saria stai dilaniai, disintegrai, magani dai cucai e mai identificai perché in tela spiagia in tel golfo del Pola iera presenti anche persone che le vegniva da fora cità e profughi mai registrai.
Più che per le cause tecniche (o tecnico-bellico-politiche) de quela che xe sta una dele tragedie piu violente (con i bombardamenti aleati e le incurisioni dei Genovesi nel XIV secolo) dela storia de Pola, la storia la ga decretà che la strage de Vergarola la ga inciso sai più sule conseguenze. In altre parole, indipendentemente dal fato se le mine le ga fato ativar i servizi segreti jugoslavi, quei italiani o se sia stada autocombustion (la causa vera no la xe stada mai scoperta uficialmente, ne mai xe sta fato un proceso), l’episodio xe sta el sburton decisivo per far scatar l’esodo in massa dei taliani via da Pola, versendo una fase storica che, dopo secoli de prevalenza de lingue romanze — dal latin ale parlade neolatine, fin all'istroveneto e a l'italian — ga portà el croato a diventar la lingua più parlada in cità.
El conseguente cambio demografico in Istria, el modo sai bruto in cui i esuli istriani i xe stai visti per tropo tempo in Italia (tanti i li ciapava per fascisti, dato falso e ofesa tremenda per una popolazion, quela dei esuli istriani in Italia, composta per gran parte dai pici artigiani e proletari) i ga fato sì che pe 50 anni de sta strage se parlassi poco o gnente in Italia, gnente nella Pola jugoslava, con i novi abitanti dela cità che de sta tragedia no i saveva gnente, né ghe xe sta dito gnente da quei che comandava e saveva. Sol la minoransa italiana la saveva e ghe tocava taser fin che, per prima, no la comincià parlar.
In tei ultimi anni, in tela Pola diventada croata, le coscienze le se ga risveià e, come che go scrito l’altra volta, “dovessi esser l’Italia e la Croazia insieme, visto che otanta anni fa no lo ga fato né l’Italia, né la Jugoslavia, a verser un’inchiesta, coinvolgendo Inglesi e Americani, per far luce sui fati del 18 agosto del 1946. No per punir qualchedun, ma per darghe pase ai morti e ai vivi.”
Poi, concretamente, dopo che in sta primavera sul momunento davanti ala catedrale del Pola,xe sta messi i cippi con i nomi de tute le vitime ientificade, resta ancora de onorar la memoria del dotor Geppino Micheletti, el chirurgo che, anche dopo gaver savudo che l’esplosion de Vergarola la ghe gaveva portado via i due fioi pici, el fradel, la cognada e altri parenti, el ga continuà a operar e a salvar vite, restando a lavorar in tel ospedal che a l’epoca el se ciamava Santorio Santorio, nome del quel capodistrian che ‘l ga inventà el termometro in medicina. El nome de Micheletti ghe se lo dovessi dar o al Pronto soccorso, o a una sala chirurgica de l’ospedal de Pola.
E poi xe el livel simbolico. La strage de Vergarola la pol essr vista anche come l’ultimo gesto de violenza ala fine de un percorso, comincià verso la fien de l’Otocento, in cui italiani e croati de l’Istria no i ga fato che odiarse e farse del mal. Dopo tuti i maltratamenti, le umiliazioni e le ofese subide dai croati e altri slavi al tempo del fascismo, a Vergarola, un (ciamemlo) “giro de destin” cinico e implacabile el ga portà oror e morte tra i taliani. Mi no intendo dir che esodo, foibe e Vergarola i xe stai la giusta vendeta per le malefate fasciste, me limito a guardar come che la xe andada finir e come che la pol esser interpretada a livel simbolico. E sicome l’Italia la ga anche perso la guera, se ga generà le condizioni afinche l’iredentismo jugoslavo (croato e sloven) nei confronti de l’Istria, presente da metà de l’Otocento proprio come quel italian, el podessi ripeter la stessa roba combinada meno de trenta anni prima da quel italian: cussì come che l’Italia la se gaveva slargado a zone de l’Istria abitade a stragrande magioranza da croati e sloveni, cussì la Jugoslavia la se ga slargà a loghi de l’Istria abitade a stragrande magioranza da italiani. I to je to. Amen.
Desso, per fortuna, xe 80 anni che in Istria se vivi in pase. Chi che ga vinto ghe speta el ruolo del vincitor, chi che ga perso el ruolo del perdente. Ma no come ai tempi co se diseva “guai ai vinti”, ma su l’onda de una convivenza che per fortuna (anche se a volte più per imposizione politica che per convizion etica persoanl) la funziona. E, da questo punto de vista, Vergarola la devi esser un monito per farne diventar, qua in Istria, i uni e i altri, el meo del quel che podemo diventar, no el peso de quel che semo stai.
