Se stava ben. O, per mejo dir, se stava mejo co se stava peso

Prima de Nadal mio pare el andava in bosco e el tornava con un zanivaro (ginepro-smrikva). El trovava sempre quel giusto, inpuntido, largo de soto, verde e bel. No ghe serviva tanti adobi, bastava un poco de luce e soto tanto muscio.

No go avudo mai tanta confidensa coi simboli del consumismo, però el zanivaro me piaseva e jero contento sentir mio pare che el diseva che el bosco, qua in Istria, no gaveva abeti e che la gente se rangiava usando quel che la trovava.

El zanivaro no el se consuma, el xe testardo, el dura, el xe come la masera, come la casita, come le cesete che ti trovi sparse per i boschi che una volta jera tera coltivada, come i tabernacoli su le crosere o lungo le strade praticade che te porta senpre a destinasion. Tuta l’Istria la xe piena de ste testimonianse, no ti pol perderte, o prima o dopo ti rivi davanti a una crose o a una Madona.

Mio pare el trovava senpre el zanivaro giusto, no el se perdeva nel bosco, el gaveva naso. In cità xe un’altra storia: ti vadi in botega e ti conpri l’abete; no servi naso, basta i soldi.

Una de ste sere de piova jero sentà soto el balador e sta acqua, che la vegniva so a brente, la me creava disagio, sentivo come un gropo in gola, un senso de malinconia e de solitudine che creseva. Alora me go ricordà che de picio spetavo la piova come un regalo. Me metevo i stivaleti de goma, granpavo l’ombrela e corevo in strada. Saltando de qua e de la cercavo i gausi, quei più fondi per sentir l’acqua intorno al pie caldo. Puntavo i stivai soto le sgorne spetando le sbrufade più forti che me bagnava le braghe. E no jero mai solo, da i portoni spalancadi spuntava ombrele come funghi e ognidun cercava el suo gauso e la sua sgorna.

Jera ginepro, no jera abete. Come senpre, jera prima de Nadal.

Cedo la parola a Donatella...

Con la festa de San Nicolò se pol dir che semo entradi nel periodo de Nadal, e fin la festa de la Befana goderemo de un mese pien de sarme, paste in forno, francuske salate, fritole, panetoni e cusì via...

No so voi, ma mi ste feste, a parte l’ansia del magnar, me meti tanta alegria e bon umor, ma anche un pò de nostalgia. Me vien in mente tante robe che in sto periodo se faseva co se jera fioi. Me vien in mente persone che ogi no le xe più e che me ga inparado le tradisioni del Nadal.

Per esempio, cominciando proprio con la festa de San Nicolò xe due filastroche che cantavimo, e che cantemo ancora ogi a Galisan, me disi i coleghi che anche a Pola e Fasana le se canta. La prima xe bastansa legera, se volemo, ma la seconda co jero picia me meteva un pò de paura. Co se xe fioi se ciapa su serio quel che te disi i grandi.

San Nicolò badò

in braghe si cagò

la mama lo netò

o che spusa San Nicolò!

San Nicolò de Bari

la festa dei scolari

i scolari no vol fa festa

San Nicolò ghe tajerà la testa.

Ve dirò che mi per sicuresa fasevo festa ogni 6 dicenbre. E sensa tante storie, no come deso che i fioi ciapa giogatoli o schei. Noi con due mandarini, una ciocolata picia e un pacheto de gome per mastigar (se ti jeri fortunà ti ciapavi le Big Babol, se no ti te contentavi con le Bazooka) jerimo contenti.

Poi, xe "l’incognita" quando far l’albero de Nadal. Ancora ogi me porto drio el dubio se lo faso nel momento giusto o sbagliado. Xe chi che diseva che se lo fa per la vigilia, altri el giorno de l’Imacolada Concezion (che xe el 8 de dicenbre), e poi xe quei che diseva de farlo quando che ti ga voja.

Ma, inportante jera che el abi la ovata. Quela no doveva mancar gnanche per sogno! Chili e chili de ovata... per l’albero, per el presepe, per la barba de Nono Inverno...

Se stava ben. O, per mejo dir, se stava mejo co se stava peso.