SERGIO ENDRIGO, premio Oscar e gloria dei Polesani

Sto anno, per esser giusti el 7 setembre, xe passai 20 anni dal giorno che xe morto el grande cantautor italian, el Polesan Sergio Endrigo. Qua a Pola el iera sta quasi ignorado per boni 45 anni. Me ricordo ancora che co el ga cantado, sarà stà verso el 1990, per la prima a volta in tel Teatro de Pola, ghe gaveva tocà vegnir solo sul palco. Nissun lo gaveva presentà, gnache due parole per dir chi che ‘l iera o chi no ‘l iera. Meno mal che el publico polesan lo gaveva acolto con sai calor.

Epur, da quel momento Pola ga comincià ricordarse de esserghe “mama” a un grande artista, a un cantante che, in tel 1968 con “Una canzone per te” el gaveva vinto el Festival de Sanremo, ma anche un musicista che, per pegola solo post mortem, el ga vinto un Oscar per le musiche de quel grandbel film che xe  “Il Postino” con la regia de Michael Radford e che ‘l gavù per grandi interpreti Philippe Noiret in tel ruolo de Pablo Neruda e Massimo Troisi in quel del postier. Per Troisi, meraviglioso, talentuoso e iripetibile ator napoletan, quel sarìa sta l’ultimo film, tanto che no’l ga rivà gnanche vederlo: el iera morto a soli 41 anni poco prima che el film vegnissi presentà al publico.

El film sul postier e sul poeta Neruda el iera candidado a 5 Oscar, el ga vinto solo uno, proprio quel dela musica. Prima el ghe iera sta asegnado solo al  compositor, pianista e direttor d’orchestra de fama internazional, Luis Bacalov. Argentin ma naturalizà italian, Bacalov gaveva lavorà anche con Fellini, Pasolini, Sergio Corbucci. Solo ne 2013, dicioto anni dopo che el film el iera finì, el riconosserà che le musiche per la colona sonora le gaveva scrite anche Sergio Endrigo. E con lui anche Paolo Margheri e Riccardo Del Turco (quel de “Luglio col bene che ti voglio) che de Endrigo el iera el cognà: i gaveva sposà due sorele, Donella e Maria Giulia Bertolucci.

Bacalov e Del Turco no iera i unici grandi nomi che ga lavorà con Sergio Endrigo. El cantante polesan el ga colaborà con “numeri uno” come Pier Paolo Pasolini, Giuseppe Ungaretti, Gianni Rodari, Vinìcius de Moraes, Toquino.

Ma tornemo a quel concerto del 1990, momento in cui Endrigo el ga comincià eser valorizà anche a Pola. Con lui sul paloscenico iera anche e grande cantautor croato Arsen Dedić e, con la telecameera in man, iera xa pronto l'ator Igor Galo che quela volta el ga girà un documentario. El vegnerà presentado con el titolo “Hommage a Sergio Endrigo” solo nel 2022.

Ma nel fratempo Pola se gavevà sveià. A Endrigo la ghe ga dedicà un parco (vicin de indò ch’el stava lui, in via de l’Istria, solo de l’altra parte, de drio del dispensario dei fioi) con in mezo una scultura che la rafigurà l’Arca de Noè, ala sua memoria xe stadi fati concerti (anche da parte dei cori dela Lino Mariani del Circolo de Pola), xe stade dedicade varie “giornate” e, sempre nel 2022, xe sta prodoto un CD no con Arsen Dedić, ma con suo fio, el bravissimo pianista Matija Dedić, anche lui morto giovane, a soli 52 anni in tel giugno de sto anno. El CD intitolà “Matija Dedić plays Sergio Endrigo” el xe sta prodoto da un altro grande talento nostran, el polesan Edi Cukerić.

L'ultimo dei omagi el xe de pochi giorni fa, co al Circolo de Pola xe sta inaugurada una mostra su Sergio Endrigo. Per esser sinceri, più che una mostra iera un per de panei: anche se Claudio Magris me ga insegnà che non conta “coss che se fa”, ma “come che se fa”, stavolta trascuro el consiglio de Magris concentrandome solo sul “cossa” e osservando che quel che conta xe le bone intenzioni. Anche perché quel momento el xe sta bastansa importante, organizà in ocasion dela visita in Istria de l’Amabasciator italian a Zagabria Paolo Trichilo. E con lui in Circolo iera la Consolessa italiana a Fiume Iva Palmieri, el vicensidaco de Pola Vito Paoletić, l’assesor regionale a l’amor patrio e ale robe tipicamente istriane Vladimir Torbica, el presidente dela Giunta escutiva de l’Unione Italiana Marin Corva, tuti presentai dala presidentessa del Circolo Tamara Brussich.

Ma, quel che personamente me ga piasso de più, xe stada la presenza sul palcoscenico de Bruno Nacinovich che per tanti ani lo gavemo visto in teatro come ator del Dramma Italiano de Fiume. Chi che lo conosseva un fià meo, saveva xa che Bruno xe anche un cantante sai bravo.

In circolo, oltre a contarne la storia de l’Oscar e dela parentela tra Endrigo e Del Turco, el ga cantà le canzoni più famose del nostro Sergio, a partir dala famosa “1947”, in modo lampante dedicada a l’esodo con i versi, da brividi, “Da quella volta non l’ho rivista più/Cosa sarà della mia città/Ho visto il mondo e mi domando se/Sarei lo stesso se fossi ancora là/Non so perché stasera penso a te/Strada fiorita della gioventù/Come vorrei essere un albero che sa/Dove nasce e dove morirà”.

Ma poi gavemo scoltà anche “Lontano dagli occhi”, “Un canzone per te”, “Io che amo solo te”, “Ci vuole un fiore” e l’”Arca di Noè”. Endrigo gaveva una voce e un modo cantar particolari e gavessi avù poco senso tentar de imitarlo come un papagal. Bruno Nacinovich el ga scelto un’altra strada e ‘l ga fato sai ben a farlo: lui le canzoni de Endrigo le ga intepretade e lo ga fato in modo da esaltarghe tuto el fascino e tuto el valor artistico. Scoltar Nacinovich xe sta proprio una goduria.

Desso me vien in mente una roba: con la canzon “1947” Sergio Endrigo xe fora de ogni dubio un cantante caro a chi che xe andà esule. Ma el fato che el gabi cantà tante volte, diventando suo amico con el cantautr croato Arsen Dedić, ne indica che iera bel anche tornar a casa, superar i dolori dela storia e far robe bele insieme.